الزهايمر : Alzheimer

واحده من أسوأ المشاعر اللي ممكن يحسها أي إنسان في الدنيا هو إنه يلاقي باباه أو مامته بيقعوا قدامه بسبب مرض أقل مايقال عنه إنه مرض خبيث بيدهورهم في خلال شهور شهور أو سنين ومن غير حتى مايقدر يقدملهم حاجه يساعدهم أو بيها😇

وبعد ما كانوا هما اللي بيشيلوه في طفولته 👶🍼ومراهقته 🙋‍♂️وبيدعموه في شبابه 🙋‍♂️🏃‍♂️.. بقى هو الكبير المطلوب منه إنه يدعمهم ويساعدهم ويقوم برعايتهم وبيقدم الحب ليهم 🌺..

وللأسف هيضطر يقدملهم كل ده من غير حتى ما يعرفوه أو يشكروه أو حتى يفتكروه 😫

للأسف إحساس سيء جدا إنك تفقد علاقتك مع والدك أو والدتك رفقائك في الحياة من يوم ما وعيت عليها وهما لسه عايشين وقدام عينك 👀

في الموضوع ده هنتكلم عن مرض من أكتر الأمراض اللي بتأثر على الإنسان سواء على مستوى صحته أو وظيفته أو على مستوى علاقاته الاجتماعية 😱

هنتكلم في موضوع النهارده عن مرض ناس كتير تعرف إسمه .. وكل ما حد يكلمها تلاقيهم يقولوا معلش أصل أنا عندي زهايمر وبيكون قاصد بيها إنه بيعاني من مشكلة النسيان وإنه بينسى بسرعه وخلاص على كده 🧐..
للاسف الناس دي مش بيكون عندها معرفه بمعلومتين مهمين جدا ..

1. مبدئيا كده مافيش حاجه اسمها زهايمر اسمه الزهايمر

2. الزهايمر مش معناها النسيان ..ياريت مشكلة الزهايمر هي النسيان فقط .. لكن للأسف ده مرض بيأثر في المخ وبيسبب حاجات تانيه كتير يمكن أسوأ بكتير أوي أوي من النسيان 😫😱

المرض اللي هنتكلم عنه هنا يمكن يكون من أشهر الأمراض النفسية اللي بتيجي في مرحلة الشيخوخة .. وكل واحد وصل لسن الشيخوخة بيكون مرعوب منه وبصراحة بيكون عنده حق 😳 ..
في المرض ده كل ذكرياتنا بتبتدي تروح بالتدريج 🥲🎗

في البداية الموضوع بيكون مجرد نسيان بسيط وبعدين شغلنا ومهامنا اليومية نتيجة لقلة التركيز والنسيان بتبدأ تتأثر بالتدريج 😇 ..وبعدين بنبدأ ننسى أكتر ونتوه أكتر ومانعرفش نجمع كلمة مفيدة نقولها للي حوالينا 🥲.. وللأسف بينتهي بينا الأمر إننا لا بنعرف بعد كده نهتم باللي حوالينا ولا بنفسنا ولا حتى بنعرف نتعامل مع حد

طيب ايه هو مرض الزهايمر ؟؟

ده عبارة عن مرض بيأثر على خلايا مخ الإنسان بسبب تراكم بعض المواد فيها .. المواد دي بتبدأ بالتدريج تتراكم في حتت في المخ وتأثر عليه لحد مايتأثر على المخ كله 🧠...

