اضطرابات الشخصية
طيب في البداية كده يعني إيه اضطرابات الشخصية 🤔 ؟!
في البداية كده قبل ما نعرف أنواع إضطرابات الشخصية لازم نعرف في الأول يعني إيه شخصية وايه الحاجة اللي بيحصل فيها إضطراب أصلا ؟؟🧏🧏
مبدئيا شخصية الانسان دي عباره عن مجموعة أنماط من تفكيرنا وإدراكنا ومشاعرنا وتصرفاتنا اللي بتتكون معانا من سن البلوغ ومرحلة المراهقة وبتفضل معانا طول عمرنا وبنتعامل بيها في كل أوجه حياتنا 🧐
إذا لما نقول اضطراب في الشخصية فده معناه ايه ؟!
معناه إن حصل خلل في طريقة التفكير والإدراك أوحصل اضطراب في المشاعر وبالتالي في تصرفات الشخص المصاب ده وأثر عليه في أوجه حياته خصوصا في نظرته الذاتية لنفسه وعلاقاته الاجتماعية وشغله أو دراسته وهو ده اللي بنطلق عليه إضطراب في الشخصية 🤯
للاسف في معظم إضطرابات الشخصية بيكون الشخص مش مدرك دوره في مشكلاته اللي بتحصل وده طبعا بيخليه مابيطلبش المساعدة غالبا لإنه بيبقى فاكر إن مفيش مشكلة في طريقة تفكيره وتحليله للمواقف..
يمكن السبب الوحيد اللي يخللي صاحب اضطراب الشخصية بيفكر يطلب المساعدة هو لو بدأت تحصل مشكلات كبيره في حياته زي الطلاق أو الإحساس الشديد بالوحدة وعدم الدعم أو تعاطي مواد مخدرة …أو حصل مشكلة إضطراب مزاجية زي الإكتئاب أو القلق أو غير..
لكن علشان نكون متفقين فمعظم الوقت اللي بيخللي الشخص اللي بيعاني من اضطراب الشخصية يلجأ للطبيب هو رضوخه لضغط اللي حواليه وده لإن اللي بيعاني من إضطراب شخصيته هو الناس اللي حواليه !!
طيب هل اضطرابات الشخصية بتحصل أكتر في الرجالة ولا البنات ؟؟
الاضطرابات دي نسبة حدوثها في الجنسين موجودة ولكن في اضطرابات بتكون مشهورة أكتر في الرجالة واضطرابات تانيه بتكون مشهورة أكتر في الستات 💃..
طيب هل الدواء له دور في تحسينها ؟!
خلينا نكون متفقين إن مافيش حاجه اسمها شخصية بتتغير أو بتتعالج من خلال دوا … الدواء هو مجرد حاجه بتقلل حدة الأعراض المصاحبة للاضطراب لكن مش بيعالج👨🔬
العلاج الأمثل هو جلسات العلاج النفسي طويلة المدى 👏👏
يكفي اننا نقول ..علشان شخص يغير عادة ليه فده بياخد وقت .. فتخيلوا بقى اننا نغير حاجات كتير في شخصيته !!
طيب إيه هي أنواع اضطرابات الشخصية المعروفة ؟؟
كتب الطب النفسي بتقسم أنواع الاضطرابات الشخصية لثلاث مجموعات رئيسية كل مجموعة من المجموعات دي بيكون فيها أنواع متشابهة تقريبا في خصائص أساسية ولكن مع بعض الإختلافات …
أول مجموعة عندنا هي مجموعة (أ)
ودي بتكون مميزة بالتفكير الغير عقلاني غريب الأطوار والانعزالية والشك الدائم ودي بيكون فيها 3 أشكال من أشكال اضطراب الشخصية وهي :
الشخصية المرتابة – الشخصية الشبه فصامية – الشخصية الفصامية
تاني مجموعة (ب)
واللي بيبقى في أصحابها تفكير وسلوك درامي أو انفعالي مفرط وغير متوقع .. ودي بيكون فيها 4 أشكال من أشكال اضطراب الشخصية وهي :
الشخصية الهيستيرية – الشخصية الحدية – الشخصية النرجسية – الشخصية المضادة للمجتمع
تالت مجموعة (ج)
واللي بيبقى في أصحابها تفكير وسلوك قلق أو متخوف .. ودي بيكون فيها 3 أشكال من أشكال اضطراب الشخصية وهي :
الشخصية التجنبية – الشخصية الوسواسية – الشخصية الاعتمادية
وفي النافذة دي إن شاء الله هنناقش كل نوع من أنواع الشخصيات دي بالتفصيل .. وهنعرفكم كمان ازاي نتعامل معاها
إعداد : د/ عمار أنور
مراجعة : د/ حاتم صبري
