كرب مابعد الصدمة : P.T.S.D

قصص كتير سيئة بتمر علينا فى حياتنا ..بنشوفها سواء فى أهلنا أو مع أصحابنا و جيراننا.. أو حتى فى وسائل الإعلام و على مواقع التواصل الاجتماعى ..
زى حوادث القطارات ..أو الزلازل.. أو موت حد بطريقه بشعه .. أو مثلا حوادث الاغتصاب و الحروب و الحرائق ...
كل ده بيعدى علينا بس بنتأثر بيه مده قصيره و بنكمل و نعيش حياتنا عادى💁🏻‍♀️
لكن عادة كتير من اللى بيمر بالحادثه دي مابيكونش عادى 💔 على العكس بيعيش فى ألم و معاناة شديدة ...
تقريبا حياته بتختلف ١٨٠ درجه من قبل الحادثه لبعدها و ده بسبب إن الحادث بيكون أقوى من قدرة استيعاب الشخص و تحمله🤕 !!

و هنا بقى ممكن يصاب الشخص باضطراب نفسى اسمه اضطراب الانضغاط التابع لحادث صادم أو كرب ما بعد الصدمة. Post Traumatic Stress Disorder

طيب تعالوا نتعرف أكتر عن الاضطراب ده .. 👀

ده بيكون حالة من التوتر النفسي الشديد بتحصل بسبب التعرض لمحنة أو كوارث أو حوادث .. و ده بيكون رد فعل طبيعي للأحداث دي ، وخصوصا لو هو الوحيد اللي نجي من الحادث ..ونتيجة لكدة بيحصل للشخص أعراض ماكنتش موجودة قبل تعرضه للصدمة 😞

طيب إيه هي الأعراض الي بنلاقيها على العيانين اللي بيزورونا وبيكونوا بيعانوا من الاضطراب ده 🤔؟

١- الحادث بيفضل طول الوقت مسيطر علي أفكاره
٢- ممكن بينعزل تماماً عن العالم
٣- الإحساس بالذنب الشديد نتيجة إنه نجى من الحادث ده وما أنقذش اللي معاه
٤- بيحصله اضطرابات شديدة في النوم سواء كانت صعوبة الدخول في النوم أو مواصلة النوم
٥- ضعف من الناحية الجنسية
٦- ضعف في الذاكرة و نقص الإنتباه
٧- بيتجنب تماماً المثيرات المرتبطة بالحادث
٨- بيبذل مجهود كبير أوي في إنه يتجنب الأفكار أو المشاعر عن الحادثة دي
٩- ممكن يفقد الإهتمام بأنشطته السابقة اللي كان بيعملها سواء كان شغل أو دراسة أو رياضة
١٠- فقد تام للشعور و الإنفعالات ، خاصة المرتبطة بالتعاطف و الرفق
١١- بيكون مش عارف يعبر عن إنفعالاته بصورة سوية.. يا إما بنلاقي عنده سرعة الاستثارة ويبقى عنده عدوان شديد جدا وعصبية بتكون علي شكل إنفجار ..أو بتنعدم تماماً عنده القدرة في التعبير عن مشاعر الغضب
١٢-ممكن يبقي عنده سلوكيات اندفاعية كتيره زي مثلا ..إنه يغير شغله فجأة أو يسيب الشغل من الأساس وممكن يغير أسلوب حياته بصفة عامة.. أو إنه يقدم على المخدرات
١٣- كمان ممكن تظهر أعراض جسمية عنده زي الصداع الشديد و الدوار والرعشات
١٤- بتحصل اضطرابات شديدة في الأكل

كمان الإضطراب ده لما بيحصل للأطفال👶🏻 بتكون أعراضه مشابهه وممكن نضيف عليها ..
(إن ممكن نلاقي الطفل بقى أبكم ورافض الكلام تماماً عن الحادثة
..بيعاني من كوابيس دايما ..في حالة من الرعب و الذعر الشديد ..العنف الشديد .. كمان ممكن نلاقي عنده أعراض جسمية زي آلام المعدة و الصداع)