من المعروف إن الزهايمر هو أشهر سبب للخرف عند الناس الكبيرة في السن .. وللأسف مشكلة المرض ده إنه بيكون عامل زي المرض الخبيث زي ماقولنا اللي بياكل حاجات كتير في المخ .. هو بيبدأ حاجه بسيطة والمضاعفات بتبدأ تزيد فيه يوم بعد يوم 🦀🦀

✅ مبدئيا كده ضروري نعرف كلنا إن في مشاكل طبيعية بتظهر عند الانسان مع التقدم في سنه ومالهاش علاقة بالزهايمر 👴👵

1. زي إن الإنسان ينسى الأشياء أحيانا

2. بيحط الحاجات في غير مكانها 🧴🪥🪥🧱

3. بيحصل ليه نقص بسيط في الذاكرة ومش بيقدر يفتكر التفاصيل الدقيقة في حياته 🕵️‍♀️

 

 

✅طيب ايه أعراض الاضطراب ده ؟؟

▪️في البداية خالص الموضوع بيتقسم مع مريض الزهايمر لكذا مرحلة

المرحلة المبكرة 🌝 :

واللي بيبدأ عادة الاضطراب في صورة إن تركيز الشخص بيقل كتير وده بيأثر كتير على قدرته أو استيعابه إنه يتعلم حاجه جديدة 📖 فنلاقيه إنه بقى صعب عليه أوي يكتسب أي حاجه جديدة من اللي بيكتسبها أي إنسان في حياته يوميا ..

بعض الحالات القليلة ممكن يبدأ الموضوع معاها بإنهم بيحسوا بلغبطة في إحساسهم بالأشياء أو لغبطة في حركتهم فبلاقي حركاتهم وتصرفاتهم مش متوافقة أو مع الموقف وبحس فيها إنها مش سلسة وفيها بعض الغشومية 🧩..

كمان ذاكرة الشخص بتضعف وخصوصا في الأحداث القريبة والجديدة 🧐... فتلاقيه بدأ ينسى تفاصيل الأشياء اللي حصلت امبارح وبعد شوية ممكن ينسى هو حتى أكل ايه امبارح أو النهاردة الصبح 🌞..

مع الوقت يبدأ النسيان يزيد بالتدريج لدرجة إنه هيبدأ ينسى أسامي بعض الناس في حياته👨‍👩‍👧‍👧 وساعات في المرحلة دي بيوصل بيه الأمر إنه مايفتكرش حتى بعض قرايبه البعاد ..
الحقيقة في الوقت ده احنا بنستغرب أوي منه !!!
لإننا لو سألناه أكلت إيه الصبح مش هيفتكر 🍳🧀.. لكن لو سألته على إسم مدرسة إبنه الابتدائية اللي كان فيها من ٣٠ سنه هيفتكر 🚍

بيحصلله ارتباك في معض المواقف ماكانش المعتاد إنه يرتبك بسببها بمعنى إنه بعد ماكان راجل أو ست عنده حسن تصرف جدا بنحس وقتها إنه قليل الحيلة جدا وإنه ممكن يغرق في شبر ميه 😇!!!

كمان بيبدأ يتأثر مستوى طلاقة كلامه وبتقل المفردات عنده بالتدريج وبدل ماكان كلامه شيك ومنمق زي الناس الشيك بيبقى كلامه مش مترتب وعادي خالص بس في المرحلة دي بيكون برده كلامه طبيعي وعادي وبيوصلك اللي انت عايزه 🗣🗣
في المرحلة دي التغيرات مابتبقاش كبيرة أوي .. علشان كده الأصدقاء والقرايب بس هما اللي بياخدوا بالهم إن في حاجه فيه مش طبيعية ..لكن اللي مايعرفهوش مش هياخد باله خالص 😎

المرحلة المتوسطة 🌕:

في المرحلة دي بيبدأ التدهور يحصل أكتر و أكتر .. النسيان بيبدأ يزيد أكتر وأكتر لدرجة إن الراجل اليقظ الشاطر هنلاقيه بقى بينسى الأحداث والاسماء والأماكن بصورة ملحوظة ...

ده كمان الأحداث البعيدة اللي كان بيفتكرها كويس في المرحلة الأولى دلوقتي بقت ضعيفة ومش بنفس القوة ..

