النوم واضطراباته : sleep disorder

في الموضوع ده هنتكلم عن أكتر الإضطرابات النفسية انتشاراً .. واللي ياما بيجيلنا في عياداتنا ناس بتعاني منه وللأسف في بعض الأحيان مع قلة خبرة بعض المتخصصين مش بيكونوا واخدين المشكلة دي بعين الاعتبار وبيتجاهلوها أو بيتعاملوا معاها كأنها حاجة عادية ومش بيساعدوا المريض فيها بصورة كبيرة .. وللأسف كمان بعض الناس اللي بتعاني منها بيفضلوا يشتكوا منها واللي حواليهم مش بيقدروا شكواهم وبيحسسوهم إن المشكلة دي ماتستحقش اللجوء لطبيب وبيضطروا بسبب كده إنهم يستحملوا أعراضهم بدون شكوى    ..

هنتكلم عن اضطرابات مشهوره جدا ومتوقعة جدا إنها تحصل لأي حد فينا ..
الجزء اللي بيحصلنا فيه الإضطراب ده ماحدش يقدر يستغني عنه لفترة طويلة .. ويوم ما بيعاني أي شخص منه فتقريبا هنلاقي إن كل جوانب حياته اتأثرت بشكل كبيررر جدا لدرجة إنه مش بيكون قادر يعيش يومه بصورة طبيعية

في النافذة دي كلها هنتكلم عن كل اضطرابات النوم

طب إيه هي اضطرابات النوم دي؟؟ 😴🙄
بكل بساطة دي عباره عن اضطرابات نفسية بتصيب الإنسان .. والاضطرابات دي بتأثر على طبيعة النوم بتاعه ..و بينتج عنها تغيير في طريقة وأسلوب نومنا ..وده طبعا بيأثر علي صحتنا وحياتنا بشكل عام..

طيب إيه أسباب إضطرابات النوم؟؟

( 1) ممكن تكون ناتجة عن مرض نفسي زي الاكتئاب و الفصام و غيرهم 
2) ممكن تكون ناتجة عن مرض عضوي زي أزمات القلب و الصدرأو أي مرض مزمن 
ممكن تكون نتيجة لإدمان المخدرات (3
4) ممكن تكون بسبب للخوف من الليل 
5) وكمان  ممكن تكون بدون سبب واضح للمشكلة 

طب هل اضطرابات النوم دي ليها أنواع؟🤔👀

آه طبعاً ليها أنواع كتير جداً وهنذكرها بالتفصيل في كذا موضوع لكننا هنبدأ هنا بأكثرهم شهرة وهو اضطراب الأرق  🤚

: Insomnia Disorder طيب يعني إيه اضطراب الأرق؟؟👁️👁️

في ناس كتير فاكرة إن كلمة أرق معناها الصعوبة في الدخول في النوم بس 🤚، في الحقيقة إن دة بيمثل فقط شكل واحد بس من أشكال اضطراب الأرق ..
وده لإننا بنلاقي ناس  بتعاني من الارق مش بيكون عندها صعوبة في الدخول في النوم لكن بيكون عندها صعوبة في تكملة النوم يعني مثلا لو واحد نايم الساعة ١٢ باليل والمفروض يصحي الساعة ٧ الصبح ، فجأة تلاقيه صحي الساعة ٣ الفجر👀 ومش جايله نوم تاني ومش عارف يكمل نومه 🙇
كمان من أشكال اضطراب الأرق انه دايما بيصحي كتير اثناء نومه ، بينام نوم متقطع و بيقلق كتير اثناء نومه 😢

طب إيه هي أسباب الاضطراب ده ؟؟ 🧐🧐
ممكن يكون بسبب
أ- إن الأرق أولي المنشأ يعني بدون سبب 🧏..
يعني إية الكلام ده ؟!!
يعني إن الارق ده مش بيكون نتيجة لأي اضطرابات تانيه او أمراض تانيه سواء كانت عضوية أو نفسية ..
طب إيه السبب برده اللي بيخلي الشخص عنده أرق أولي؟!! 🤷
١) كترة التفكير والتوتر قبل ما يدخل ينام
٢)كترة المشاكل و الضغوط اللي ممكن تحصل للشخص ده في يومه ، زي خناقه كبيرة حصلت في اليوم وكان فيها أصوات عالية ، زي الخناقات اللي ممكن تحصل في الأسرة أو في الشغل
٣) التوتر العصبي كل ماكان الشخص متوتر كل ماعانى من اضطراب القلق ، بالأخص بقي لو الشخص دة منتظر حدث مهم في اليوم الي بعده ، أو لو عنده إمتحان ، أو لو رايح مقابلة انترڤيو في شركة

ب- الأرق الناتج عن مرض عضوي 🤕
زي مثلا ماهنلاقي الشخص بيحصله أرق علشان بيعاني من ( الألم الشديد في جسمه - عنده أمراض في الجهاز العصبي - عنده أمراض في القلب - بتحصله أزمة في صدره- بيعاني من أمراض في الغدد الصماء- أو إن الشخص ده مابيكلش كويس - ممكن كمان تكون بسبب التقدم في العمر)

