هوس نتف الشعر Trichotillomania

في الموضوع ده هنتكلم عن اضطراب نفسي بيحصل عند ناس كتير وبيكون مصدر قلق شديد ليهم ولكل الناس اللي حواليهم وهو هوس نتف الشعر 👧 !!

اضطراب هوس نتف الشعر بيكون أكتر في الاطفال والمراهقين.
ونسبته بتكون أكتر في البنات لدرجة إن بعض الإحصائيات بتقول إن نسبته في البنات أكتر من الولاد بنسبة 1:9😱

في الاضطراب ده بيكون عند الشخص اللي بيعاني منه نزعة متكررة ومستمرة معاه وقت طويل في إنه يشد شعره وبيكون حاسس بتوتر شديد قبلها ..ومش بيهدأ ويستريح غير بعد مايتخلع حبة شعر في إيديه..
وده بقى السبب اللي بيخللي الناس اللي بتعاني من المشكلة دي يفضلوا يكرروا شدهم لشعرهم علشان يهدوا التوتر اللي حاسينه ويحسوا بهدوء نفسي بعدها😎 !!

طبعا كلنا كبني أدمين بنتعرض لتوتر و قلق و بنتحط تحت ضغط سواء كان الضغط ده من المذاكرة أو كان ضغط الشغل أو ضغط علاقة ما أو أي ضغط من ضغوطات الحياة التانيه ..

في ناس بتعرف تعبر عن قلقها وبتتعامل مع الضغوطات ديه بشكل سليم 👌 ..و في ناس تانية بتعبر عن قلقها بأنها تقعد تنتف في شعرها😟.

اااااه ممكن تجيلنا بالعيادة بنوتة زي القمر بتقعد تمسك شعرها الطويل و تقعد تقطعه لحد ماتفقد جزء كبيرررررر جدااااااا من شعرها .. وممكن يوصلها لصلع في حته من شعرها أو شعرها كله ..وده ممكن يخليها تقرر تغطي شعرها طول الوقت سواء بباروكة أو طاقية أو تلبس الحجاب علشان بس ماحدش يشوف الصلع ده 😯😳😲 !!

الاضطراب ده مش بس بيكون في شعر الرأس .. لا ده كمان بعض البنات ممكن تقطع في شعر حواجبها أو رموشها ..
أو لو ولد بنلاقيه بينتف بإستمرار في شعر رأسه أو ذقنه أو شنبه😱!!

ساعات الناس اللي بتعاني من المشكلة دي علشان تداري على مشكلتها ممكن تقرر تنتف أماكن مستخبية في جسمها ومقبول نتفها إجتماعيا زي شعر الإبط والعانة !!

 

طيب ايه مسار ومآل الاضطراب ده ؟؟

زي ماقولنا قبل كده غالباً بيبدأ الاضطراب ده قبل أو خلال فترة المراهقة👫


في البداية عادة بيكون الشخص معتقد إنها مشكله جلدية وبيروح كتير عند دكاترة الجلدية وبيجرب أنواع كتيرة من الشامبوهات والكريمات ..وطبعا مش بيلاقي نتيجة عشان بيكون أساس المشكلة نفسي😇
وعلى فكرة عادة بينكر الشخص السلوك ده رغم وجود مناطق خالية في شعره لكنه بيخجل من إنه يقول المشكلة !!

لو ظهرت المشكلة في مرحلة الطفولة فعادة بتنتهي المشكلة دي بشكل سريع للأبد عن طريق العلاج بالجلسات النفسية وبالعلاج الدوائي
ولو ظهرت بعد سن 13 سنة: فبتميل المشكلة إنها تبقى اضطراب مزمن وبيبقى صعب التحسن شوية وبنكون محتاجين لعلاج مكثف علي عكس النوع الأول

طيب إيه أنواع هوس نتف الشعر ؟؟

1- النوع الاندفاعي:
بيعمل الشخص السلوك ده كإستجابة لرغبة ملحة في النتف وده بيخليه يحس بلذة لما ينتف شعره .. بس للأسف بعد إحساس اللذة ده بيشعر بالندم وممكن يدخل في نوبة بكاء هيستيري 😭😭😭💔💔

2- النوع القهري:
بيكون الشخص مضطر لفعل النتف و بيحاول يقاوم الإحساس ده بس مش بيقدر .. وبعد مايعمل كده بيحس بالراحة نتيجه تخلصه من القلق و التوتر (زي الفعل القهري في اضطراب الوسواس القهري )

3- نوع العادة : بيعملها الشخص و هو مش واخد باله.. هو بس  بيعملها علي سبيل عادة اتعود عليها

طيب إيه أسباب الاضطراب ده ؟؟

1- عوامل وراثية

2- خلل في الناقلات العصبية في الدماغ

3- لما يفقد الطفل الدعم بصورة كبيرة زي انفصال الوالدين أو فقد أحدهم أو إهمالهم ليه

4- لما يكون الشخص تحت ضغط سواء في المذاكرة أو في الشغل أو الحياة عموما

5- لما يكون الشخص متوتر و قلقان و بياخد شكل من أشكال الوسواس القهري


طيب ازاي نتفادي أو ازاي نتعامل مع مشكلة نتف الشعر؟؟

1) بإننا نتعلم ازاي نعبر عن مشاعرنا و نعمل تفريغ انفعالي زي الرسم أو ممارسة رياضة محببة أو نمارس هوايه بنحبها أو الكتابة

2) ندي الأمان لأبنائنا ونجنبهم مشاكلنا وخلافاتنا

طيب ازاي بنعالج الاضطراب ده في عياداتنا ؟؟

1- علاج دوائي ودي بتكون عبارة عن بعض مضادات القلق والاكتئاب وممكن بعض مضادات الذهان على حسب رؤية الطبيب

2- علاج معرفي سلوكي : واللي بنعلم من خلاله الشخص ازاي يتعامل مع القلق بشكل صحيح .. و ازاي يتعامل مع الفكرة الملحة وبنعلم الشخص ازاي يعبر عن مشاعره بطريقة سليمة

3- إرشاد أسري علشان نعلم الاهل ازاي يتعاملوا مع أولادهم 💪

وفي النهاية . لو حابب تعرف أكتر عن الاضطراب ده تقدر تتفرج على الفيديو .. ولو بتعاني من المشكلة دي أو أي مشكلة نفسية تانية تقدر تستفسر من خلال صفحتنا أو تقدر تتواصل معانا من خلال تليفوناتنا أو تزورنا في أقرب فرع من فروع عيادتنا 😊

إعداد : أستاذة بسنت مجدي

مراجعة : د/حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم : learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T