كمان الذاكرة الجغرافية بتبدأ تتأثر بصورة واضحة فنلاقيهم بعد ما كانوا يعرفوا كل الطرق والأنفاق والكباري ... يبدأوا بالتدريج ينسوا ده لدرجة إنهم بيتوهوا في مكان المطبخ والحمام في البيت 🚽

بعد شوية المهارات الأساسية حتى هيبدأ يفقدها زي إن الست اللي كانت أحسن واحدة تعرف تطبخ أو ترتب البيت مبقتش تعرف تعمل كده خالص 👩‍🍳🧹!! والراجل اللي كان بيعرف يسوق أو يصلح حاجات مبقاش يعرف يعمل كده خالص 🚘🧑‍🔧!!

شوية كمان هنلاقيه حتى بقى مبقاش يعرف يلبس نفسه هدومه بصورة سليمة ومنمقة زي ماكان متعود طول عمره ..هو مجرد بس إنه بيلبس أي حاجه على أي حاجه ومش بيعرف يقل زراير هدومه أو السوستة كويس 👔

للأسف الحالة مش بتقف على كده ..و بتفضل تسوء أكتر وأكتر وبيوصل المريض لحتة إنه بيحصله حتى فقر في إنه يفتكر المفردات ..بينسى القرايه والكتابة 📖..وبينسى حتى يعبر عن احتياجاته من خلال الكلام بصورة طبيعية أو بصورة يقدر توصل بسهولة للي حواليه ..وده بيخليه يضطر يلجأ لكلمات غير مناسبه أصلا مع احتياجه بس هو مش بيكون لاقي غير الكلمات دي زي مابيحصل عند الأطفال 👶

مع الوقت حكمهم على المواقف حتى هيتأثر بصورة كبيرة .. وهيبقى بعد ما كان كبير العيلة مبقاش هيقدر يحكم على المواقف صح ولا يقدر للأسف يفهم الموقف عشان يقول رأي فيه وده لإن أفكاره بتكون مشوشة وغير مترابطة 💭🙇‍♂️

ساعات كمان بيحصله تغير كبير في مزاجه😡.. ساعات مزاجه بيكون وحش أو يكون عدواني بزيادة ..

في أوقات كتير بنلاقيهم بيشكوا في اللي حواليهم ولأسباب بسيطة ..وفي حاجات مالهاش قيمه لكنهم بيكونوا شايفينها كبيرة أوي وبتكون مخلياهم مضطربين وعدوانيين جدا بسببها (زي اللي يشك في إن مرات ابنه سرقت منه مشط شعره وضيعته وده حاجه مهمة جدا بالنسباله .. ومهما حاولوا يعوضوه مش بيرضى وبيكون شاكك !!! )

ساعات بيكونوا واخدين موقف عدائي وبيرفضوا تماما إن اللي بيرعاهم يساعدهم ويقدملهم اللي محتاجينه 👋 ..

واحدة من أكبر مشاكل المرحلة دي هو إنهم ساعات بنلاقيهم بينسوا إن عندهم مشكلة تمنعهم إنهم يستقلوا بذاتهم ..وتلاقيهم مصرين يخرجوا لوحدهم أو يخرجوا من ورا أهلهم وده ممكن يأدي بيهم إنهم يكونوا مفقودين وأهلهم مش لاقينهم 😱😱

في نهاية المرحلة دي بنبدأ نلاحظ إن المريض للأسف مبقاش عنده القدرة حتى إنه يتحكم في إخراجه وبيبدأ يتبول على نفسه وبيلجأ ساعتها إنه يكون لابس حفاضات طول الوقت 🧻

المرحلة المتأخرة 🌚:

مع تقدم الحالة بتبدأ تظهر عليهم .. لامبالاة ومابيبقاش عندهم مشاعر لا لإبن ولا حفيد ولا بيكون عارفهم ولا حتى مهتم بيهم ولا كأن دول بني أدمين حواليه 😩 الذاكرة الجغرافية بتتأثر خالص لدرجة إنه بقوا مش بيفتكروا حتى سريرهم أو الحمام أو أي مكان حاجه في الدنيا 🛁🛌

