ثنائي القطب : Bipolar

كام مرة سمعنا عن ناس أغنياء جداً وفجأة خسرت كل فلوسها دي وضيعتها على حاجات ماتستاهلش وبنستغرب إزاي الناس دي عملت كده !!😲

كمان كل كام شهر بنلاقي فيديو بينتشر على مواقع التواصل الإجتماعي لشخص بيدعي ويقول أنا المهدي المنتظر ويحاول بيقنع الناس بكده .. وكلنا كنا بنقعد نقول على الشخص ده إنه أكيد مش طبيعي !!😯

كمان كلنا بنسمع عن جرائم كتير منها بيكون جرائم قتل أو خناقات عنيفة من أشخاص لما بيجو يحققوا معاهم أهله بيثبتوا إنه ماكانش في وعيه لما عمل كده !!😣

وعلى فكره .. في معظم الوقت بنلاقي نماذج الناس اللي ذكرتها دي مش بتكون فعلا في وعيها وهي بتعمل السلوكيات دي و بيكونوا غالبا بيعانوا من اضطراب نفسي هو اللي سبب ليهم كل المشاكل دي !!  😱

طيب إيه هو الاضطراب النفسي اللي ممكن يخللي الشخص تظهر عليه تصرفات زي دي 🤔 ؟؟

عادة ده اضطراب نفسي بيحصل في وجدان الشخص  وعلشان كده بنسميه ..

"الاضطراب الوجداني ثنائي القطب .. وبيكون الأشخاص دول ساعتها في حالة بيسميها الطب النفسي ..نوبة هوس ..

المشكلة دي عادة لما بيجي اللي بيعانوا منها لعياداتنا ..

كتير بنلاقي أصحابها قبلها اتعرضوا لضغوطات نفسية كبيرة😱 !

أوقات كمان بتيجي مع تعاطي المخدرات وخاصة مخدر الحشيش والمنشطات !!

كمان الإضطراب دة بنلاقيه عند بعض المشاهير والمبدعين !!
🤕

 

 

طب إيه هو الاضطراب ده وإيه هو تعريفه 🤔؟؟؟

هقولك ...

اضطراب( ثنائي القطب) والمعروف سابقا باسم "الاضطراب الهوسي أو نوبات الهوس والاكتئاب"

ده عبارة عن حالة صحية عقلية بتتسبب في تقلبات مزاجية كبيرة وبيبقى فيها مزاج الشخص بيعلى أوي أوي أوي  😂وده بنسميه نوبات هوس ..
وكمان في أوقات تانيه المزاج بيقل أوي 😩وده بنسميه نوبات إكتئاب

طب إيه هي أسباب الاضطراب ده 🤔؟

هو لحد دلوقتي العلماء ماوصلوش لسبب محدد لحدوث الاضطراب ده🧐 ..

بس زي كتير من الاضطرابات النفسية بيكون ليه أسباب وراثية وجينية ..وكمان أسباب نفسية واجتماعية زي ماهنوضح دلوقتي ..

ودي فعلا بتكون أسباب النوبات اللي بتيجي عند مرضانا اللي بيزورونا في عيادتنا وبيعانوا من النوبات دي  ..

١) بعض التغيرات الكيميائية 👨‍🔬في تركيبات بعض النواقل العصبية زي النورأدرينالين والدوبامين والسيروتونين في خلايا المخ🧠 .

٢) أسباب جينية 🧬: الدراسات بتأكد إن المرض ده ممكن يتنقل بالوراثة وإن إحتمالية حدوثه في التوائم المتماثلة أكتر بكتير من التوائم غير المتماثلة ..
كمان بتزيد إحتماليته لو حد من قرايب المريض من الدرجة الأولى زي الأب أو الأم أو حد من اخواته مصاب بالاضطراب ده .

