الرهاب الإجتماعي: social phobia

تعالوا نتكلم عن قصة شاب أو شابه ومن خلال القصه ديه هنعرف احنا النهارده بنتكلم عن مشكله إيه 😉😉

 شاب أو شابة في جامعة عنده بكره عرض مشروع التخرج بتاعه  قدام زمايله والدكاتره في الجامعة ..
قاعد خايف وقلقان ومتوتر جدا ..
عنده فكره مسيطرة عليه جداااا إن الناس هتقيمه ازاي ؟ والناس هنشوفه ازاي ؟ وأدائه هيكون كويس ولا لأ ؟
و نتيجه فكرته ديه للأسف بيقعد يتوقع الأسوء وهو إن الناس هيكون تقييمها ليه سلبي
أو الناس هتسيب العرض بتاعه وهيمشوا ..وإن مافيش حد هيسقف ليه .. ودكتور الماده هيديله درجة وحشه ..
وقاعد طول الليل يفكر ويتخيل السيناريوهات السلبية لحد ما مبيعرفش ينام ..
يجي تاني يوم يصحي من نومه اللي هو أصلا مانامهوش طول الليل!
و يبدأ يلبس لبسه وهو متوتر وقلقان وخايف وبيكون مش قادر  يفطر ولا قادر إنه يكلم حد علي الصبح ،
المهم هيقاوم شويه وهيروح الجامعه بس هو طول الطريق للجامعه مرعوب وخايف ومتوتر ويدخل قاعة العرض .. يبدأ يحس بإرتباك ورعشه في إيده وضربات قلبه سريعه .. ومش قادر ياخد نفسه و حاسس بخنقه و معدته بتبدأ توجعه ،
في الوقت ده الشخص بيجيله مليون فكره في دماغه ،
أنا ايه اللي جابني هنا، أنا مش عاوز أعمل العرض ده ، أنا هعرض عشان الناس تتريق عليا ، أنا هجري 🏃‍♂️🏃‍♂️🏃‍♂️🏃‍♂️
الشاب فضل يضغط علي نفسه لحد ما هرب من الموقف وعمل نفسه تعب وأغمى عليه  ،
ماهو من زمان الشاب ده كان  بيتجنب الدخول في مواقف إجتماعية من أيام ماكان بيقعد في الفصل والمستر بيسأل سؤال وهو بيكون عارف إجابته كويس جدا ومع ذلك مش بيرفع إيده !!

 

أعتقد عرفنا احنا هنتكلم عن مشكله إيه دلوقتي؟؟ 😉


أيوه الرهاب الاجتماعي / sacial Phobia

عشان أكون صريح معاكوا كلنا بنتعرض لده، تعالوا نفتكر أول مره عملت فيها presentation ، و أول مره اتعرفت علي ناس جديده ، وأول مره طلعت فيها علي التليفزيون ، أو أول مره تامر حسني ظهر فيها علي التليفزيون 😂😂 أول مره كنت طبعا قلقان و متوتر بس مع ذلك كملت في الموقف و بقيت تتعرض للموقف ده بعد كده و بقي عادي بالنسبالك ..
بس مشكله الشاب ده انه مش بيقدر يعمل كده وكل مره بيتعرض للموقف ده بيكون خايف ومتوتر جدا و ممكن يوصل بيه إنه يتجنب أو يهرب من الموقف

طب عايزين نعرف أكتر يعني إيه رهاب اجتماعي 🤔؟؟

الرهاب الاجتماعي بيكون اضطراب نفسي ناتج عن خوف شديد وقلق وتوتر من موقف أو أكتر من المواقف الاجتماعية ،
ببساطة أكتر يعني شخص بيعاني من مشكلة التواجد مع الناس. وهو مش فاهم هى إيه المشكلة من إنه يبقي موجود وسط ناس 🤔؟؟
المشكلة بوضوح إن الشخص لما يكون في إجتماع مع الناس سواء كان في شغل أو مناسبات اجتماعية بيبقي شايل هم الناس هتشوفه ازاى ، هكون معاهم إزاى ، هقول إيه ، كلامي مش هيكون كويس ، أنا مش هعجبهم ، يعني بيفكر فى حاجات سلبية عن صورته وشكله قدام الناس

