الشخصية الحدية : borderline personality

هنتكلم النهارده عن أشهر اضطراب في الشخصية واللي بيحصل للبنات بنسبه أكتر كتير من الولاد 💃 ... وبسبب انتشار الاضطراب ده ومعاناة ناس كتير منه بصوره كبيره فده هو اللي خلانا نفرد ليه نافذه في الموقع ومانحطهوش في النافذه المختصة بباقي اضطرابات الشخصيه 🤔

في النافذه دي هنناقش اضطراب الشخصية الحدية .. ‏

Borderline personality disorder اضطراب الشخصيه الحديه بيعبر عن الأشخاص الغير مستقره عاطفيا .. حتى اسم الاضطراب نفسه ماكانش مستقر واتغير اسمه كتير على مدار السنين  !!
يعني مثلا كان اسمه في بعض الأوقات ( الفصام المتغير ) .. سموه كمان ( الفصام العصابي الكاذب ).. وسموه كمان ( الشخصية ذهانية السمات ).. كمان سموه ( الشخصية غير المستقرة عاطفيا )

طيب ليه دلوقتي سموه اضطراب الشخصية الحدية 🤔؟؟

لإن ده بيعكس طبيعة الشخص اللي عنده الاضطراب ده .. وده لإنه بكل بساطه بيكون المريض اللي بيعاني منه على الحد بين العصاب والذهان أو بين العقل وبين فقد العقل 😱 !!

طيب مبدئيا .. نقول نبذة بسيطة عنه وبعد كده هنروح مع بعضينا في جولة علشان نعرف تفاصيل الاضطراب ده واللي كتير من الأهالي مش بيتنبهوا لحدوثه مع أبنائهم وبالأخص بناتهم 😱

بكل بساطه .. ده اضطراب نفسي بيتميز بنمط طويل من العلاقات غير المستقرة 🙃، وبيبقى عند الشخص شعور مشوه بذاته، ومش بيكون عنده هويه ثابته تخليه يعرف يحدد أهدافه في أمور الحياه المختلفه وخصوصا للأهداف طويلة المدى زي الشغل والأصدقاء وشريك الحياه .. وبيعاني الشخص المصاب بالاضطراب ده بردود أفعال عاطفية وقوية جدا ناحية أشياء ممكن اللي حواليهم يشوفوها إنها ماتستاهلش أصلا 🤣😭🥶.

الشخص ده التغيرات اللي بتحصل معاه في الحياه بتخليه يتصرف بصوره متطرفه يعني يا نلاقيه مثالي بزيادة أو نلاقيه منحط أخلاقيا بزياده !!

كل الأعراض دي بتكون موجود معاها اندفاعيه زياده وخصوصا في ( الإسراف والتبذير - الجنس - الإدمان - السواقه المتهوره - الأكل بشراهه ) ..

وغالبًا في الاضطراب ده بيحاول الأشخاص المصابين إنهم يأذوا نفسهم أو يعملوا سلوكيات خطر 🪒🔪، وكمان كتير منهم بيعانوا من الشعور بالفراغ وبيكونوا خايفين دايماً يبقوا لوحدهم ... وفي بعض الأوقات بيحسوا كمان بالانفصال عن الواقع وخصوصا مع زيادة الضغط عليهم 😇

للأسف ممكن طبعاً الاضطراب ده يدخل الشخص في اضطرابات نفسيه تانيه زي تعاطي المخدرات والاكتئاب الشديد واضطرابات الأكل 😱 ..

وللأسف كمان اضطراب الشخصيه ده بيكون واحد من الأسباب الرئيسية لحدوث الانتحار .. فنسبة الأشخاص اللي ممكن ينهوا حياتهم بالانتحار ممكن توصل لحوالي ١٠٪؜ .. كل المشاكل دي ممكن تحصل أو تزيد أوي بسبب أحداث بتعتبر طبيعية بالنسبه للناس التانيه بس الأشخاص المصابين بالاضطراب ده بيتأثروا بيها بصوره أقوى وبيخشوا في الأعراض اللي هنناقشها دلوقتي 👇

 

 

 

