ADHD: نقص الإنتباه وفرط الحركة

كلامنا في الموضوع ده هيكون عن اضطراب نفسي بيكون عادة في الأطفال ومن المؤكد إن كتير منا سمع عنه قبل كده !!

الاضطراب ده غريب بعض الشيء في تعامل الناس معاه على مدار السنين 🤭 ..

بمعنى إن زمان كانت الناس بتشوف إن مافيش حاجه اسمها الاضطراب ده وإن كل الموضوع هو عبارة عن طفل شقي بس زيادة حبتين وبالتالي ماحدش كان بيطلب لطفله المساعدة 😱

أما بقى دلوقتي فبقى كتير من الناس ممكن يقرروا يطلبوا لطفلهم المساعدة على أساس إنه بيعاني من الاضطراب ده رغم إنه بيكون شقي شقاوة طبيعية..
ويمكن علشان كده في أوقات كتير بيهمنا رأي المدرسين لإنهم بيكونوا عارفين كويس الفرق بين الطفل الشقي بصورة طبيعية واللي بيعاني من مشكلة👩‍🏫👨‍🏫 في الموضوع ده هنتكلم عن اضطراب نقص الانتباه وفرط الحركة ADHD

طب يعني إيه بقي نقص الانتباه وفرط الحركة 🤔؟!

اضطراب نقص الانتباه وفرط الحركة من اسمه كده واضح إن المشكلة بتكون في جانبين مهمين عند الطفل وهما الانتباه الناقص والحركة الزيادة أوي 😇.

ازاي يعني 🤔؟!

يعني ببساطة بنلاقي الأطفال دول عندهم يا إما مشكلة في نقص الانتباه ..

أو مشكلة في فرط الحركة والاندفاعية ..

أو المشكلة بتكون في الحاجتين في نفس الوقت يعني تلاقي الطفل عنده مشكلة في نقص الانتباه وفرط الحركة مع بعض 😱

طيب يعني إيه نقص الانتباه ؟؟ 🤔

ببساطة كده نقص الانتباه معناه إن الطفل بيفشل في توجيه انتباهه أو يقظته للمثيرات بدرجة كافية ، وبالتالي مش بيكون قادر يفهم ولا قادر يستجيب للمثيرات دي .
أما فرط الحركة فده معناه إن الطفل بيتحرك بمعدل أكثر من الطبيعي وبشكل مستمر وفي بيئات أو أماكن مختلفة.

طب ما كل الأطفال بتتحرك بزياده .. ايه المشكلة يعني😕🤔؟؟

لازم نعرف نفرق بين شقاوة أطفالنا العادية وشقاوة الطفل اللى عنده الاضطراب ده ، طب افرق بينهم ازاي🤔؟!!

 

 

الدليل التشخيصي الإحصائي وضح لينا مجموعة من العلامات اللى لو ظهرت لينا نقدر نقول إن الطفل عنده مشكلة نقص الانتباه أو مشكلة فرط الحركة أو الاتنين مع بعض .

إيه هى العلامات أو الأعراض دي واللي بنشوفها عادة في معظم الأطفال اللي بيعانوا من المشكله دي وبيزورونا في عياداتنا 😔🤔؟!

أولاً : نقص الانتباه

1-فشل الطفل في إنه يدي انتباه بشكل كامل للتفاصيل ، وبالتالي بنلاقي أخطاء في الأداء المدرسي أو أى نشاط يومي بيقوم بيه💁.

2-هو مش بس بيكون مش قادر ينتبه ، ده كمان مش بيقدر يحافظ على انتباهه في أى مهام بيقوم بيها (زى مثلا لما يكون قاعد في الحصة فمش بيقدر ينتبه بشكل مستمر للي بيتشرحله في الفصل)

3-تحس وانت بتتكلم معاه انه مش سامعك وأنه سرحان🔇🤐.

4-ما بيقدرش يلتزم بالتعليمات اللى بتتقاله

5-تلاقي عنده مشكلة في ترتيب مهامه ، زي انه مابيكونش قادر يحافظ على الأشياء بشكل مرتب.

6-كمان كتير بتلاقيه بيتجنب أو يكره إنه يشارك في نشاط بيحتاج مجهود ذهني بشكل متواصل زي الواجبات مثلا📚📄.

