اضطراب الاختزان : Hoarding Disorder

مين فينا ماعندوش شخص فى حياته كل ما يروح عنده البيت يلاقى البيت زحمة من كتر الحاجات اللى محتفظ بيها !!؟

و مهما حاولت تقنعه إنه مش محتاجها مابيسمعكش و بيقولك أنا مش عايز أتخلص منها
💁🏻‍♀️🙄

طب الناس دى بنلاقيها ممكن تحتفظ بحاجات زى إيه؟؟🧐

علب ورنيش قديمة - أقلام فاضية - تذاكر المترو - أكياس شيبسى فاضية - أوراق مالهاش أي لازمة - هدوم من زمان جدا ، كمان في كتير أوي من الأمهات بتقعد تحتفظ بـ أدوات المطبخ وحاجات في البيت وتخزنها في حين إن الحاجات دي المفروض تترمي 😬
لدرجه إن الحاجات دى بتبقى زاحمه البيت أو زاحمة أوضة في الشقة بشكل مش طبيعي بتأثر على إستخدامها بس مش هيكون مرتاح لو ماعملش كده!!


ده ساعات الموضوع ممكن يوصل إن كمان بعض الأشخاص اللي بيعانوا من المشكلة دي مش بتقدر تعيش بشكل طبيعى في بيتها بسبب تخزينها لكم الأشياء الكتيره اللى مالهاش قيمة .🤕 !!

مش عايز أفاجئكوا ياجماعة🙈😅 ..بس ده أصلا اضطراب من ضمن الاضطرابات النفسية و إسمه اضطراب الاختزان..

طب تعالوا نعرف أكتر إيه هي أعراض اضطراب الإختزان ده ونعرف بنشخص ازاي في عياداتنا 💁🏻‍♀️ :؟؟

ده بيكون شخص بيجمع الأشياء و بيخزنها لدرجه إنه مش عارف يعيش فى المكان اللى قاعد فيه .. و ده بيعيق حركته فى البيت .

 

 

طب إيه هى صفات الشخص اللى بيزورنا العيادة وبيكون عنده اضطراب الاختزان! 🤔🤔

أول حاجة زي مااتفقنا بنلاقيه بيجمع حاجات قديمة ومالهاش أي استخدام ولا ليها لازمة أو مثلا صلاحيتها منتهية 🙆🏼‍♂️ -

تاني حاجة بنلاقيه صعب عليه أوي إنه يتخلص من الحاجات دي لدرجة إنها بتخلي المكان زحمة جدا 😫😫

-إحتفاظه وتخزينه بالحاجات دي بتخلي عنده ضيق و خلل في علاقاته على المستوي الاجتماعي و الوظيفي😤

- كمان بنلاقيه في أوقات كتير شخص متردد😣

- لما بندخل معاه جوه نفسه أكتر بنلاقي إنه بيكون عنده رغبه عالية فى المثالية و الكمال.👍🏻


-
بعض الناس بيكون عندها استبصار بالمشكلة والبعض الاخر مش بيكونوا شايفين إن في مشكلة أصلا وده اللي بيخلليهم يتمادوا في اللي بيعملوه ويبرروه

 

 

! طب إيه السبب اللي بيخلي شخص عنده ميل للتخزين دايما وللدرجة اللي بتعيق حياته ؟؟

- أول حاجة ممكن يكون الشخص ده باباه أو مامته أو قرايبه من الدرجة الأولي بيعملوا كده 🧏🏻‍♂️🧏🏻‍♀️

- ممكن كمان الشخص ده اتعرض لضغوط كتيرة جدا صادمه بالنسبه ليه وخصوصا لو كانت في مرحلة الطفولة ويمكن تكون هي اللي أدت لوجود المشكلة دي 😐

طب إيه هي نسبة وجود الاضطراب ده بيننا ؟؟


بتترواح نسبته ما بين ٢% إلى 6% و هتلاقيه فى الرجالة 👨🏻أكثر من الستات🧑🏻
لكن بيكون قليل أوي الحالات اللي بتلجأ لعلاج نفسي بسبب المشكلة دي

طيب إيه مسار ومآل الاضطراب ده ؟؟

بنلاقى إن الاضطراب ده بيبدأ بدرى ..
هنلاقيه فى سن 11 لـ 15 سنة و بيفضل مستمر معاهم فى مراحل عمرهم المختلفة لدرجة إنه ممكن يوصل إنه يبقى اضطراب مزمن .😓

طب ازاي نتجنب إننا نقع في الاضطراب ده✋🏻؟؟

كلامي للأم والأب إننا نحاول نخللي المكان اللي بيعيش فيه إبني أو بنتي منظم قدر الإمكان علشان نزرع ده جواهم من الطفولة
و أحاول إني أنا أتخلص من الأشياء اللي مالهاش لازمة في بيتي 😕
كمان ضروري إني أعلم إبني او بنتي التفرقة مابين الأشياء اللي ليها قمية في الوقت الحالي واللي مش هنحتاجها بعدين😉

جينا بقي لآخر حاجة وهي علاج الاضطراب ده وايه الوسائل العلاجيه اللي بنقدمها ليه في عياداتنا 🤝🏻👀؟؟

العلاج بيكون عبارة عن قسمين و ده اللي بنقدمه في عيادتنا

١-أول حاجة : علاج دوائي
و ده بيكون عن طريق أدوية بتقلل من الأعراض اللي بتصاحب الاضطراب ده زي مضادات الاكتئاب وبعض الأدوية المضادة للذهان😶

٢-العلاج المعرفي السلوكي 🧠👣وهنا بنشتغل علي الأفكار ومعتقدات الشخص الخاطئة لتخزينه للحاجات اللي مالهاش لازمة
وكمان علي سلوكياته الخاصة بالتخزين بحيث يقلل من تخزين الحاجات دي ويعيش بشكل طبيعي🤝🏻♥️

وفي النهاية لو حابب تعرف أكتر عن الاضطراب ده تقدر تتفرج على الفيديو .. ولو بنعاني من المشكلة دي أو أي مشكلة نفسية أخرى تقدر تتواصل معانا من خلال صفحة العيادات أو تقدر تتصل بينا من خلال تليفوناتنا أو تزورنا في أقرب فرع ليك من فروع عيادتنا 😊

 

إعداد : أستاذة إيمان محمد

مراجعة :د/ حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T