هل ده معناه إن الناس اللى عندهم رهاب اجتماعي مش بيتعاملوا مع الناس 🤔؟؟

مش كل الناس ، الرهاب الاجتماعي ليه نوعين :

1- رهاب اجتماعي نوعي : هنا بيكون الرهاب أو الخوف الاجتماعي خاص بموقف معين ، يعني الشخص في المرحلة دى بيتعامل مع الناس عادي واجتماعي وله أصدقاء ، لكن بيكون في مواقف محددة بتقلقه زي مثلا إنه يكتب قدام حد ،أو يتكلم قدام ناس أول مرة يشوفها

2- رهاب اجتماعي عام : ده بقي من كل حاجه ببقلق من إنه يروح أي مكان فبه ناس ، أو يتواجد في وسط ناس سواء يعرفها أو ميعرفهاش ، و بيكون قلقان جدااا لو هيحضر أفراح أو مناسبات اجتماعيه أو إنه يتكلم قدام حد ، من الاخر كده بيكون قلقان و خايف إنه يواجه الناس في أي وقت و في أي مكان ،

المشكله هنا بتظهر في أكتر من موقف من المواقف الاجتماعية
تعالوا أقولكم علي سر :

تفتكروا إيه لغة الجسد اللي بتظهر علي الشخص ده ؟!
المريض ده عادة لما بيزورنا في العيادة ..
- تلاقيه قاعد وراسه و نظرته تجاه الارض
- صوته بيكون واطي أوووي ، يكاد يكون مش مسموع
- ولو اتكلم بتلاحظ تأتاه في كلامه ، وبيكون متوتر في إختيار كلامه
- ولما بيتكلم مش بيبص في عين الشخص اللي قدامه

طب إيه العلامات أو الأعراض اللى ممكن تخلينا نعرف إن شخص ما بيعاني من الرهاب الاجتماعي 🤔؟؟

الدليل التشخيصي الإحصائي الخامس وضح لينا الأعراض اللى لو لقيتها فيك أو في أشخاص حواليك تقدر تقول إن عندك أو عندهم رهاب اجتماعي وبالتالي محتاجين للمساعدة النفسية ،
وهي :-


1- إن يحس الشخص بخوف واضح وقلق شديد من موقف أو أكتر من المواقف الاجتماعية اللى بيكون فيها الشخص موضع أنظار الآخرين.

2- بيحس الشخص بالخوف من إنه يتصرف بشكل محرج قدام الناس أو خوف من إنه يبان عليه القلق قدام الناس وبالتالي يترفض أو يتهان من الناس 😔😓.

3- يتجنب الشخص المواقف الاجتماعية اللى بتسبب ليه القلق والخوف😧.


4- كمان لازم يكون المواقف الاجتماعية اللى بيخاف منها طبيعية وماتستحقش الخوف الشديد ده .


5-يستمر الخوف والقلق ستة شهور أو أكثر.


6- بيؤدي الخوف والقلق ده لمشاكل في علاقته مع الناس أو مشاكل في العمل أو في التعليم.

 

 

كمان عشان نعرف قد ايه الناس اللى عندها المشكلة دي بتعاني لازم نعرف الخساير اللى بيعملها الرهاب الاجتماعي ..
هو كمان لسه في خساير 😯🤔؟؟


أيوه بالتأكيد ، الناس اللى عندهم الاضطراب ده مش بس بيعانوا لا ده كمان بيلاقوا نفسهم بيخسروا حاجات كتير زي .. 😥😢: -


1- الناس دول بيبقى عندهم خجل زائد ، وده بيخليهم ممكن يتعاملوا بشكل سلبي مع المشكلة ويتعاطوا المخدرات.


2- الناس دول بيخافوا يعبروا عن رأيهم ، وكمان ممكن يتنازلوا عن حقوقهم كنوع من الهروب من الموقف الإجتماعي اللى بيسبب ليهم خوف ، زى الشخص اللى مستني دوره في طابور فيسمح لشخص تاني وثالث إن يأخذ دوره من غير حتي ما يعترض.


3- كمان هما بيخافوا من إنهم يتعرفوا على أشخاص غريبة أو يتحطوا في مواقف جديدة ، وبالتالي حرمانهم من إستغلال الفرص والتعلم من التجارب الجديدة.

