إضطراب التحول Conversion Disorders

النهاردة هنتكلم عن اضطراب نفسي مختلف شويه عن باقي الاضطراب التانية !!
ممكن نستغرب شويه من مشكله النهارده رغم إن ممكن تكون المشكله ديه عندنا 😯😮😱...او موجوده في ناس حوالينا بس بنكون مش واخدين بالنا😮😯
و للاسف ممكن نكون مش فاهمين ايه تفسير أعراضها ؟؟!!!! 🤷‍♀️

طيب في البداية كده .. يعني ايه اضطراب التحول 🤔؟؟

بكل بساطة ده معناه إن شخص ما مع حدوث ضغط نفسي عليه جامد بيبدأ يحصل عنده خلل في حركة جزء من جسمه .. أو فقد الاحساس في واحدة أو أكتر من حواسه الخمسة .. أوممكن يفقد الاحساس في حتة ما في جسمه .. وكل ده بيحصل بدون سبب عضوي والعيان مش بيكون قادر يساعد نفسه لان ده بيحصل مش بإرادته 😱!!

 

 

طيب ايه الأعراض اللي بنشوفها في المريض اللي بيعاني من الاضطراب ده لما يزورنا في عياداتنا 🤔؟

المشكلة اللي هنتعمق فيها النهارده لما شخص يتعرض لصدمة نفسية ..او فقد شخص عزير اوووي عليه أو تعرض لضغوط شديدة اووووي في حياته 💔 ...الشخص ده مش بيعرف يعبر عن حزنه او ضيقه 😥😓،

حتي مش بيعرف يعبر عن الصراع النفسي اللي بيكون حاسس بيه وياعيني بيكبت كل ده جواه 😢😭😭 ... فبيدأ يحل الصراع ده بأنه يهرب من الوجع 🏃‍♂️🏃‍♂️🏃‍♂️🏃‍♂️ اللي بيكون حاسس بيه !!
وللأسف ممكن هروبه يوصله بانه يتصاب يالاعراض دي: .

١) مشاكل في المشي والحركة لدرجة إنه ممكن يعاني من شلل في جسمه 🙀🙀 ..

اااااه بتوصل لكده سواء كان الشلل ده جزئي او كلي
!!

زي البنوته اللي بيكون متقدملها عريس و اهلها موافقين عليه جدا بس هي مش موافقه عليه خالص 😭 و مش عاوزاه لانها بتحب واحد تاني و اهلها مصرين انها تتجوزالأولاني ...و البنت مش قادرة تعترض و تقول لا مش عاوزاه .. فعماله تكبت في مشاعرها و في غضبها لحد مايجي اليوم اللي يبدا جسمها يتكلم و يقول مش قادر اتحمل اكتر من كده 😠😡 .. فتنام و هي حاسه بوجع كبيررر اووووي💔💔 و لما تيجي تصحي من نومها بتكون مش قادرة تقف علي رجلها او مش قادرة تحرك ايدها أصلا 💔

٢) ساعات ممكن الشخص يفقد حاسه البصر🤦‍♀️ !!

اااااه الحالة ممكن توصل انها مش بتعرف بتشوف😞 ،لانها لاوعيا بتكون شايفه ان ده افضل حل لمشكلتها دي !!

زي الزوجه اللي دخلت فجأه اوضه نومها لقت جوزها مع ست تانيه غيرها 🙀🙀 فبتكون مش عارف تتصرف ازاي🤬 ؟!!
فتبدأ ماتشوفش ..و بتروح عند كتير من الدكاتره و تكشف علي عينها و بيلاقوا إن العين مافيهاش مشكله من الناحيه الطبية والعضوية ..بس بتكون محتاجه علاج نفسي و بعد كده بترجع تشوف تاني 😀

٣) فقد النطق والكلام :

وده بيبقى النموذج الاشهر وهو اننا نلاقي الحالة دي مابتتكلمش خالص😶🤐🙊🙊 ..وممكن توصل لشهور مش بتقدر تتكلم خاااالص😟 !!
و لما تكون عاوزه حاجه بتكتبها ✍️.. و بترفض الكلام مع اي حد حتي لو اهلها 😱!! ٤

 ساعات بيفقد حاسة السمع :

فمثلا ممكن نلاقيه فقد حاسه السمع تماما 😟 .. وده بردوا بتكون نتيجه صدمة حصلت !!

زي الزوج لما يسمع مراته يومياً بتكلم راجل عليه و بتضحك و تهزر معاه 😱😱 ... ففجأه يفقد سمعه نتيجه انه تعرض لصدمة شديدة و بيكون مش عارف يواجه

🤷‍♂️🤦‍♂️!! ٤)الاغماءات المتكررة أو أعراض مشابهة للصرع :

ودي برده من الحاجات المشهورة🥴 .. فكل ماالبنت مثلا تتحط في موقف تقيل عليها اوووووي ..و مش عارفه تعبر عن مشاعرها فبيحصل بطريقه لا شعوريه اغماء و ممكن تتكرر في اليوم كتيررررر لدرجة إن ممكن كتير من الدكاترة يشخصوها إنها عندها صرع مثلا 😱!! ٥

 كمان احيانا بتوصل لفقدان حاسه اللمس :

لدرجه ممكن يتحط نار🔥🕯️ علي جسمها ومش بتحس بيها 😲😲 ...
او لما تتعرض انها تاخد حقنه 💉بتكون مش حاسه خااااالص 😑

٦) ساعات بيبقى الموضوع عبارة عن مشاكل في البلع والبنت مش بتقدر تاكل أو تبلع حاجه خالص طول الفترة دي 😱

كل دي أعراض ممكن تحصل ومش بيكون ليها أي تفسير عضوي ومش متطابقة مع الادلة التشخيصية للامراض العضوية !!

