إضطراب الجسد المُشوَّه : Body Dysmorphic Disorder

ايه ده إيه ده !! 😱
إيه الحباية الكبيرة دي!!،
لالا أنا مش هنزل المدرسة النهاردة بسبب الحباية دي 😞!!
وأنا مالي تخنت أوي كدة ليه .. أنا ماكنتش كده 😩 !!
و أنا مش قادرة إني أواجه الناس بسبب مناخيري الكبيرة 😪اللي بتبوظ صوري كل أما أجي أتصور📸🥺!!
وأنا كمان ودني مطرطقة وكبيرة أوي👂🏻ومش قادرة أتعامل مع الناس بسبب إنها مبوظه شكلي خاصة إن شكلها مختلف عن بقيت الناس😑 !!

كام حد في حياتنا بنسمعه دايما بيقول الجمل دي سواء كان ولد أو بنت و بنستغرب جدا من مدى تصورهم  و انشغالهم  وتركيزهم علي الأجزاء دي من جسمهم علي الرغم إننا مش شايفين إن الموضوع كبير أوي كده زي ماهما شايفين🙄!!
اللي هو بنبقي عايزين نسأل نفسنا هو انت شايف حاجة زيادة عن اللي احنا شايفينه !! 🧐

هو فعلا بيكون شايف حاجة زيادة لإن الشخص ده بيكون معاناته كبيرة جداً 💔 لإنه بيعاني من اضطراب نفسي و اسمه إضطراب التشوه المتوهم للجسد Body Dysmorphic Disorder
وأحنا بنكون شايفنوا إنه بيتدلع ، وللأسف بيكون مافيش حد حاسس بيه 💔وشايفينه إنه مكبر الموضوع زيادة عن اللازم😥 

طب تعالوا نعرف ايه هو الإضطراب ده🤔؟؟

هنلاقي إن الشخص اللي بيعاني من المشكلة دي ,وهو جايلنا العيادة بيكون متخيل إن عنده تشوه كبير في شكل جسمه و مظهره علي الرغم إن الشخص ده شكله طبيبعي جدا و الحاجات اللي بيقول عليها دي تكاد تكون مش باينه للناس🤷🏻‍♀️ ...
بس للأسف انشغاله بيها بيكون ضخم جداً🤦🏻‍♀

 

 

طب إزاي بنشخص الاضطراب ده لما حد يزونا في عياداتنا ؟؟ 🤔

١- أول حاجة بنلاقي ان الشخص ده مشغول أوي بعيب أو بأكتر من عيب في مظهره الجسدي على الرغم إنها مش ملحوظه من الأساس أو بتكون بسيطة جدا 🤏🏻😶!!

٢- تاني حاجة بنلاقيه رايح جاي علي المراية وبيتابع شكله دايما وهنلاقيه دايما بيقارن نفسه وشكله بالناس اللي حواليه 🔍 !!

٣-كمان هنلاقيه بينعزل اجتماعياً مش عايز يشوف حد ، كمان ممكن توصل إنه مايرضاش يروح شغله أو دراسته بسبب كده 👎🏻!!

طب إيه السبب  اللي بيخلي الشخص ده كده من الأساس؟🤨🤨

١- أول حاجة ممكن يكون الشخص ده اتعرض في خلال فترات نموه للنقد في الجزئية المنشغل بيها ، زي مثلا حد اتريق علي شكل ودانه👂🏻 أو شكل مناخيره 👃🏻أو جسمه بصفة عامة ..
فهنلاقي إن الشخص ده بيعمل حيل دفاعية كتيرة أوي زي الكبت و الإسقاط والتشويه و الإنشقاق و الترميز 👉🏻

٢- تاني حاجة هنلاقي إن الشخص ده ثقته بنفسه قليلة جدا وبيكون عامل تهوين للمميزات ومكبر بس في عيوبه وبيضخمها للأسف ، علي الرغم إنها مش ملحوظة أساساً

طب إيه هو مسار ومآل الناس اللي بتعاني من الاضطراب ده🤔 ؟؟

هنلاقي إن الاضطراب دة بيبدأ في سن المراهقة 🧒🏻وبيفضل مستمر مع الشخص لحد العشرينات والتلاتينات كمان 👱🏻‍♂️...
ده كمان لو الموضوع زاد معه والفكرة فضلت موجوده ممكن يلجأ لعمليات جراحية وتجميل💉 وهو مش بيكون محتاج ده أساساً وهي اللي ممكن تأذيه فعلا  😏

طب إزاي نتجنب إن الإضطراب ده مايحصلش من البداية✋🏻🤔؟

كلامي هيكون للأم والأب عشان نقدر نعمل وقاية لأولادنا من حدوث الاضطراب ده 🚫 ...

١)لازم في طفولة ابني او بنتي أنمي ثقتهم بنفسهم وبشكلهم وبمظهرهم✔️، واتجنب تماماً✖️ أي نقد ممكن إني أنا أقوله علي شكلهم حتي لو من باب الهزار ، لإن ده بيعملهم خلل في صورة ذاتهم ↙️

جينا بقي لآخر وأهم حاجة وهي..
إزاي بنعالج مريض اضطراب التشوه المتوهم للجسد لما يزورنا في العياده 💊🤔؟؟

العلاج بيكون عبارة عن قسمين

١-العلاج الدوائي📝: و ده بيكون عبارة عن أدوية مضادة للاكتئاب وأحياناً بتكون الأدوية المضادة للذهان مفيده في الحالة دي 👌🏻

٢- العلاج النفسي : زي العلاج المعرفي🧠 السلوكي👣 و هنا بنشتغل علي أفكار و معتقدات الشخص ده عن تشوه جسمه .. وبنعدل من الأفكار دي تماماً وبنخلي الفكره في حجمها الطبيعي 👌🏻 ...

كمان بنقلل من السلوكيات المصاحبة للاضطراب زي الخلل الإجتماعي والوظيفي وإننا نساعده إنه يقدر يعيش حياته بشكل طبيعي🤝🏻♥️

وفي النهاية ..لو حابب تعرف أكتر عن الاضطراب ده تقدر تتفرج على الفيديو .. و لو حضرتك أو حد عزيز عليك بيعاني من المشكلة دي أو أي مشكلة نفسية تانية تقدرتستفسر  من خلال صفحتنا أو تتواصل معانا من خلال أرقامنا  أو تقدرتزورنا في أقرب فرع من فروع عيادتنا 😊

إعداد : أستاذة / إيمان محمد

مراجعة : د/حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T