خلل النوم، كام مرة سمعنا إن حد مشي وهو نايم🚶 ،
طب كام مرة شوفنا حد قريب مننا وهو نايم كان بيصرخ بصوت عالي😖 ، أو كان بيحلم بكوابيس👹 وكان بيتفاعل معاها علي المستوي السلوكي كأنه بالظبط صاحي …
هو ده بالظبط اضطرابات المخلات بالنوم -واللي ليه أشكال تانية هنعرفها من خلال الموضوع ده ..في الاضطراب ده هنلاقي أحداث غير طبيعية بتحصل للشخص اثناء نومه 😴 سواء كانت سلوكية أو فسيولوجية !!
ولعلم حضراتكم ده مش اضطراب واحد .. ده عبارة عن اضطراب كبير بيندرج تحته اضطرابات تانية زي ما هنشوف مع بعض دلوقتي
:-
1- اضطراب يقظات النوم غير المصحوب بحركة العين السريعة: 😑
طيب امتي أقول ان الشخص دة بيعاني من الإضطراب دة 🙄 ؟
– لما ألاقي إن في نوبات كتير من الصحيان واليقظة بس تكون مش مكتمله وبنلاقيها بتحصل أكتر في التلت الأخير من فترة النوم😕
وهنلاحظ معاها 🧐
* المشي أثناء النوم🚶 : هتلاقي فيها الشخص أثناء وهو نايم ماشي في البيت وبيتجول فيه، ولو حد وجه له كلام مش بيستجيب ليهم ، ولو حاولت أصحيه بيكون بصعوبة شديدة
* فزعات اثناء النوم😫: وده هتلاقي فيها الشخص فجأة صرخ بصوت عالي جدا، وخايف جدا، كمان هنلاحظ عليه أعراض فسيولوجية زي اتساع العين ورعشة وضربات القلب وسرعة التنفس والتعرق… هنلاقي كل دة بيحصل كل ما يحصل فزع –
ولو سألنا الشخص ده هل كان بيحلم ..مش هيفتكر حاجة او نادراً لو افتكر 💁 –
كمان لما يصحي بينسي أساسا إن حصلتله النوبات دي😕
أما النوع التاني من الإضطرابات دي :
.. اضطراب المشي أثناء النوم : sleep waking Disorder
طبعا سمعنا كتير أوي عن أشخاص بتمشي وهي نايمة🚶🚶وبنقعد نستغرب ونقول إزاي بيحصل ده أو أكيد إنه بيمثل، بس ده فعلا اضطراب نفسي وفي ناس بالفعل بتعاني منه ، لدرجة إنه لما بيصحى من النوم مش بيبقي فاكر إنه عمل كده 🤕 !!!
وهنلاقي إن غالبا الاضطراب بيحصل في الثلث الأول من النوم😴
طب ايه الأعراض الي بتظهر علي الشخص لما بيحصله الإضطراب دة؟؟ 🥺
1- بلاقي الشخص أثناء النوبة وجهه شاحب😨 جدا ، ممكن ألاقيه مبرق بعنيه😳 ، مش بيستجيب مع أي محاولات من الآخرين إنهم يصحوه
🥱 2- بنلاقيه بيعمل حركات غريبة طبعا من ضمنها إنه يمشي وهو نايم ، ممكن يدخل الحمام ، يفتح الدولاب و يلبس هدوم🙁
3- كمان إنه ممكن يمشي ويروح ينام في مكان تاني أو أوضة تانية ويصحى تاني يوم يستغرب ويقول لنفسه أنا ايه الي جابني هنا 😂🙄
4- هلاقي كمان إن ممكن الشخص يقول كلام سواء كان مفهوم أو غير مفهوم أثناء النوبة🗣️
5- طبعا بنخاف على المريض ده إنه يأذي نفسه أو يأذي حد أو ممكن يقع مثلا من الشباك
طب اية مآل ومسار الإضطراب دة؟ 🧐
الإضطراب دة بيبدأ في الطفولة المتأخرة 🧒يعني من 6-12 سنة وبيفضل مستمر لكذا سنة سواء حصل كل يوم أو كل فترة، بعد كدة هتلاقي إن الأعراض بدأت تختفي في العشرينات👩🦰
* ملحوظه:- لو الإضطراب ابتدأ في سن الرشد 🧔في إحتمالات كتيرة إنه يكون مزمن
بالنسبة لعلاج خلل النوم دة؟ 💊
العلاج الدوائي:
مش في معظم الأوقات بنحتاج للعلاج الدوائي وخصوصا لو كانت في الأطفال لكن بيكون أهم حاجه في الموضوع إننا نأمنهم من إنهم يتعرضوا لأذى أو يعرضوا الأخرين لأذى ولو احتاجنا لدواء فبتبقى بعض أنواع العقاقير زي الفاليوم او الفلورازيبام قبل النوم💊
العلاج النفسي🧾:
وبيكون مع البالغين وبيتم من خلاله محادثة الشخص عن الظروف الحالية اللي بيمر بيها ومحاولة للتكيف معاها عن طريق الاستراتيجيات العلاجية
النوع التالت من الإضطراب ده ..