4- عندهم حالة من الرعب لما يتعاملوا مع شخص أعلى منهم في المكانة زى المدير أو دكتور الجامعة ، وبالتالي محرومين من الترقية والوصول لمناصب عالية فمش هيقدروا يحققوا ذاتهم.

5- ممكن بيخافوا من التعامل مع الجنس الآخر ، فبيكون صعب عليهم الزواج والارتباط بشريك الحياة.

6- الشخص ده أول ما يتعامل مع شخص غريب بيحصله تغيرات فسيولوجية بيبدأ يحس بخوف شديد وضربات قلب سريعة وأطرافه بترتعش وبيحس أنه مخنوق والكلام محبوس مش قادر يتكلم ، يعني بيفقد السيطرة على نفسه ،
ونتيجة كل ده ممكن يتصرف بعصبية ويكون رد فعله غريب ومش مناسب للموقف ، وبالتالى مش هيقدر يدير الحوار بشكل جيد وهيفقد التواصل مع الآخرين.

7-نتيجة عدم الثقة في شكله وتصرفاته ممكن يلجأ لعزلة شديدة جدا ، فيعاني من إكتئاب نفسي.

الناس دي إيه اللى وصلهم لكل ده 🤔؟؟

نقدر نقول إن الرهاب الاجتماعي بيظهر عند الشخص نتيجة تفاعل عدة عوامل منها :


1- ممكن يكون للأسرة وطريقة التربية دور كبير في حدوث الاضطراب ، يعني بنلاقي الآباء مفرطين في حماية أطفالهم أو أكثر تسلطا وعنفا في التعامل معاهم بحيث مابيسمحوش ليهم في التعبير عن آرائهم.

2- التعلم برده ليه دور في حدوثه ، فمثلا من الممكن يكون الآباء بيقلقوا جامد في المواقف الاجتماعي ، فيتعلم الشخص إنه يستجيب للمواقف الاجتماعية بنفس طريقة الآباء.

3- ممكن تظهر المشكلة دي عند الشخص بعد مايتعرض لموقف مزعج أو محرج أو التنمر عليه.

4- سمات الشخصية ، زي إن يكون الشخص أكثر حساسية لأى إساءة انفعالية حتى لو كانت بسيطة سواء اتعرض ليها بشكل مباشر أو اتعرض ليها شخص قدامه.

5- فقدان الثقة بالنفس ، من الأسباب التى تخلي الشخص في حالة رهاب من كل المجتمع ، وده لإنه مش بيشوف في نفسه غيرالسلبيات فقط.

 

طب إيه الحل 🤔؟؟

الحل هيكون في إننا نعالج المشكلة وده هيكون بطريقتين :

1- العلاج الدوائي : لو الحالة محتاجة أدوية عشان تهدى من أعراض التوتر والقلق اللى بتحس بيها .


2- العلاج النفسي : هيرتكز على جانبين مهمين في التعامل مع المشكلة وهما :

- •الجلسات الفردية : وده عشان نحقق منها مجموعة من الأهداف زي إدراك الشخص للأفكار السلبية المتعلقة بذاته وتغييرها ، وزيادة وعي الشخص بذاته ، والمساعدة على تحديد نقاط القوة والضعف ، تنمية بعض المهارات النفسية زي ثقة الشخص بنفسه ، وتنمية المهارات الاجتماعية.

•العلاج الجمعي : وده حجر الأساس في التغلب على المشكلة ، احنا ببساطة  بنطبق فيه اللى اتعلمناه في الجلسات الفردية ، عن طريق لعب الأدوار لاكتساب الراحة والثقة في المواقف التى تسبب القلق والتوتر

وفي النهاية ..لو عايز تعرف أكتر عن الاضطراب ده وطرق العلاج تقدر تشوف الفيديوهات اللي في أخر الموضوع ...
ولو حضرتك بتعاني من المشكلة دي أو حد عزيز عليك بيعاني من المشكلة النفسية دي أو أي مشكلة نفسية تانيه  تتقدر تستفسر عنها من خلال صفحتنا أو تتواصل معانا من خلال أرقامنا أو تزورنا في أقرب فرع ليك 

إعداد : أستاذة / دعاء محمود

مراجعة : د / حاتم صبري

 

 

 

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم : learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T