فقدان الشهية العصابي : Anorexia nervosa

صاحبة مشكله النهارده:بتكون عادة  بنوته او فتاة جسمها جميل جدا و مثالي ،

ده كمان ممكن يكون عودها عود فرنساوي 🧜‍♀️💃 .

لكن لبعض الأسباب اللي هنتكلم عنها كمان شوية بنلاقيها بتزورنا في عياداتنا لإن بيكون عندها مشكلة كبيرة 🙀 ...

فجأة البنت دي ممكن بتبص لنفسها في المرايه وتشوف نفسها انها تخينه اووووووووووي كأنها عندها ١٠٠ كيلو جرام 😫،او اكتر !!

للاسف مره واحدة بتشوف نفسها تخينة وخصوصا في مناطق في جسمها في حين إنها مش تخينه في المناطق ديه ( بتشوف حاجه اصلا مش موجوده) 😫

بتبدأ ساعتها تقول لنفسها انا بقيت تخينه اووووي😭 ، انا لازم اقلل من أكلي ،🤐 .. انا لازم اقلل من السعرارات الحرارية اللي باكلها ، انا لازم اخس و اعمل  دايت ، انا لازم العب رياضه كتيرررر عشان احرق اكثر ، انا لازم لما اجي اشتري لبسي يكون كله small 🎽🧚‍♀️ فتبدأ تقلل من اكلها اووووووي بدل ما كانت بتأكل علي وجبه الفطار رغيف كامل لا نلاقيها بقت تأكل ربع رغيف و هكذا حتي في وجبه الغداء وتيجي علي وجبه العشا يادوبك تاكل ثمرة فاكهه ده إن أكلتها أصلا 🍎....

مع الوقت وجبات الأكل بتبدا تقل بالتدريج لحد ماتوصل لطبق صغير اوووووووي زي الطفل االبيبي في اكله🍳 ..
وهي بتكون جعانه و عاوزة تزود من وجبتها بس مش بتقدر 🙍‍♀️، بتكون طول الوقت خايفه انها تتخن فبتجوع نفسها لحد ماتخس خاااااالص و بيكون جسمها برده زي الطفله بالظبط
ده ساعات قلة الأكل بيوصلها لدرجة ان جسمها بيقل فيه كل الفيتامينات والاملاح وممكن كمان توصل لانيميا شديدة ممكن بعد الشر تخلص على حياتها 😱!!

 

 

طب تعالوا الاول 🌠نشوف مع بعض ايه تعريف المشكله بتاعت النهارده طبقاً لمعايير الطب النفسي🤔؟؟

الاضطراب ده معناه إن الشخص بقى عنده انشغال دائم بالوزن 😇..مع انخفاض شديد في وزن جسمه ..
مع خوف من اي زيادة في الوزن وبيكون مفهوم شكل الجسم عند الشخص مش صحيح 😔

طيب ايه أعراض الاضطراب ده اللي بتكون ظاهرة على المريض اللي بيزورنا في عياداتنا 🤔؟؟

أعراض نفسية :

1- انخفاض بشكل ملحوظ في وزن الجسم يفوق الحد الطبيعي بالنسبة للسن و الطول😔

2- الخوف شديد اوووي من زيادة الوزن او السمنة ، علي الرغم من نقص وزنه بشدة وبصوره واضحه لكل اللي حواليها 😣😞

3- في البنات، بيحصل انقطاع في الطمث، أو عدم انتظام الدورة الشهرية بسبب نقص الوزن بصورة ملحوظة

4- بينكر الشخص المصاب خطوره انخفاض وزنه ؛ لانه مش بيكون مدرك حجم المشكلة اللي هو فيها ولانه مش بيكون شايف إنه وزنه بقى قليل أوي أصلا🙁

طيب ايه مضاعفات المرض ده وخصوصا لو المريض اتأحر في خطوة اللجوء لطبيب نفسي 🤔؟؟

1- مضاعفات جسمية  :

مظهره بيكون باين فيه الضعف ، تباطؤ معدل نمو الثديين في البنات المراهقة ، تناقص الرغبة الجنسي والعجز الجنسي عند الذكور، اضطراب الغدد الصماء وده اللي بيؤدي الي انقطاع الدورة، الشهرية عند الاناث، هزولة الشعر كانه زي شعر البيبي اللي لسه مولود ، الامساك،  نقص بعض الفيتامينات والأملاح وبعض المواد الهامة زي الزنك و البوتاسيوم، انخفاض التمثيل الغذائي ، فقر الدم، ضعف المناعة ، بهتان البشرة، جفاف الجلد، تشقق الشفتين، تورم القدمين، تسوس الاسنان ،ضعف الدورة الدموية الصداع، الدوار ،  الاغماء المتكرر، هشاشه الاظافر، صعوبة في التركيز و ضعف الذاكرة، ضعف البصر ، انخفاض درجة الحرارة والاحساس معظم الوقت بالبرودة ، التهابات المعدة و القرحة، انخفاض نشاط الغدة الدرقية، وللاسف في أوقات كتير ممكن عدم العلاج يؤدي للوفاة 😭

2- مضاعفات نفسية:

الانسحاب الاجتماعي ، تقلب المزاج، الوسواس القهري، زيادة الحساسية حول وزن جسم، فحص جسمهم كتير ادام المرآه، العدوانية عند الاجبار علي تناول الطعام.

طيب ايه الأنواع اللي بنشوفها في الاضطراب ده 🤔؟؟

1-النوع التقييدي: واللي فيه بيقرر الشخص إنه يتبع الشخص نظام غذائي قاسي علشان يقلل وزنه ، أو مثلا يقرر يصوم وقت كبير ، أو إنه يعمل تمارين رياضية قاسية جدا علشان يقلل وزنه !