اضطراب الفزع أثناء النوم : sleep terror Disorder
كتيير أوي ممكن نشوف ناس حولينا بتصرخ😨 جدا فجأة وبدون أي مقدمات أثناء النوم …دة ممكن ده كمان يكون بيحصل معانا احنا شخصياً علي الرغم ان أحيانا مانكنش حلمنا بأي حلم أو أي كوابيس عشان تحصل النوبة 😑 دي من الهلع والصراخ ..
هو ده بالظبط معني الإضطراب ده 💁
وبتكون أعراض الشخص وقتها؟ 🙄
إنه قاعد علي السرير خايف جدا وعلامات الخوف ظاهره عليه زي اتساع العين والعرق الكتير، سرعة النفس، سرعة ضربات القلب ومهما حاولنا إننا نهديه مش بيستجيب لأي محاوله وممكن تفضل النوبة دي من 10 ل 15 دقيقة، وفي الغالب الشخص ده أما بيصحي من النوم الصبح بينسى اللي حصله 🤕
أسباب النوبة دي؟ 🥺
هنلاقي ان النوبة دي بتحصل كتير لو كان الشخص مجهد أثناء يومه أو بيعاني من ضغوطات شديدة عليه 🙇
طب إيه هو مال ومسار الإضطراب دة؟ 👉
– هنلاقي إن عادة بيبدأ في الطفولة 👼من سن 4-12 سنة ..وممكن كمان يجي للكبار في سن العشرينات والتلاتينات 🙎 ..وقليل أوي لو بدا بعد سن الأربعين🧓
– هنلاقي إن في تفاوت في مسار الإضطراب بمعني إنه ممكن يحصل في كل ليلة، أو ممكن تحصل علي فترات طويلة نسبياً توصل لأسابيع😐
– كمان الإضطراب ده في حالات الأطفال بيختفي تلقائيا لما بيوصلوا لسن المراهقة ،
أما بقي لو بدأ في سن الرشد فبيكون في إحتمالية إنه يكون مزمن😔
طب ايه هو علاج خلل النوم دة؟ 💊
العلاج الدوائي:
نادراً مابيحصل تدخل بالعلاج الدوائي بس لو لزم الأمر بيتم إعطاء دواء زي الفاليوم او الفلورازيبام بجرعات قليلة قبل النوم🥱
العلاج النفسي🧾:
لو الحالة في سن بالغ بيتم عمل جلسات للعلاج النفسي لفهم ظروف الشخص ده النفسية والاجتماعية ..ونعرف إيه الضغوط النفسية اللي بيمر بيها وبيعيشها ..ووقتها بيتم التدخل ومساعدته للتغلب علي الضعوط دي🗣️
أما لو الحالة دي حصلت في الأطفال لازم الأم تهدي من طفلها وتحسسه بالأمان ويتم احتضانه عدة مرات علي مدار اليوم👌
النوع الرابع من الإضطراب ده اسمه
اضطراب الكوابيس الليلية : Nightmare Disorder
هنا بقي هلاقي الشخص بيصحى كتير اثناء نومه بسبب إنه بيحلم بكوابيس وبأحلام مخيفة جدا👺 ومرعبة وبيحس كأنه عاشها أثناء نومه 😴 ..وطبعاً دة بيسبب له خوف وقلق وعدم إحساس بالأمان😵
و دة بيكون بسبب الضغوط النفسية اللي بيتعرض ليها الشخص ده 🤢..