طيب إيه هي أهم الأعراض والسمات اللي بنشوفها على الأشخاص اللي بيزورونا في عياداتنا وبيعانوا من  اضطراب الشخصية الحدية 🧐 ؟!:

1. أول حاجة بيكون عند المريضه شعور مضطرب وملحوظ بإحساسه بهويته .. يعني بيبقى مش عارف هو مين وفاقد هويته قدام نفسه وعنده لخبطة في معرفة الصح والغلط من وجهة نظره .. من الآخر كده الشخص بيكون مش متأكد من هويته الشخصية ولا أخلاقه وقيمه اللي المفروض يتمسك ويعتقد فيها .. وممكن بسهوله يتقمص أي هويه يحس إن مشاعره بتحركه ناحيتها ويكون متحمس ليها.. وكمان ممكن يكون عنده بعض أفكار شك ( بارانويا ) في أوقات الضغط والتوتر 😱

2. احساس نفسي بالفراغ الداخلي معظم الوقت ورغم إن الشعور ده صعب الوصف لكنه من أكتر المشاعر المؤلمه اللي بيحسها الشخص اللي بيعاني من المشكله دي 😱

3. فكرة الهجر والوحدة بتبقى مخيفة جداً بالنسبه ليها .. والشخص بيبذل مجهود كبير لمحاولة إنه يتفادي الفكرة دي أو إنه يكون لوحده وبيعمل تصرفات متطرفة وممكن تكون مذله ومؤذيه ليه علشان يتجنب الإحساس ده 👩‍❤️‍💋‍👩👩‍❤️‍👨

4. القطبية وده معناه إن الشخص بينظر للأمور نظرة الأبيض والأسود تجاه كل حاجة بيشوفها أو بتحصله .. ومش بيكون عندها حلول وسط في التعامل مع الأمور اللي محتاجه حلول وسط

5. الاندفاعية والأفعال المتهورة والغير محسوبه، زي الإسراف في صرف الفلوس أو الانخراط في علاقات جنسية أو تعاطي المخدرات ، والسواقة بتهور وأخيراً الشراهة في الأكل 🚬💵🍱🧆

6. المشاعر القوية والغير مسيطر عليها تجاه المواقف والأحداث وبتبقى غير مناسبة للموقف ولا للحدث😭😭

7. علاقات غير مستقرة ومتقلبة ومليانة فوضى بتخلي الشخص طول الوقت بيحس بالضيق👩‍❤️‍👩🏃‍♀️

8. ميل دائم ومتكرر لإيذاء النفس بطرق كتير وأشهرها جرح المعصم 

9. الشخص بيبص لنفسه نظرة مشوهة وبيستقل نفسه وبيشوفها تستحق السيء بس😣

10. في النهاية بيرتبط بالاضطراب ده اضطرابات نفسيه تانيه زي الاكتئاب والقلق والغضب والعصبيه الزايده😱.

11. بشكل عام أكتر الأعراض اللي بتميز الاضطراب ده هي الحساسية الزايدة أوي تجاه الرفض أو النقد البسيط وكمان بيكون فيه تذبذب بين المثالية والاختلاف التام عن الآخرين .. وبيكون معاه عدم استقرار مزاجي .. ومابيبقاش فيه تحكم أو تنظيم للمشاعر القوية وده بيؤدي في الاخر لتصرفات خطيرة زي ماقولنا ومندفعة 😂🥲😭🤣 .

12. فيه أعراض تانية ممكن تكون موجودة زي إن ممكن في النهاية الضغط والتوتر الشديد ده يؤدي لانفصال الشخص عن الواقع وممكن يعاني من نوبات ذهان في الحالات الشديدة😣😇...

ولإن الموضوع مهم أوي وصعب الوصف وممكن يحصل فيه سوء فهم كبير .. تعالوا نتكلم فيه مع بعض من زاويه تانيه وباستفاضه أكبر 💪💪...

 

 

 

أولاً : اضطراب المشاعر 👩‍❤️‍👨❤️ -

لازم نعرف في البداية إن الأشخاص المصابين باضطراب الشخصية الحدية حساسين أكتر تجاه المشاعر وده لإنهم بيحسوا بيها أقوى وأعمق وأطول من الناس العادية 🥰.. ودي أكتر حاجة بتميز اضطراب الشخصية الحدية (اضطراب المشاعر) واللي بيظهر في ردود الأفعال العاطفية الزيادة ناحية الضغوطات الحياتية اللي بنشوفها بسيطة جدا وكمان مع مدة أطول للرجوع لحالتهم النفسية الطبيعية...