ساعات بيبقى حتى مش بيتكلم غير كلمات بسيطة وبتبدأ بالتديج تقل الكلمات اللي بيقولها لحد ما يبقى مش بيعرف يتكلم خالص وبيفقد النطق 🤐

كل اللي بيفضل عنده هو حبة إشارات عاطفية ممكن يفهمها ويتفاعل معاها ❤️

الاعراض في نهايتها بتوصل إن بيبقى في صعوبة في البلع🥣 وكمان يوصل بيه الأمر إنه بيكون مش قادر يتحرك وده بيخليه يفضل ملازم الفراش من غير لا كلام ولا حركة شهور ...

ساعات ده بيكون من أسباب الوفاة بسبب قرحة الفراش أو الالتهاب الرئوي 🫁

طبعا في المرحلة دي بتكون رعايته صعبه جدا فبيكونوا محتاجين ساعتها رعاية خاصة يعتمدوا عليها بصورة كاملة أو دار مسنين 👴🧓

✅ طيب ايه أسباب الاضطراب الخطير ده 🧐؟؟

علشان نكون واضحين مافيش حتى الآن سبب واضح للزهايمر لكن كلها نظريات وفرضيات

1. سبب وراثي ويمكن ده من أشهر الأسباب اللي بتأدي للزهايمر واكتشف العلماء كذا جين بيكون مسئول عن المرض ده .. وخصوصا إنهم لقوه بيحصل مع أغلب المرضى اللي بيعانوا من متلازمة داون واللي فضلوا عايشين للعقد التالت من عمرهم ☠️

2. بعض الافتراضات بتقول إن بسبب نقص صنع الاسيتيل كولين ويمكن اللي يأكد حاجه زي كده إن كتير من العلاجات معتمدة على فكرة إنها تزود من المادة دي ⚗️

3. التسمم بمادة الألمونيوم 👨‍🔬...لإنهم لقوها مترسبة بصورة كبيرة في دماغ الناس اللي كانوا بيعانوا من الزهايمر بعد وفاتهم ⚰️

4. ترسب مادة اسمها بيبتيد بيتا النشوانيه خارج الخلية 👨‍🔬

5. بسبب تشوهات في بروتين اسمع تاو بروتين في مخ المريض

6. مادة الجلوتاميت واللي بتلعب دور في تلف الخلايا العصبية ☠️

7. بسبب التهابات أو لأسباب مناعية

حبة معلومات على السريع كده عن الاضطراب ده 🧐؟؟

🔳 بينتشر الاضطراب ده في نسبة ٢ ل ٤ ٪؜ من البني أدمين 👨‍👩‍👧‍👧

🔳بيبدأ عادة حدوث الاضطراب ده بعد سن ال ٦٥ وبتزيد احتمالية حدوثه كل مايكبر الشخص في السن وخصوصا بعد ٧٥ سنة 👴👵.

🔳بيمتد عمر الشخص اللي بيعاني منه من ٣ ل ١٠ سنين في المعتاد من وقت تشخيصه ⚰️

✅ طيب ازاي ممكن نقي نفسنا وحبايبنا من الاضطراب ده ؟؟

مافيش حاجه لغاية دلوقتي لقوها أو أكدوا إنها بتمنع المرض بنسبة كامله لكن في بعض الأشياء الوقائية اللي بيفترض إنها بتقلل من نسبة حدوثه