طبعا كلنا حلمنا بكوابيس قبل كده وممكن الكابوس ده يفضل معلم في نفسيتنا أيام وأسابيع .. فتخيلوا بقى حد يكون ده الاضطراب بتاعه وبتكون الكوابيس متكررة عليه بصورة متكررة جدا
طب امتي بتحصل النوبة دي؟ 🙄
وبتحصل خلال فترات النوم المصحوب بحركة العين السريعة، وفي العادة بيكون بعد فترة طويلة منه ..(REM) الكوابيس دي ممكن تحصل في أي وقت بالليل .. وممكن كمان تزيد مع نهاية النوم😴
أما الأعراض الي بتظهر علي الشخص بتكون..🧐 .
هنلاقيه أول مايصحى من النوم فايق جدا، خايف تماماً، بيحكي الكابوس بالتفصيل ، وكمان مش بيعرف ينام تاني بعد الكابوس ده 🥺
طب إيه مال ومسار خلل النوم ده ؟؟🤔
هنلاقي أكتر من نصف الحالات بيدأ قبل سن العشر سنوات ، وتلت الحالات يبدأ قبل سن العشرين وبيكون 60٪ منهم بسبب الضغوط النفسية😑 …
وفي الغالب هنلاقي الأحلام بتتكرر 3 مرات أسبوعياً ، وهلاقي الاضطراب دة بيختفي تلقائيا عند الأطفال ، وبالنسبة للبالغين بيفضل عندهم لسنين طويلة😔
العلاج النفسي:
و ده عشان نفهم ديناميات اللاشعورية اللي الكابوس ده ناتج عنها، لأنه أوقات بيكون عقاب للنفس نتيحة شعور الشخص دة بالذنب.. وفي بعض الأحيان ممكن نحتاج لبعض الأدوية 😔😔
النوع الخامس من الإضطراب ده..
اضطراب السلوك خلال النوم المصحوب بحركة العين السريعة
طب امتي بقي أقول إن الشخص ده بيعاني من النوع ده ؟؟🤨
– هلاقي بشكل متكرر الشخص دة بيصحي من النوم وبيعمل سلوكيات غريبة زي إنه يتكلم أو يعمل حركات غريبة🙄
– كمان هلاقي إن السلوكيات دي بتحصل مع حركة العين السريعة ( REM)
وعشان كدة هنلاقيها عادة بتحصل في بداية النوم بعد حوالي ساعة ونص من بداية النوم ، وممكن كمان نلاقيها أكتر في الجزء الاخير من النوم ، وقليل اوي إنها تحصل في النوم اثناء النهار🌞
– كمان لما الشخص يتخلص من النوبات دي يكون في كامل وعيه😲
– عادة النوع ه بيجي للأشخاص اللي بتعاني من اضطرابات عضوية زي مرض باركنسون أو تلف الأجهزة المتعدد 😞
النوع السادس من الإضطراب ده..
لزمة الأرجل غير المستريحة
: Restless legs syndrome
-دة بيكون عبارة عن رغبة الشخص أثناء نومه بتحريك رجله 🦵وبتكون رغبة ملحة بشكل كبير👀
-ونبلاقي فيه إن الشخص بيحس بالتحسن لما يستجيب للرغبة دي ويحرك رجله سواء بشكل كلي أو بشكل جزئي🤦
– كمان هتلاقي إن الإلحاح في إن الشخص يحرك رجله بيزيد في الليل🌑 أكتر من إنه لو نام بالنهار 🌕، أو ممكن نلاقيه بس بيحصل للشخص في الليل🌑
طيب إيه أسباب لزمة الأرجل غير المستريحة ؟؟
– كتير بتحصل المشكلة دي مع بعض الأمراض العضوية زي مشاكل السكر أو بعض مشاكل الكلى أو مع الحمل
– عادة بتظهر المشكلة دي مع نقص الحديد
طيب ازاي نعالج خلل النوم ؟؟
بيكون مهم ندي بعض جرعات الحديد كمان بعض المركبات بتساعد في التحسن زي الجرعات البسيطة من البنزوديازيبين ومحفزات الدوبامين
وفي النهاية .. لو حابب تعرف أكتر عن الموضوع ده تقدر تتفرج على الفيديو .. ولو حضرتك بتعاني من المشكلة دي أو أي مشكلة نفسية تانية تقدر تستفسرمن خلال صفحتنا.. أو تقدر تتواصل معنا من خلال أرقامنا وتزورنا في أقرب فرع ليك
إعداد : أستاذة / إيمان محمد
مراجعة : د/ حاتم صبري
- الطفل الأناني
- سلوكيات أطفالنا السيئة
- صفحتنا علي فيس بوك
0 تعليق