وطبعا قوة وعمق وطول مدة المشاعر ليها مميزات وليها عيوب !!

الأشخاص دول لما بتكون مشاعرهم إيجابية بيكونوا ودودين جداً ومريحين وعندهم طاقة حب حلوة جداً لكن على الجانب الآخر لما تكون مشاعرهم سلبية فبيبقوا حاسين بغضب وحزن شديد واكتئاب وقلق وإحباط وإحساس بالذنب وكل ده ممكن يحصل في موقف مايستحقش غير زعل عادي 😭😭 أو ممكن نلاقيهم يحسوا بالإهانة لمجرد موقف فيه إحراج بسيط 😇 وهكذا ...

وزي ماقولنا بيكون فيه حساسية زايدة جداً تجاه النقد البسيط أو الرفض أو حتى في استقبال الاخفاق وتعاملهم معاه.. وبيكون مجهودهم في تعديل الاحساس ده  متجه لإن الشخص يعزل مشاعره تماماً عن الناس .. أو يحاول يؤذي نفسه أو ممكن كمان تتملكه مشاعره السلبيه ويعمل محاولات انتحاريه 🗡🔫

بالإضافة لشدة وحدة المشاعر دي، الأشخاص المصابين بالاضطراب ده ممكن يحصل معاهم أحياناً حاجة اسمها قابلية التغيير أو التقلب...وساعات التقلب ده بيبقى بدل مايكون تقلب بين إن المزاج يكون ياحلو ياوحش ...لا بيكون تقلب بين القلق والغضب والعدوانيه وبين الاكتئاب والانكماش والسلبيه 😱!!

ثانياً: العلاقات الشخصية 👩‍❤️‍👨 -

الأشخاص المصابين باضطراب الشخصية الحدية حساسين جداً تجاه الطريقة اللي بيعاملهم بيها الناس .. زي إنهم بيشعروا بالفرح الشديد والامتنان تعبيراً عن اللطف، والغضب القوي والحزن الشديد تعبيراً عن النقد البسيط او الاحراج...  وغالباً بينخرط الأشخاص دول كمان في التفاوت الشديد والقطبية تجاه الأشخاص، بمعنى إن ممكن المشاعر الحميدة زي التقدير أو الحب تجاه الأشخاص في ثانيه واحده بتتحول فجأة لمشاعر خذلان وعدم اعجاب بعد النقد ..

كمان في حاجه عندهم احنا بنسميها ظاهرة الانقسام ودي معناها إن بيبقى في خوف من فقدان شخص ما أو فقدان نظرة التقدير في عيون الأشخاص دي😭. وطبعا العوامل دي كلها بالإضافه لتقلب المزاج اللي بيكون عندهم بيكون كفيل إنه يأثر على علاقة الشخص بالأهل أو الأصدقاء أو زملاء العمل. برغم إن الأشخاص دول بيميلوا جداً للحميمية والأُلفة بس بيتخذوا أشكال وأنماط بتسببلهم عدم ارتياح  ليهم و للأشخاص اللي معاهم في العلاقة ..زي التعلق الغير آمن أو التجنب أو يبقوا مشغولين بالخوف جوه العلاقة !!

وزي باقي اضطرابات الشخصية بترتبط كل الأعراض دي بزيادة في مستويات القلق المزمن والصراع على مستوى العلاقات الرومانسية وعدم رضا شركائهم عن العلاقة.

ثالثاً: السلوك الاندفاعي 💃-

السلوك الاندفاعي من أشهر الحاجات اللي بتميز اضطراب الشخصية الحدية زي مثلاً الاتجاه للمخدرات أو الخمر 🚬، الأكل بشراهة🍖🍗🍟، علاقات جنسية خطرة وغير آمنة💃، علاقات جنسية عشوائية مع شركاء متعددين💃، صرف الفلوس بطريقة عشوائية💵، والسواقة المتهورة🚗. 

