هنتكلم في الموضوع ده عن اضطراب نفسي مهم و منتشر جدااا ..ويمكن يكون من أشهر الاضطرابات النفسية اللي بتجيلنا في عياداتنا وبيعاني منها ناس كتير خصوصا الولاد في سن المراهقة 🚶‍♂️ ..

للأسف الاضطراب ده ممكن يكون من أصعب الاضطرابات النفسية اللي ممكن يعاني منها أي إنسان 😱..

مريض النهارده ممكن يفضل سنين بدون مبالغة بيعاني من الاضطراب ده و مش بيقدر يعلن عن مشكلته لإنه خايف إن ماحدش يصدقه أو خايف إن الناس تقول عليه إنه فقد عقله 😱!!
بالإضافة للمعاناة اللي بيشوفها مريضنا مع الاضطراب ده ..احنا بنلاقيه كمان ياعيني بيضيع كتير جدااااا من وقته في التفكير و في الممارسة لدرجة ممكن تخليه إنه مايركزش في دراسة أو شغل أو إنه يدخل حتى في علاقات جديدة 😭!

في الموضوع ده هنتكلم عن اضطراب نفسي تقريبا كلنا سمعنا عنه قبل كده و هو (اضطراب الوسواس القهري)

طب يعني إيه الوسواس القهري ده 🤔؟؟

مبدئيا عشان نفهم الاضطراب ده أكتر لازم نبقي عارفين نفرق بين حاجتين مهمين اللى هما ✌️.. الوسواس والأفعال القهرية

الوسواس ده بكل بساطة عبارة عن أفكار ملحة بتيجي للشخص بشكل مستمر و بتفضل معاه معظم الوقت و بتكون متكررة كل دقيقة و كل لحظة و المريض بيكون مش قادر يتخلص من الوسواس ده أبدا ..
الأفكار دي بتكون مش منطقية خاااالص والشخص عارف إنها مش منطقية ، وطبعا مش بيكون الشخص مبسوط بيها ولا راضي عنها ، المشكلة هنا الأكبر أنه كمان مابيكونش قادر يسيطر عليها كأنه ياعيني متكتف وبيكون قلقان جدا بسببها😢😪.

أما الأفعال القهرية فدي معناها إن الشخص بيخرج منه سلوك معين بصورة متكررة وبيكون مجبر على إنه يعمله علشان يحاول يهدي الأفكار الوسواسية بصورة مؤقتة 😲😢.

طيب هل ده معناه إن الفرد لما بيعمل السلوكيات أو الأفعال القهرية بيرتاح ..والفكرة الوسواسية بتختفي 🤔؟؟

ااااه بيرتاح بس فتره مؤقته جدااا تكاد تكون دقايق معدودة أووووي.. و للأسف بترجع الفكرة الوسواسية أقوى وأكتر من الأول ، مش بس كده ، لا ده كمان الشخص بيلاقي نفسه في دايرة مفرغة .. بمعني إن كل فكرة وسواسية بتجيب فكرة وسواسية تانية وكأنها سلسلة من الأفكار مابتخلصش وبالتالى بيزيد قلقه وتوتره 😥😢.

✅ لازم كمان نكون فاهمين إن كلنا عندنا وساوس !!

ااااه كلنا عندنا وساوس .. بس مشكلة المريض ده بتكون في أربع حاجات ..وهى دي الحاجات اللى على أساسها ممكن أعرف أفرق بين الشخص اللى عنده اضطراب الوسواس القهري ومحتاج مساعدة والشخص الطبيعى اللى ماعندوش مشكلة 🤔.

1- إن الفكرة الوسواسية عند الشخص اللى عنده الوسواس القهري بتكون متصاعدة بتبدأ صغيرة وتفضل تكبر وللأسف مش بتخلص ، بل بالعكس ديه كل يوم بتزيد أكتر من اليوم اللي قبله🥵.

2- إن الشخص بيكون مش قادر يوقفها و كمان مش بيقدر يقاومها 😑.

3- بتعطل حياته اليومية بشكل غير طبيعي ، زي مثلا بيتأخر علي مواعيده ، أو يأثر علي مذاكرته بإنه مايذاكرش .. و ممكن توصله إنه مايدخلش الامتحانات و يفضل يعيد السنه في 5 سنين لحد ما يتعب خالص 🤕

4- طبعا بعد كل ده أكيد الشخص بيكون مش مبسوط ولا سعيد في حياته عشان هو مش عارف يعيش حياته زي باقي الناس ..هو مركز في أدق أدق التفاصيل و ده طبعاً بيخليه طول الوقت حاسس بقلق و توتر شديد اووووي 😳

علشان كده لو لقيت عندك أو عند حد قريب منك الأفكار الوسواسية دى ومعاها الأربع حاجات اللى قولناهم يبقى ضروري نطلب المساعدة في أقرب وقت.🩺

طيب إيه أنواع الوساوس اللي عادة الناس بتيجي تشتكيلنا منها في عياداتنا 🤔 ؟؟
الوساوس بتيجي بأشكال كتيرة منها 😕:

1- وسواس النظافة 🧹🧽🧻🛀 :

وده من أشهر الوساوس واللي بيكون فيها الشخص حريص جداااا على نظافته و نظافة المكان اللي حواليه و بيهتم أوووووي بالتعقيم و التطهير بشكل أوفر أوووووي..
اللي عنده الوسواس ده دايما بيكون عنده فكرة إن الحاجه مش نظيفة أو مااتغسلتش كويس .. وطبعا الفكره ديه بتحرك مشاعره السلبية فبيكون قلقان و متوتر إن الحاجه تكون مش نظيفة و هيحصله تسمم فيفضل يغسل الحاجه كتير أوي.
طب زي إيه ؟!
شخص بيخاف يسلم علي حد عشان لو سلم عليه إيده هتكون مش نظيفة و هيكون كلها جراثيم و بكتريا و هتتنقل في جسمه كله.. و بيفضل يغسل إيده كتير أوووي و بردوا بتكون الفكرة لسه مسيطرة عليه ، لا كمان ديه بتزيد لحد ماتجيله فكرة إن لازم يغسل إيده بديتول أو كلور مثلا ..
(كتير بنلاقي الشخص ده لما بيجلنا العيادة ونشوف إيده بنلاقي جلده مهري أوووووي )
أو مثلا بنوتة بتكون مش عاوزة حد يجي يزورها في البيت عشان لو حد دخل البيت عندها ، البيت كله هيكون مش نظيف ..ولو اضطرت تستقبل ضيوف هنلاقيها أول مايمشي الضيوف تفضل تنظف في كل حته قعدوا فيها و حتى كمان في الأماكن اللي ماقعدوش فيها ..و ياعيني تفضل طول حياتها محبوسة في البيت بتنظف بس ..و بردوا مش بتكون مرتاحة و مش هتبقي مرتاحة بسبب الفكره الملحة ديه اللي مش بتعرف تتخلص منها 😇

أقولكم علي سر ..
هما بيكونوا عارفين إن الحاجه نظيفة بس مش قادرين يصدقوا ده ومش قادرين يقاوموا وسواسهم ،
طب إزاي ؟!!
هنعرف ده في آخر المقال 😉😉

2- وساوس دينية 🕌⛪️ :

كمان ممكن يجي الوسواس في الدين !!
ااااه في الدين زي مثلا إن ممكن تجيله فكرة إنه بيشتم ربنا، الفكره ديه بتكون ملحه عليه أوووي فتجبره إنه يشتم ربنا أو على الأقل بيحس بالذنب بسبب إن الفكرة دي جت في عقله ويفضل يأنب نفسه ويكون شايف نفسه إزاي هو إنسان سيء وغير مؤمن كده .
أو ممكن تجيله فكرة إنه صلى الظهر أوالعصر أو العشاء مثلا 3 ركعات أو إنه ماقالش تكبيرة الإحرام أو التشهد أو الفاتحة ..
وإن ده معناه إن ربنا مش هيتقبل صلاته و نتيجه الفكرة ديه بيقرر يعيد صلاته كذا مره وفي كل مرة يشك .. وده بيوصل ببعض الناس إنه ممكن يفضل بالساعات في الصلاة الواحده 😇
و كذلك الوضوء لما بيجي يتوضي بيكون عنده فكرة مسيطرة عليه إنه نسي يغسل عضو أو ماتوضاش صح أو إنهم نقضوا وضوئهم فيفضل أكتر من ساعتين يتوضي لحد مايروح عليه الصلاة أو ممكن يوصل بيه الحال إنه مايصليش أصلا ..
أو مثلا ممكن تجيله الفكرة في إنه يحس إنه مش طاهر وإنه لازم يغتسل ويفضل قاعد ساعات بيتطهر ويحس برده إنه ما اتطهرش من الجنابة 🛀
ساعات كمان الوسواس الديني يجي تصور الذات الالهية بصورة غير مناسبة و نتيجه الفكرة الملحة ديه بيقعد يتخيل الصور ديه ويكون مش قادر يوقفها وده طبعا بيخليه متضايق وحاسس بالذنب جدا

3- وساوس جنسية 🙈 :

ساعات بقى الوسواس بيجي في صورة أفكار جنسية زي مثلا ..تجيله صورة إنه يحس إنه بيتحرش بالبنات في الشارع رغم إنه مش بيقرب منهم خالص 🙀 ..وده بيخليه يبدأ يعمل سلوك قهري بأنه مايتعاملش مع بنات خالص ويتجنب يمشي في أي مكان فيه بنات أو ممكن تجيله فكرة إنه عنده شذوذ جنسي بالرغم إن ميوله الجنسية طبيعية جدا وده بيخللي سلوكه القهري إنه يبدأ يتجنب النزول و التعامل مع الأفراد اللي من نفس جنسه أو يسلم حتى عليهم 🤝

4-وساوس الفحص و التكرار 🧮:

زي مثلا إنه يفضل يعد السلالم أو يعد عمدان النور ومش بيستريح غير لما يعمل كده … أو لما يجي ينام لازم يتأكد إنه قفل باب الشقة والبوتاجاز والغاز.. هو بتجيله فكرة إنه ماقفلش الحاجه ديه، فالسلوك القهري بالنسباله إنه يقوم كل شويه يتأكد من إن باب الشقة والبوتاجاز والغاز مقفولين
والفحص ده ممكن يوصل ل 20 مرة بيتأكد لحد مايتعب وبيكون للأسف مش قادر يقاوم الفكرة ولا السلوك

5- الوساوس العداونية 🤺:

بيحس فيها الشخص بقلق شديد من فكرة إنه ممكن يأذي حد أو يعوره أو يرمي حد يقربله من الشباك ، وممكن يجي الوسواس على شكل صور متكررة لأحداث عنيفة.