للاسف الاعراض دي لما تطول ممكن تعمل مضاعفات حقيقية وخطيرة ... زي ضمور في العضلات المشلولة لعدم استخدامها وساعات لما الاضطراب ده يجي لشخص اعتمادي فده ممكن يتحول معاه لمرض مزمن ويفضل في المرض ده وقت طويل وبياخد مننا مجهود كبير لحد مايخف 😱!

كمان ممكن المرض ده يؤدي إلى إشاعات وعمليات مالهاش داعي ممكن تأثر على صحة الشخص بجد 😱 !!

طيب ايه مسار ومآل الاضطراب ده 🤔؟؟

١) عادة الاضطراب ده بيبدأ في سن المراهقة أو الشباب وساعات أقل ممكن يحصل في منتصف العمر أو العقود الاخيرة من العمر 😱 !!

٢) عادة الاضطراب مش بيفضل مدة طويلة وزي مابدأ مرة واحدة برده بينتهي مرة واحدة

٣) ساعات النوبات دي بتتكرر وبيبقى اضطراب مزمن في حوالي ٢٥٪؜ من الاشخاص اللي بيعانوا من المشكلة دي وبتحصلهم أعراض تحولية تانيه في الخمس سنين التالية للمرض 😱

طيب ايه المعلومات الاحصائية اللي ليها علاقة بالموضوع ده 🤔؟؟

١)طبعا المشكله ديه بتكون موجوده في النساء اكتر من الرجال

٢) في معظم الوقت بيصاحبها أعراض اكتئابية أو أعراض قلق

٣) بيحصل أكتر في الطبقات الاجتماعية الفقيرة

طيب ايه الاعتقادات الخاطئة اللي ليها علاقة بالاضطراب ده ؟؟

١)كان زمان بيقولوا علي الاضطرابات التحولية لفظ هستريا ..وكلمة هستريا مشتقه من الكلمة اليونانية هسترون و كانوا يقصدوا بيها الرحم لإنهم كانوا معقتقدين ان المكشله ديه بتصيب النساء بس ، بسبب انقباضات و تحركات الرحم داخل المرأة ، وبالطبع ثبتت ان هذه النسبة خاطئة و ملهاش علاقة بالرحم اطلاقا 😀

٢) بيقولوا على المريض ده ساعات إنها محسودة أو إن معمولها عمل وهي مش بتكون كده خالص

طيب ايه أسباب الاضطراب ده 🤔؟؟

بيكون في اسباب كتيرة اوووي، بس من اهمها:

١) أسباب عضوية : إن بعض مناطق المخ تمثيلها الغذائي ممكن يكون متأثر شوية 😱!!

٢) ضغط نفسي شديد مع كبت الضغط ده في اللاوعي بتاع الشخص اللي بيعاني منه وكمان اتعلم العرض المرضي ده من واحد عانى من الاعراض دي من الناس اللي حواليه 😇!!

٣)التعرض لصدمات عنيفة اووووي زي ..  فقدان شخص عزيز او الفشل في علاقات عاطفية او الدراسة او الشغل او التعرض للاعتداء الجنسي او الزواج الغير مرغوب فيه 💔💔

٤) مشاكل اسرية زي استخدام العنف في تربية الاطفال او انفصال احد الوالدين 💔💔

٥) الحصول علي عطف و رعاية و اهتمام من الاخرين💞💞

٦)عادة الاضطراب ده بيحصل أكتر في البنات اللي عندها اضطراب الشخصية الهيستيرية أو الاشخاص اللامبالية أو الاعتمادية

طب ازاي نقي نفسنا من الاضطراب ده 🤔؟؟

١) مهم ان احنا نعبر عن مشاعرنا عشان لو ماعبرناش عن مشاعرنا بتكون عامله زي النار🔥🔥 بالضبط فالنار ديه بتقعد تحرق فينا لحد متانتعب اوووووي ...و يحصل مشاكل كتير زي المشكله دي !

٢) اتعلم اقول "لا" 🤚فالمواقف اللي لازم ارفض فيها👏
وكمان مهم جدا يكون موجود في حياتي ناس قريبة مني تدعمني و تحسسني بالامان💞❤️

طيب ازاي بنعالج الاضطراب ده في عياداتنا 🤔 ؟؟

1- العلاج الدوائي :

باستخدام بعض مضادات الاكتئاب وبعض المجموعات العلاجية الاخرى


2- العلاج النفسي :

١) بنتعمق في الصراع اللي بيدور جوا الشخص عشان يفهم الشخص نفسه

٢)بنعلمه ازاي يعرف يحل الصراعات ديه

٣) بنعلمه ازاي يعرف يحل مشاكله بافضل طريقه ممكنه

٤)بنعلمه ازاي يعبر عن مشاعره بصورة إيجابية

٥)بنسخدم العلاج المعرفي السلوكي و تمارين الاسترخاء

٦)بنستخدم العلاج النفسي التدعيمي

٧) بنستخدم العلاج الدينامي في علاجه

وفي النهايه .. لو حابب تعرف أكتر عن الموضوع ده تقدر تتفرج على الفيديو .. ولو حضرتك أو حد عزيز عليك بيعاني من المشكلة دي أو أي مشكلة نفسية أخرى تقدر تتواصل معانا من خلال صفحة العيادات أو تقدر تتصل بينا من خلال تليفوناتنا وتزورنا في فروع عيادتنا 😊

إعداد : أستاذة / بسنت مجدي

مراجعة : د/حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T