٣) العوامل الإجتماعية والنفسية 👨‍👩‍👦: 
ودي بيكون ليها دور كبير خصوصا مع وقت حدوث أول نوبة وخصوصا جدا لو الشخص اللي عنده استعداد وراثي اتعرض لضغط نفسي شديد زي فقد حد عزيز عليه أو انتهاء علاقة أو الثانوية العامة أو الجيش.
أو حتى في شهر العسل👰

٤) ساعات بيبقى في أسباب عضوية مباشرة 🫀:
زي بعض المشاكل في المخ ( الجلطات أو الاورام أو الخرف ومرض التصلب المتناثر ).
وساعات ممكن يكون بسبب مشاكل في الغدد الصماء ( زيادة نشاط الغدة الدرقية ومتلازمة كوشينج ).
أو بسبب تعاطي الستيرويدات والحشيش والكوكايين والأمفيتامينات
وكمان مع بعض الأدوية المضادة للإكتئاب لما بتتاخد بدون إشراف طبي 👨‍⚕️.

 

 

 

طب إيه هي أعراض الاضطراب ده واللي بنشوفها على مرضانا اللي بتزورنا في العيادة ؟؟ 🤔🤔

أولا احنا هنلاقي إن أعراض الإضطراب بتختلف علي حسب نوع النوبه ( هوس ولا إكتئاب ) ..
يعني لما يكون المريض في حالة هوس بنلاقيه بالإضافة لأعراض السعادة الشديده أو العصبية الشديدة 🤯بتكون عنده الأعراض دي

1) الشعور بالعظمة والثقة بالنفس 😎 : أكتر من الأشخاص العاديين أو الشخص نفسه لما يكون في حالته الطبيعية !!
لدرجة إنه ممكن يوصل بيه الأمر إنه يقول علي نفسه إنه نبي أو المهدي المنتظر أو إنه صاحب نفوذ عالي ..وبنلاقيه بيتصرف كمان بناءاً علي كده 😱

2) قلة النوم مع عدم احتياجه للنوم 🛏 :
فتلاقيه بيفضل صاحي لفترة طويلة جدا ومابيحسش بالتعب ..أو إنه يكون نومه قليل جداً لدرجة إنه ممكن يعدي عليه أيام ماينامش .. ولو نام هيبقى بكتيرها ساعتين تلاته !!

3) بنلاقيه بيتكلم كتير جدا 🗣وتقريبا ماحدش بيقدر يوقفه
شوية نلاقيه بيتكلم كلام مفهوم وشوية لا..
وممكن يكون كلامه مليان أغاني ، نكت، شعر وعادة الكلام اللي بيقوله بيبقى بصوت عالي جداً..

4) تطاير وتسارع الأفكار 💭: المريض ده بتكون عنده أفكار كتير أوي ومالهمش علاقة ببعض جوا دماغه .. وبيكونوا متلغبطين على بعض لدرجة إنه بيبقي حاسس بدوشه كبيرة أوي جوا دماغه ( دماغه زي الشريط السافف )

5) سرعة التشتت 🙆‍♀️: بنلاقيه مابيعرفش يركز في حاجة واحدة لمدة طويلة علشان كده بنلاقيه بيتشتت مع حاجات كتير في نفس الوقت

6) كثرة الحركة 🪂: هنلاقيه بيتحرك كتيرر جدا زي الأطفال ومابيستريحش وبرده مابيتعبش 😇

7) بنلاقيه مهتم بأنشطة كتير أوي و غريبة جداً : 🧗‍♂️
وبيكون أهم حاجة فيها إنها تسببله السعادة حتي لو خسرته أو خسرت غيره ..زي مثلا إننا نلاقيه ينفق ثروته كلها في حاجات مالهاش لازمة ، يبيع حاجات غالية جدا بسعر رخيص جدا 💍..
كمان بيخش في مشاريع كتير في نفس الوقت وكلها مش بتكون مفيده أوي ومش مدروسه خالص
🏣

وفي أعراض تانيه زي :😶

8 )زيادة التواصل الإجتماعي 👯‍♀️:
ده بيكون عند مريضنا بشكل مبالغ فيه أوي ، فهنلاقيه بيتكلم مع أي حد مايعرفوش ويهزر معاه ،
ممكن نلاقيه يلبس وينزل ويزور قرايبه أو أصحابه أو يتصل بيهم الساعة ٣ الفجر ويكون أصلا مش بيكلمهم من سنين ..وبيكون ماعندوش أي مشكلة في
 كده

9) كمان زي ما قولنا بنلاقيه مش طول الوقت مزاجه فرحان ومبسوط بالعكس ..ساعات ممكن كمان نلاقيه عصبي جدا وعنيف وعدواني وبيشتم وبيتخانق مع الناس في الشارع .. وخاصة مع الناس اللي بتعارض أفكاره🗡

10) هنلاقيه كمان بيفك إلتزامه ومش بيحترم أي قيود إجتماعية أو أخلاقية للأسف ، فهنلاقيه أثناء نوبة الهوس رغبته الجنسية بتزيد جدا لدرجة إنه ممكن يتحرش بالناس أو يخش في علاقات جنسية خطيرة !!