1. نتجنب زيادة الكوليسترول والمشاكل اللي ليها علاقة بالسكر والضغط

2. ممارسة القراءة ولعب الكلمات المتقاطعة ولعب الموسيقى

3. ممارسة رياضة بانتظام وعمل أنشطة حركية

4. زيادة التواصل الاجتماعي المباشر

5. شرب القهوة أو أي مشروب فيه مادة الكافيين

6. شرب الكاكاو والشاي

✅ ليه لازم نتعالج بدري ؟؟

بكل بساطة .. شعارنا في المرض ده ..كل مانبدأ بدري كل ما فرص السيطرة على الأعراض بتبقى أفضل 💪

✅ طيب هل المرض ده ليه علاج .. وايه اللي بنقدمه للمريض اللي بيعاني من الاضطراب ده في عياداتنا ؟؟

للاسف لحد دلوقتي مافيش أي علاج دوائي على وجه الأرض بيعالج المرض ده أو حتى بيسيطر على الأعراض دي بصورة كاملة 🙈 بكل شفافية ... كل اللي بتعمله العلاجات دي هي إنها بتأخر تدهور الاعراض ⚠️

العلاج الدوائي💊 : زي مركب الدونيبيزيل في الحالات البسيطة ..أو مركب الميمانتين في الحالات المتوسطة والشديدة .. ساعات بندي معاه بعض الأدوية المضادة للذهان لو كان مريضنا بيعاني من أعراض العدوان أو العصبية والشك الزيادة 🤨

العلاج النفسي والاجتماعي 👩‍⚕️: في كتير من العلاجات النفسية اللي بنبدأ نعملها مع مرضى الزهايمر ويمكن مافيش حاجه بتثبت فاعلية كبيرة في السيطرة على الحالة ..علشان كده بيكون من أهم الحاجات اللي بنتعامل بيها نفسيا هو إننا نعرفهم ازاي يرعوا الحالة 🤔..

1. العلاج بالتذكر 🎗: واللي فيها بنكلمه عن تجارب الماضي بتاعته وإنجازاته سواء بصوره فردية أو من خلال الأسرة كلها و بنستخدم في ده صور وفيديوهات قديمة

2. علاج الحضور المحاكي 👨‍👩‍👧‍👧: وفي العلاج ده بنشغل فيه أصوات لأقرب الناس اللي عدوا عليه وأثروا عليه في حياته معظم الوقت

3. الرعاية : وده أهم حاجه ممكن نقدمها لمريض الزهايمر وبتكون مفيده في كل مراحل المرض وخصوص المرحلتين المبكرة والمتوسطة..ودي بتكون عن طريق إننا نغير نمط المعيشة والمحيط المعيشي بتاعه علشان نحافظ على المريض وفي نفس الوقت نسهلها على الشخص اللي بيقدم الرعاية وده بيكون من خلال عمل. روتين بسيط لكل حاجه ..تركيب أقفال الأمان للحاجات اللي بنخاف عليه منها ..عنونة الأوض والحمامات عن طريق إننا نكتب يافطه على اتجاه كل حاجه .. عنونة الأدوات المنزلية علشان نساعد المريض .. لو وصلنا لمرحلة إن بقى في مشكلة عنده في الأكل والبلع بنعمله الأكل على شكل قطعٍ صغيرة أو حتى مهروس أو لو زادت مشكلة الصعوبة في البلع بيتم إستخدام أنابيب التغذية ... محاولة تقسيم الرعاية على عدة أشخاص ..وفي الحالات المتأخرة بنحاول نقنع الأهل بالاستعانة بدور رعاية المسنين ونخليهم يتقبلوا الفكرة 👍

وفي النهاية لو حابب تعرف أكتر عن الاضطراب ده تقدر تشوف الفيديو .. ولو انت أو لو حد عزيز عليك بيعاني من المشكلة دي أو أي مشكلة نفسية تانية فتقدر تتواصل معانا من خلال صفحتنا وهيرد عليك حد متخصص .. أو تقدر تتواصل على أرقامنا وتزورنا في أحد فروعنا وهتلاقي فريق متخصص تحت أمر حضرتك 😍

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم : learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T