 

 

طب إيه هي الأسباب اللي بتأدي بمرضانا لحدوث الاضطراب ده عندهم 🤔؟؟

١- إستعداد الشخص البيولوجي
٢-سماته الشخصية القابلة لحدوث الاضطراب ده 
٣-السن خاصة الأطفال وكبار السن لإنهم بيبقى عندهم صعوبة في تحمل الحدث الصادم
٤-كمان ممكن يكون الشخص ده اتعرض لصدامات في الطفولة ، اتدفنت في العقل اللاواعي وحصل ليه إعادة معايشة  الصدامات دي مرة تانية و ده هيخليه يستخدم حيل دفاعية زي النكوص و الكبت والإنكار

طب إيه هي نسبة إنتشار الإضطراب ده 🤔؟ ❗

١) نسبتهم بتتراوح بين ٩ لـ ١٥٪ من اللي بيتعرضوا لحادث خطير جدا
٢)بتكون نسبتها في النساء أكثر من الرجال .٩٠٪ من اللي بيتعرضوا لحادث كبير

طب إيه هو مسار ومآل الأشخاص اللي بيصابوا بالاضطراب ده ؟🤔

الاضطراب ده بيحصل في أي سن و مش مرتبط بسن معين ..
و ممكن الاضطراب يتأخر حدوثه بعد الصدمة بأسبوع أو بعد الصدمة بسنين كتير  ..
و الأعراض بتتراوح بين الشدة و التحسن الجزئي مع مرور الوقت ..و هنلاقيها بتزداد كل ما الشخص يتعرض لضغط وبنقدر نتوقع مستقبل الحالة وبيكون في مسارين

المسار الاول :لو الشخص كان أداؤه الوظيفي كويس قبل الحادث و كان عنده علاقات إجتماعية جيدة ومفيش عنده أمراض عضوية أو أمراض نفسية تانية كل دة بيشير لتحسن الحالة بشكل سريع👍🏻

المسار التاني : هنلاقي بيحصل للشخص مضاعفات زي التجنب الرهابي لأي حاجة ليها علاقة بالحادث وبيكون عنده تقلب انفعالي شديد وشعور بالذنب ممكن إنه يؤدي بيه للانتحار
👎🏻
 

طب إزاي نقدر نقي نفسنا من الإضطراب ده أو إننا نقلل من شدة حدوثه ؟ 🤔

١- أول حاجة إننا نتعلم مهارات حل المشكلات
٢- تكوين علاقات إجتماعية بيسود فيها الحب والتقدير والمساندة والتشجيع
٣- تنمية الجانب الديني و الروحاني

جينا بقي لعلاج الإضطراب ده .. إزاي بنعالجه 🤝🏻 ؟؟

العلاج بيكون عن طريق قسمين..

١- العلاج الدوائي 💊بيكون عن طريق أدوية مضادة للإكتئاب و القلق


٢- العلاج المعرفي🧠 السلوكي👣 بيستغرق من ١٠ الي ١٦ جلسة بنستخدم فيها فنيات زي ..

الاسترخاء 
وقف الأفكار السلبية ،
تقليل الشعور بالعجز 
و التعرض المتدرج للتخلص من المشاعر و الانفعالات المرتبطة بالحادث لإزالة التجنب
 كمان بنعيد البناء المعرفي للأفكار

وفي حالة تدهور الحالة .. بيلزم إدخال المريض للمستشفي لو كانت الأعراض شديدة أو اتلاحظ عليه إحتمالية الانتحار لا قدر الله🧐

وفي النهاية ..لوعايز تعرف أكتر عن الاضطراب ده تقدر تتفرج على الفيديو ..
ولو بتعاني من المشكلة دي أو حد عزيز عليك بيعاني من الاضطراب ده تقدر تستفسر من خلال صفحتنا أو تتواصل معانا من خلال أرقامنا أو تزورنا في أقرب فرع ليك من فروع عياداتنا .

 

إعداد : أستاذة / إيمان محمد 

مراجعة : د / حاتم صبري 

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T