2- النوع التطهيري : واللي فيه ممكن يقرر الشخص إنه بيفرط في تناول الاكل بس بعد مابيأكل يدخل الحمام يتقيء بنفسه علشان يرجع كل الاكل ، أو يستخدم مسهلات كتير أو حقن شرجية 😱

 

 

طيب ايه المعلومات الاحصائية اللي ليها علاقه بالموضوع ده🤔؟؟ ١

) بتكون نسبة اصابته للاناث اكثر من الذكور بحوالي نسبة 20:1

٢) يبدأ عادة فى سن مبكر عند مرحلة البلوغ

٣) تصاب حوالي 5 إلى 10 من كل ألف فتاة مراهقة بهذا الاضطراب ولكن قد توجد بعض أعراض المرض (وليس كلها) لدى ما يقرب من 50 من كل ألف من الفتيات المراهقات.

٤) يبدأ غالبا" في سن14-19 ونادر حدوثه بعد30 سنة

٥) بيزداد في الدول المتقدمة وفى المهن التي تتطلب النحافة والآن يظهر كموضة تتعلق بها البنات.💃

٦) حديثاً بعض الدراسات أثبتت أنه ازداد انتشاره فى البلدان النامية وكذلك زادت نسبة الذكور عن قبل ويرجعون مش لزيادة الحالات ولكن لزيادة الوعى بوجود المرض وذوبان الحدود بين الدول وبين طبقات المجتمع وبين الجنسين نتيجة الانفتاح العالمي وثورة الاتصالات

٧) صاحب مشكله النهاردة ممكن يتصاب بالاكتئاب بنسبة 68% ، و القلق بنسبة 65% ، و الرهاب الاجتماعي بنسبة 34% ، و الوسواس القهري بنسبة 25%

٨) نسبة الوفيات تصل الي 18% بسبب احتقان القلب و فشل في وظائفه او خلل في سوائل الجسم.

طيب ايه أسباب الاضطراب ده 🤔؟؟

1- ضعف الثقة بالنفس مع وجود أسباب بيولوجية لكن غير واضحة🙍‍♀️

2- المقارنة المستمرة بأجسام الاخرين 🙇‍♀️

3- وصف المجتمع و سائل الاعلام بأن النحافة هو الشكل المثالي للاناث 🙎‍♀️

طيب ايه مسار و مآل الاضطراب ده 🤔 ؟

١)في الحالات اللي بتجيلنا وبيكون فيها الاضطراب بسيط او متوسط بيتم علاجه من خلال العلاج الدوائي و الجلسات النفسية

٢) ممكن يكون في انتكاسه.ثم الشفاء تماما

٣)طبعا من المؤشرات اللي بتصعب عمليه العلاج وجود خلافات اسرية ، و وجود اضطرابات اخري مع اضطراب فقدان الشهية العصبي مثل الوسواس القهري ، و الاكتئاب ، و اضطرابات الشخصية ( زي الشخصية الحدية ،او الشخصية الهستيرية ، او الشخصية الوسواسية )

٤) أما في الحالات الشديدة بيلزم دخول المريض في المستشفي وللأسف ممكن الاضطراب يوصل صاحب المشكله للوفاة نتيجة نقص الفيتامينات و السوائل في الجسم غلشان كده ماينفعش حتى نأخر خطوة العلاج .. كمان ممكن يوصل الشخص للانتحار عشان بيكون عاوز يخلص من المعاناه اللي بيكون حاسس بيها

طيب ازاي نقي نفسنا من الاضطراب ده 🤔؟؟

1- مهم نحمي اولادنا من مشكلة النهارده بأننا ندعمهم و نديهم الثقة بنفسهم و بلااااااااش نقارنهم بحد اطلاقاً كل واحد ليه طبيعه مختلفه عن التاني

2- ممارسه رياضه أو أنشطة محببه لينا

3- الوجود معظم الوقت في وسط ناس داعمه لينا

4- عدم التركيز علي نقد الاخرين لينا ( انتي امورة و الله 🥰) (و انت و الله العظيم وسيم😎)

طيب ازاي بنعالج الاضطراب ده لما بيزورنا المريض في عياداتنا 🤔؟؟

1- العلاج الدوائي : من خلال بعض الادوية اللي بتساعد في حل المشكلة زي بعض أنواع مضادات الاكتئاب وبعض أنواع مضادات الذهان

2- جلسات العلاج النفسي: بنعلم المريض..

١) ازاي يتعامل مع فكرته الملحه عن شكل جسمه و عن وزنه
٢)بنعلمه يغير صورته الذهنية عن جسمه
٣) بنعلمه يحددافكاره المشوهه او الخاطئة عن جسمه ببعض البرامج العلاجية.
٥)بنعلمه بعض الأساليب في التعامل مع مشكلته زي تمارين الاسترخاء
٦)بنعلمه ازاي يتعامل مع قلقه و مع ضغوط الحياة و مع مشاكله
٧)العلاج الاسري: طبعا بيكون مهم جداااا تدخل الاهل في مرحلة العلاج عن طريق إننا نعلمهم ازاي يتعاملوا في المشكله ديه مع اولادهم
٨)لو في خلافات في الاسره بيتم العمل علي حل هذه الخلافات
٩) بنعالج نفسيا الاضطرابات النفسية واضطرابات الشخصية المصاحبة

وفي النهايه لو عايز تعرف أكتر عن الاضطراب ده تقدر تتفرج على الفيديو .. ولو بتعاني من المشكله دي أو حد عزيز عليك بيعاني من الاضطراب ده تقدر تستفسر من خلال صفحتنا أو تتواصل معانا من خلال أرقامنا أو تزورنا في أقرب فرع ليك من فروع عياداتنا

إعداد: أستاذة / بسنت مجدي

مراجعة:د/ حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T