7-يفقد أدواته أو ممتلكاته الخاصة كتير✏️ .

8-تركيزه بيتشتت بسرعه جدا من أى مؤثر خارجي🧘.

9-بينسي كتير جدًا🧘‍♂️.

لازم نبقي فاهمين عشان نقول إن الطفل ده عنده مشكلة في نقص الانتباه إن يكون متوفر ستة أو أكثر من الأعراض اللى قولناها وتكون استمرت 6 شهور على الأقل ، واثرت على نشاطه الاجتماعي والدراسي، وتكون في مكانين أو أكتر زي البيت أو المدرسة أو العيادة أو النادي

ثانيَا : فرط الحركة

1-قليل الصبر وبيخبط بإيده أو رجله ، فتشوفه مش قادر يقعد على كرسي فترة طويلة ولو قعد يفضل يحرك إيده ورجله🥲.

2-بيجري ويتنطط في أماكن ما ينفعش يعمل فيها كده ومش بتقدري تسيطري عليه🏃‍♂️.

3-كتير ما بيسيب كرسيه في مواقف من المتوقع إنه يستمر في الجلوس زي الفصل المدرسي مثلا🪑.

4-مابيعرفش يلعب بهدوء ودايما بيزهق من الألعاب بتاعته وعايز يغيرها🎯.

5-دائم الحركة وغير مستقر كأنه بيعمل بموتور🏍.

6-بيتكلم كتير جدًا🤭.

7-بيجاوب على الأسئلة بسرعة قبل ما يسمعها كويس✋.

8-ما بيعرفش يستني دوره وعنده مشكلة في الانتظار عمومًا👩‍🏫.

9-بيقاطع أو بيقحم نفسه في أنشطة الآخرين أو في حواراتهم وألعابهم ⁉️

وزي ما وضحنا إنه عشان نقول إن الطفل ده عنده مشكلة في فرط الحركة والاندفاعية مهم جدًا ، إن يكون متوفر ستة أو اكثر من الأعراض اللى قولناها وتكون استمرت ستة شهور على الأقل ، وأثرت على نشاطه الاجتماعي والدراسي.

ثالثًا : نقص الانتباه وفرط الحركة (النوع المركب) لو وجدت الأعراض السابقة لكل من نقص الانتباه وفرط الحركة واستمرت لمدة ستة شهور على الأقل ، ده معناه إن الطفل عنده المشكلتين وهما نقص الانتباه وفرط الحركة مع بعض.

طيب إيه نسبة انتشار الاضطراب ده 🤔؟؟

دراسات كتير اختلفت على نسبته الفعلية وده اللي خلى النسبة بتكون متفاوتة وبتتراوح ما بين (4 – 20 %) بين الأطفال في سن المدرسة الابتدائية.

ليه لازم نعالج اضطراب نقص الانتباه وفرط الحركة 😉🤔؟!

أكتر سؤال مشهور بتسأله أمهات الأطفال اللى بيعانوا من اضطراب نقص الانتباه وفرط الحركة ليا...

يا دكتور كل الناس بتقوللي ابني مش محتاج علاج وهو كده كده هيتحسن ...

ايه رأيك يا دكتور في الكلام ده🤔؟؟

مع معظم الأطفال فعلا فرط الحركة بيقل أو بيختفي تماما لما الطفل بيكبر ، ومع ذلك برده لازم ابنك يتعالج حتي لو الأعراض دي هتروح.


طيب ليه يا دكتور🤔؟؟

عشان لو احنا ماعالجناش المشكلة دي ممكن يحصل حاجة أو اكثر من العواقب الآتية😟😢 :

1-لما الطفل يحس إنه أقل من اللى حواليه والمدرسين بتوعه ومامته وباباه وكل اللى حواليه شايفينه ولد شقي وفاشل وطول الوقت بيعمل مشاكل ومش بيحبوه فده بيقلل من ثقته وتقديره لنفسه 😰.

2-كمان نتيجة قلة تقدير الطفل لذاته بيسبب قصور في الانتباه والفهم ، فده بيحطه في موقف محرج قدام الآخرين ، وده ممكن يعرضه للتنمر من أصدقائه ، وبالتالي مشاكل في علاقته بالناس😜.

3-كل ده ممكن يؤدي به في مرحلة المراهقة من إنه يعاني من اضطراب المسلك 🥷.