برده ممكن نلاقي من السلوكيات الاندفاعية ان الأشخاص دول ممكن يسيبوا شغلهم لأسباب بسيطة 🧑‍💻أو يسيبوا علاقة كمان 💔 ... ممكن يعملوا محاولات للهروب من البيت لتفادي الضغط 🏠.. أو في النهاية إيذاء النفس. وده لإن الأشخاص دول بيعملوا كده في محاولة منهم لتفادي الألم النفسي اللي بيحسوا بيه لحظياً،


بس على المدى البعيد ايه اللي بيحصل 🤔؟!

بيحسوا بالخجل وعدم الرضا عن النفس مع استمرار الأفعال دي وبيبدؤوا يدخلوا في دايرة مغلقة _( يحسوا بألم نفسي — يعملوا سلوك اندفاعي يخفف من الألم — يشعروا بالحزن والذنب من السلوكيات دي — ألم نفسي تاني — احتياج اقوى لسلوك يخفف من الألم النفسي الجديد وهكذا مع مرور الوقت السلوكيات دي بتكون اوتوماتيكية أول ما يشعروا بأي ألم نفسي.

رابعاً : إيذاء النفس 🗡🚬-

مبدئيا كده .. لازم نفرق بين إيذاء النفس والانتحار

إيذاء النفس معناه إن الشخص بيعمل أفعال معينة يإذي بيها نفسه لكن ماتنهيش حياته بصوره مباشره .. أما الانتحار فمعناه  إن الشخص بيعمل أفعال هدفها إنهاء حياته.

إيذاء الذات ده يعتبر واحد من أهم المعايير اللي بنشخص بيها الشخصية الحدية !!

الإحصائيات بتقول إن نسبة إيذاء النفس بتتراوح من 50 إلى 80٪ في الأشخاص المصابين باضطراب الشخصية الحدية.

وطبعاً الطريقة الأكثر شيوعًا والأشهر لإيذاء النفس هي القطع(جروح في منطقة المعصم أو الذراع). كمان الكدمات أو الحرق أو الضرب على الرأس أو العض واللي بتحصل بنسبه أقل لكنها برده بتحصل . ورغم إن معظم الناس بتستغرب من فكرة إن إنسان يجرح نفسه لكن هنلاقي إن الأشخاص اللي بيعانوا من اضطراب الشخصية الحدية بيحسوا بارتياح عاطفي بعد جرح نفسهم وده اللي بيخليهم يستمروا في السلوك ده 😱😇.

أما بقى بالنسبة للانتحار فبتتراوح مخاطر الانتحار مدى الحياة بين الأشخاص المصابين باضطراب الشخصية الحدية بين 3٪ و 10٪ من نسبة المصابين...
وعلى فكره بعض الإحصائيات بتقول إن نسبة مئوية كبيرة من الرجالة اللي بيموتوا منتحرين ممكن يكون عندهم اضطراب الشخصية الحدية غير المشخص. . كمان ما يقرب من 70 ٪ من الأشخاص المصابين باضطراب الشخصية الحدية بيإذوا نفسهم دون محاولة إنهاء حياتهم.

طيب تفتكروا إيه الأسباب ورا إيذاء الشخص لنفسه 🤔 ؟!

لازم نعرف إن الانتحار وإيذاء النفس هي ردود فعل على الشعور بمشاعر سلبية. فاللي عندهم الاضطراب ده بيكونوا في أوقات كبيره بيحسوا بغضب شديد ، بيكونوا عايزين يعاقبوا ذاتهم على أخطائهم ، ، بيلهوا نفسهم عن الألم العاطفي أو الظروف الصعبة ، كمان محاولات الانتحار دي بتعبر عن اعتقاد إن الناس المحيطة بيهم هتبقى حياتهم أفضل لو الشخص انتحر .. وفي الاخر مش هنغفل إن في أوقات كتير ممكن يكون الاعتداء الجنسي حافزًا خاصًا للسلوك الانتحاري عند المراهقين المصابين باضطراب الشخصية الحدية 🤭.