6- وساوس خرافية غير منطقية 🛸 :

ساعات ممكن يظهر الوسواس في شكل اعتقاد إن حاجات معينة ممكن تجيبله الحظ أو النحس زي أرقام معينة أو لبس معين أو أشخاص معينين . زي مثلا لما يلبس الطقم ده يبقي يومه مليان بالكآبة و الحزن أو أول ما ينزل من البيت و شاف قطة سودا يبقي خلاص يومه وحش

7- وساوس التخزين والأحتفاظ بالأشياء🚯 :

كمان بنلاقي بعض الأشخاص مش بيبقوا قادرين يتخلصوا من أشياء قديمة ملهاش أى قيمة بحجة إنهم ممكن يحتاجوها بعدين، فتلاقي بيتهم مليانه بكراتين كتيرة أوووي وفي الآخر بتكون فاضية ملهاش آي لازمة.

8- وساوس التدقيق والترتيب والتماثل :

بيجي في شكل إهتمام شديد جدااا ورغبة للشخص بأنه يعمل الأشياء بالترتيب والتوازي زي صف الزجاجات والعلب على حسب الحروف الأبجدية مثلا أو حسب الحجم أو اللون ، أو ترتيب اللبس في مكان معين من الدولاب مش بيتغير وبطريقة معينة وبيستمر الشخص في ممارسة ده مهما كلفه من وقت وجهد.

✅طبعا نتيجة للوساوس دي بتكون ظاهرة بوضوح السلوكيات القهرية زي إن الشخص يفضل يفحص الحاجه كذا مرة ..أو يغسل الحاجه أو يغسل إيده أو جسمه كذا مرة .. أو يعد الحاجات كذا مرة

✅ مرضي الوسواس رغم إن معظمهم بيكونوا أشخاص محافظة ومتدينة ومستوى ذكاءهم كويس إلا انهم عندهم أسباب هى اللى خلتهم يعانوا من المشكلة ،

ياتري إيه هى الأسباب دى 🤔 ؟؟.
هو ده السر 😉
تعالوا نشوف السر مع بعض 😉🙂

1. الجانب الوراثي : الوسواس القهري واحد من الأمراض اللي بيكون ليها جانب جيني ووراثي بصورة واضحة

2. الأسباب العضوية : واحد من أهم الأسباب هي نقص السيروتونين في المخ وده بيأثر في التفكير والسلوك.

3. الأسباب البيئية : منها إن يعيش الشخص مع أب أو أم عندهم مشكلة الوسواس القهري فبيكتسب منهم الطقوس الوسواسية

4. نتيجة أساليب التربية الشديدة وعدم التساهل في الأخطاء و ده بيخلي الشخص أكثر إحساس بالذنب و ماعندهوش ثقة بنفسه.

5. التعرض للعديد من الضغوط والخبرات الوجدانية وده اللي بيزيد من قلقه وتوتره.

طب إزاى بنعالج المريض اللى بيعاني من الوسواس القهري 🤔؟؟

1. العلاج الدوائي :
من خلال أدوية معينة بيتم أخذها تحت إشراف الطبيب والتى تعمل على زيادة نسبة السيروتونين .

2. العلاج النفسي :
وبيعتمد على العلاج المعرفي السلوكي ، وبما اننا قولنا إن المشكلة لها جانبين جانب خاص بالوساوس و بالافكار والجانب التاني خاص بالأفعال القهرية
فعلاجنا هيكون شامل الجانب المعرفي في التعامل مع الأفكار ومساعدته على فهم طبيعة المرض ، والجانب السلوكي في التعامل مع الأفعال والسلوكيات القهرية من خلال تدريبات سلوكية معينة.

3. بعض العلاجات التحليلية بيكون ليها دور مهم جدا ورائع في العلاج من الاضطراب ده

وفي النهاية لو حابب تعرف أكتر عن الاضطراب ده تقدر تشوف الفيديوهات اللي في نهاية الموضوع ..
و لو حد عزيز عليك بيعاني من المشكلة دي أو أي مشكلة نفسية تانية فتقدر تتواصل معانا من خلال صفحتنا وهيرد عليك حد متخصص .. أو تقدر تتواصل على أرقامنا وتزورنا في أحد فروعنا وهتلاقي فريق متخصص تحت أمر حضرتك 😍

إعداد : أستاذة / دعاء محمود

مراجعة : د / حاتم صبري