4-لو أعراض الإندفاعية استمرت مع ابننا ومش بنعالجها بصورة سليمة ممكن تؤدي لا قدر الله إنه يتعرض لحوادث نتيجة إندفاعيته ♿️.

5-كمان مشاكله مع نفسه ومع الآخرين ومع اندفاعيته الشديدة فده بيخليه معرض أكثر للادمان لما يكبر 💉.

6-مشاكل في التحصيل الدراسي ، فلو الطفل ما استفادش بصورة كويسة في مرحلة التعليم الأساسي بتضيع الفترة دي منه بدون أي استفادة وده بالتأكيد هتأثر على مستواه التعليمي طول العمر ..وده رغم إن طفلنا ممكن يكون مستوي ذكائه أعلى من كل اللى حواليه🙇🙇‍♀️.

7-كمان لإننا قولنا إن الطفل ده بيكون غير صبور فبيبقي عايز طلباته تتحقق في الحال وبسرعة ، وبالتالي فهو سريع الإحباط واليأس في حالة عدم تلبية طلباته بشكل سريع.


يا ترى ايه هى الاسباب🤔 ؟!

1-الاسباب البيولوجية : بمعنى إن الدراسات أثبتت إن بيكون عند الطفل مشاكل في المناطق الدماغية المسؤولة عن النشاط والانتباه.

2-الأسباب الوراثية : بينتقل الاضطراب ده من جيل لجيل بعده وكتير من الأمهات بنلاقيها بتقولنا أنا عرفت من حماتي إن باباه عنده نفس المشكلة👨‍👦.

3-تدخين الأم خلال الحمل أو استعمال مواد تسبب الأدمان🚭.

4- الأسباب النفسية : زي عدم استقرار الأسرة زي المشاكل الأسرية والطلاق أو مشاكل الأسرة المادية

طب ازاي بنعالج الأطفال اللي بيعانوا من الاضطراب ده في عياداتنا 🤔؟!

الحل بيكون اننا نعالج المشكلة دي بسرعة وده بيكون عن طريق : -

1-العلاج الدوائي 💊واللي بيكون فيه بعض المحفزات اللي بتخللي مستوى انتباه وتركيز الطفل أفضل وبالتالي بتقل حركته لما انتباهه بيتحسن .. وساعات مع فرط الحركة الشديد ممكن نلجأ إننا نديه بعض الأدوية اللي تساعد في تقليل حركة الطفل وتحسين اندفاعيته 👏

2-جلسات تعديل السلوك🤫 وتحسين مستوى الانتباه والتركيز وده بيعتبر حجر الأساس لعلاج الطفل واللي بنمارسه على مدار شهور لحد مايبقى الطفل قادر يتحكم في حركته وفي انتباهه بصورة جيدة .

✅ عادة مش بنلجأ للتدخل العلاجي غير مع الأطفال اللي مش بيكونوا قابلين للتعديل السلوكي نتيجة لحركتهم الزيادة أو رغبة من الأسرة في إن انتباه الطفل يتحسن بسرعه نتيجة لشكاوى البيت أو المدرسة

✅مع الحالات الشديدة بنلجأ عادة للعلاج الدوائي والسلوكي مع بعض علشان نوصل لأفضل تحسن وبعد وصول الطفل لمرحلة مناسبة في علاجه السلوكي بيتم وقف العلاج واللي بتفضل توقفه في الاجازة الدراسية

3-ممارسة الرياضة بشكل مستمر وده بيساعد بصورة كبيرة في تعليمه الالتزام بالقواعد والتحكم في الاندفاعية وتفريغ طاقة الطفل بصورة مناسبة ⛷🏅.

وفي النهاية لو حابب تعرف أكتر عن الاضطراب ده تقدر تتفرج على الفيديو .. و لو حضرتك أو حد عزيز عليك بيعاني من المشكلة دي أو أي مشكلة نفسية تانية فتقدر تتواصل معانا من خلال صفحتنا وهيرد عليك حد متخصص .. أو تقدر تتواصل على أرقامنا وتزورنا في أحد فروعنا وهتلاقي فريق متخصص تحت أمر حضرتك 😍

إعداد : أستاذة / دعاء محمود

مراجعة : د / حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T