خامساً : النظرة للذات 🥺🥺-

الأشخاص المصابين باضطراب الشخصية الحدية بيكون للأسف عندهم صعوبة في رؤية هويتهم الحقيقية بوضوح، دول كمان بيلاقوا صعوبة في معرفة ايه اللي بيؤمنوا بيه أو بيحترموه أو اللي بيحبوه وبيكرهوه ..كمان بيلاقوا صعوبة في تحديد الأهداف بعيدة المدى من العلاقات أو الشغل. وده واحد من الأسباب اللي بتحسسهم بالفراغ أو الضياع 😇.

سادساً : اضطرابات في الإدراك 🙃-

المشاعر الشديدة اللي عند الأشخاص المصابين باضطراب الشخصية الحدية ممكن تخليهم يلاقوا صعوبة في التركيز. وممكن تحصلهم حاله كده من عدم التركيز ممكن توصل لدرجة الانفصال عن الواقع 😳😳.
ساعات بنشوف الأعراض دي من خلال إننا بنلاقي تعابير وشهم بتكون ثابتة وجامده كده بدون أي تعبير ، وصوته كمان يكون بنغمه واحدة ، وساعات بيكون مشتت تماماً. وخلل الإدراك ده بيحصل نتيجة ضغط وألم نفسي شديد هما مش قادرين يتعاملوا معاه

سابعاً : الأعراض الذهانية 🔮 -

بالرغم من إن اضطراب الشخصية الحدية ده عباره عن اضطراب في المشاعر ، إلا إنه ممكن يصاحبه أعراض نقدر نقول عنها إنها "شبه ذهانية" .. وده لأنها تشبه الأعراض الذهانية الحقيقية لكنها أقل خطورة وأقل حدة... بعض الأبحاث لقت إن اعراض الهلوسة والضلالات اللي ممكن تحصل مع اضطراب الشخصية الحدية في اوقات الضغط الشديدة بتكون صعب تفريقها عن اللي بتحصل مع مرضى الفصام 😱😱... وكمان أفكار جنون العظمة أو الشك الشديد اللي بتزيد بالتعرض لضغوطات ممكن تكون من أعراض اضطراب الشخصية الحدية 😇.

ثامناً : الإعاقة 🤕-

طبعا مع كل الأعراض اللي ذكرناها دلوقتي كتير من اللي بيقرأوا الموضوع هيكونوا فاكرين إن الشخص اللي بيعاني من اضطراب الشخصية الحدية مش هيقدروا يكونوا أشخاص مفيدين في الحياه .. ولا هيقدروا يحققوا أي إنجازات في حياتهم لإن عملهم هيفشل وعلاقاتهم هتفشل .. لكن ده مش حقيقي أوي وخصوصا لو الأعراض دي كانت بصوره بسيطه أو متوسطه .. بالعكس دول بيقدروا يلتزموا بشغلهم وعلاقاتهم وبيدوا فيها حماسه كبيره وفي أوقات كمان بيقدروا يحققوا فيها إنجازات عظيمه 💪💪 ..
لكن للأسف في الحالات الشديدة بس هي اللي بنشوف فيها إعاقه شويه في الالتزام بشغل أو علاقه وده بيكون بسبب السلوكيات الاندفاعية أو الغضب الشديد أو تقلبات المزاج الشديده ..وكمان للأسف في بعض الأوقات ممكن تؤدي بأولادنا للإنتحار وفقد الحياه أو لمرض عضوي شديد نتيجة لمحاولة إيذاء نفس شديده 😇🤕.

طيب امتى الأعراض دي بنبدأ نشوفها على أولادنا 🤔؟؟

وقت حدوث الاضطرابات دي أو وقت ظهورها بتبدأ زي باقي اضطرابات الشخصية في بداية البلوغ

طيب إيه هي أسباب اضطراب الشخصية الحدية 🤔 ؟!!

زي باقي الاضطرابات النفسية التانية ، فأسباب اضطراب الشخصية الحدية معقدة ومش متفق عليها تمامًا وبيكون ليها أسباب وراثيه وأسباب بيئيه واجتماعيه !!