جـ - الأرق الناتج عن مرض نفسي 🥺
زي مرض ( الاكتئاب - الفصام - القلق - الهلع - نوبة الهوس- كمان الاشخاص الي بيتعرضوا لحوادث شديدة جدا بيلاقو صعوبة في الدخول في النوم)

د- كمان ممكن نلاقي إن بيحصل اضطراب الأرق بسبب تناول بعض المخدرات المحفزة زي ( الكحوليات و الكوكايين و الأمفيتامينات و المنبهات ) أو كمان ممكن يكون بسبب الأعراض الانسحابية من المواد المخدرة زي ( المنومات و الكحول و الأفيون)

هـ - ممكن يكون كمان بسبب عوامل بيئية زي الصوت العالي🗣️🎙️ أو النور المزعج أو بسبب ان الجو برد جدا 🥶او حر جدا 🥵

و- كمان ممكن يكون بسبب عوامل جينية 🦠

طب امتي بقي أقول ان الشخص ده بيعاني فعلا من اضطراب الأرق 👁️👁️؟؟ 
١- هنلاقيه زي مااتفقنا إنه عنده صعوبة في الدخول في النوم أو في تكملة نومه أو دايما بيصحى أثناء نومه
٢-  ده بيحصل علي الأقل لمدة ٣ أيام في الاسبوع ومستمر بالشكل ده لمدة ٣ شهور
٣- هنلاقي أعصابه مضغوطة وقلة النوم بقت بتأثر بشكل كبير جدا علي يومه و علي علاقاته و وعلي جوانب حياته سواء الاجتماعية أو الدراسية أو السلوكية
٤- هنلاقي إن رغم تهيئة الظروف المناسبة حوالين الشخص بردو مش عارف ينام
5- لو كان في سبب عضوي أو سبب نفسي او إدمان المخدرات

طب الناس الي بيحصلهم الإضطراب دة نسبتهم قد ايه؟ 🙄
هنلاقي إن اضطراب الأرق من أكتر اضطرابات النوم انتشاراً ، هنلاقي إن تقريبا تلت المجتمع بيعاني منه - 
 كمان نسبة الي بينطبق عليهم اضطراب الأرق حسب الموصفات التشخيصية هي ٦ لـ ١٠ ٪  

طب تعالوا نعرف مع بعض إيه بداية ومسار اضطراب الأرق؟؟🚶🚶
الإضطراب دة مالوش سن معين  يبدأ فيه ..ممكن يبدأ في أي سن ، بس هنلاقيه بيزيد كل ما الشخص اتقدم في العمر و ده ممكن يكون راجع لأمراض جسمانية ، وخاصة بيزيد عن الستات بعد انقطاع الدورة الشهرية 🚺،
ممكن كمان يحصل بشكل مؤقت بسبب ضغوط نفسية أو إجتماعية ..

جينا بقي لأهم نقطة وهي علاج اضطراب الأرق..🧐
لازم قبل اي حاجة لو اكتشفنا إن الإضطراب ده بسبب مرض نفسي أو مرض عضوي لازم نعالج المرض دة من الأساس في البداية..

هنلاقي كمان علاج اضطراب الأرق ينقسم إلي قسمين::-

١) العلاج الدوائي💊💉 / و دي بتكون أدوية مهدئة بتساعد علي النوم زي مجموعة البنزوديازبين أو مضادات الاكتئاب أو مضادات الذهان اللي بتعمل رغبة في النوم
٢ ) العلاج النفسي :
- العلاج المعرفي🧠 السلوكي 👣وهنركز فيها علي أسباب الأرق ومن خلالها بنشتغل عليها زي إننا بنقلل من توتر الشخص وكتر التفكير من خلال تعديل البناء المعرفي لأفكاره🗣️ ..
بجانب العلاج السلوكي 👥و دي بتكون عبارة عن إرشادات بننصح بيها المريض علشان تساعده أكتر علي النوم زي ..
إنه ماينمش علي السرير إلا في وقت النوم بس ولو مانمش في خلال ٥ دقايق يقوم يعمل أي شيء تاني لحد ما يجيله نوم ،
كمان إنه يقدر يغير مكان نومه ،
يسمع مزيكا هادية أو قرآن ويركز فيهم علشان يساعدوه علي الاسترخاء ،
إنه مايعملش تمارين رياضية ثقيلة قبل النوم ويُفضل إنه يعمل تمارين خفيفة زي المشي لمدة نصف ساعة ،
يتجنب المنبهات تماماً قبل النوم وكمان يتجنب الوجبات التقيلة🚫🚫

وفي النهاية .. لو بتعاني من المشكلة دي أو بتعاني من أي مشكلة نفسية تانية .. تقدر تستفسر عنها من خلال صفحتنا أو تقدر تتواصل معانا من خلال أرقامنا أو تزونا في فروعنا اللي هتلاقيها قريبة منك

إعداد : أستاذة / إيمان محمد

مراجعة : د / حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T