1. العوامل الجينية 🧬 : الوراثة في اضطراب الشخصية الحدية تقريبا ما بين ٣٧٪؜ لـ ٦٩٪ .؜

2. العوامل العصبية الحيوية كتير من الدراسات بتقول إن الجهاز الطرفي المسئول عن تنظيم الانفعالات في المخ ليه دور في حدوث الاضطراب ده 😱

3. عوامل بيئية :فيه علاقة قوية بين إساءة معاملة الأطفال ، وخاصة الاعتداء الجنسي على الأطفال  وتطور اضطراب الشخصية الحدية....
سوء المعاملة ده ممكن يكون بأشكال كتيرة زي (الاهمال ، سوء المعاملة اللفظية أو العاطفية أو الجسدية بالضرب ).

4. فقدان الأبوين كمان سواء كان بسبب الإهمال أوالانفصال أو الوفاه بيكون ليه دور كمان في تطور الاضطراب ده 👨‍👩‍👦..

 طيب ازاي بنعالج الأشخاص دول لما يزورونا في العياده ؟؟ 💊:

. العلاج الدوائي 💊:

للأسف لغاية دلوقتي مافيش علاج دوائي مخصص لاضطراب الشخصيه الحدية ومع ذلك بنحتاج مع معظم الحالات اللي بتعاني من الاضطراب ده لبعض الأدويه علشان تساعدنا إننا نتحكم في ( سلوكياته الاندفاعيه ..إيذاء الذات .. تقلب المزاج بصوره كبيره )..

كمان بنحتاج للعلاج الدوائي لما يكون مصاحب للإضطراب ده بعض الأعراض الذهانيه أو الإكتئابيه الشديده 😭.. ولكن هيفضل حجر الأساس لعلاج الاضطراب ده هو العلاج النفسي طويل المدى 👨‍⚕️

العلاج النفسي 👨‍⚕️:

عادة معظم الشخصيات الحديه بتكون محتاجه علاج النفسي طويل الأمد مش عدة زيارات متقطعه للعياده وخلاص  .. ورغم إن العلاج النفسي بياخد وقت كبير وتكلفه كتير  وخصوصا العلاجات الديناميه أو العلاج الجدلي السلوكي ، لكنه بيكون فعال جدا وبيفرق بصوره كبيره في حياة الشخص 💪💪

العلاج الجدلي السلوكي 👏👏:

بيحتوي العلاج السلوكي الجدلي (DBT)على مكونات مشابهة تقريباً للعلاج السلوكي المعرفي، بس زيادة عليه ممارسات زي التأمل واليقظه . وفي النوع ده من العلاج بيساعد المعالج الفرد المصاب باضطراب الشخصية الحدية على اكتساب المهارات لإدارة الأعراض، ودي من أهم الاضافات في العلاج ده. المهارات اللي بيتعلمها بتكون زي : (تنظيم المشاعر - اليقظة - التحكم في التوتر)

ولإن المصابين باضطراب الشخصية الحدية عندهم المشاعر شديدة ، فتعلم تنظيمها بيكون خطوة كبيرة جداً في العملية العلاجية. كمان في بعض مكونات DBT بتفيد المريض على المدى الطويل زي بناء المهارات لفهم وتنظيم العواطف، والواجبات المنزلية ، والتوافر القوي للمعالج لعملائهم. كمان لازم المرضى اللي بيعانوا من اضطراب الشخصية الحدية ياخذوا وقت في العلاج السلوكي الديناميكي (DBT) علشان يوصلوا لنتايج أفضل مع معالجهم وعشان يتعلموا ازاي يتجاوزوا المواقف المحاطة بالعواطف الشديدة أو التوتر، بالإضافة إلى إنهم يتعلموا إزاي يحسنوا علاقاتهم الشخصية 👩‍❤️‍👨.

وفي النهاية ..لوعايز تعرف أكتر عن الاضطراب ده تقدر تتفرج على الفيديو .. ولو بتعاني من المشكلة دي أو حد عزيز عليك بيعاني من الاضطراب ده تقدر تستفسر من خلال صفحتنا أو تتواصل معانا من خلال أرقامنا أو تزورنا في أقرب فرع ليك من فروع عياداتنا .

إعداد : د/ عمار أنور 

مراجعة : د / حاتم صبري

 

 

 

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T