11) بنلاقي عنده إندفاعية شديدة جدا زي إنه يسوق العربية بسرعة جنونية وهو مش حاسس بأي خطر عليه أو علي الناس اللي معاه...أو نلاقيه بيخش في مشروع مش محسوب يخسر فيه كتير ..أو يتجوز بدون أي تقييم لوضعه أو لشريكه

أما لما يكون المريض في حالة اكتئاب بتكون أعراضه زي اللي اتكلمنا عنها بالتفصيل في إضطراب الاكتئاب وهي 😞

١)بيكون دايما حاسس بالحزن و ضيق الصدر والاكتئاب

٢) مش قادر يستمتع بأي حاجة مبهجة في حياته

٣)بيحصله إضطرابات في النوم زي الأرق أو النوم الكتير😴

٤) بيحس ببطيء في حركته أو عصبيه زيادة

٥) ماعندوش طاقة لأي حاجة وطول الوقت حاسس بتعب

٦) بيبقي عنده صعوبه في التركيز ومش عارف ياخد قرار وبينسى دايما

٧)بيحصله ألم في جسمه زي صداع أو وجع في بطنه

٨) بيكون عنده نقص تقدير الذات وعدم الثقة بالنفس

 

أما أعراض النوبة المختلطة بتكون مزيج بين أعراض نوبة الهوس وأعراض نوبة الاكتئاب

ملحوظة ١: أعراض الهوس لازم تبقى شديدة وعلى الاقل لمدة أسبوع

ملحوظة ٢: أعراض نوبة هوس خفيف بتكون أقل من أعراض الهوس وبتكون على الأقل مدة ٤ أيام

ملحوظة ٣: أعراض الاكتئاب بتكون  فترة لاتقل عن أسبوعين

طب إيه هي أنواع الاضطراب ده 🤔؟؟

اضطراب ثنائي القطب النوع الأول :واللي فيها بيتصاب المريض بنوبة هوس كبيرة لمرة واحدة على الأقل وممكن ييجي قبلها أو بعدها نوبات هوس خفيف أو نوبات إكتئاب.

اضطراب ثنائي القطب النوع التاني : إن المريض يتعرض لنوبة إكتئاب عظمى واحدة على الأقل ويكون اتعرض لنوبة هوس خفيف مرة واحدة على الأقل بس مايكونش اتصاب أبدا بنوبات هوس عظمى أو كبيرة .

 

 

طب هل في خرافات عن الاضطراب ده ؟ 🤷‍♀️

اه في خرافات للأسف بنسمعها يوميا من ناس كتير بتزورنا في العيادة من كل الطبقات ..

ومن أهمها إن ناس كتير بتفسر الاضطراب ده وخاصة نوبة الهوس دي بإن المريض ده عليه جن أو ملبوس و ده بيخليهم بيدخلوا في دايرة الدجالين علي اعتقاد إن الدجال ده هو اللي هيشفي ابني أو بنتي وهيخرج منها الجن.. رغم إن الطب والعلم بيقولوا إن ده مرض ومحتاج لعلاج وفعلا العيان بيتحسن معانا في خلال أسابيع قليلة 💊💊

طب إيه هو مسار ومآل المرض ده؟:🚶

1) المرض ده عادة بيكون مزمن وبيجي على شكل نوبات تتراوح بين الهوس والاكتئاب .. و بيرجع المريض لحالته الطبيعية مع استعمال العلاج الدوائي وجلسات العلاج النفسي زي ماهنشرح دلوقتي  
2)
بيحتاج المريض إلي المتابعة المستمره مع الطبيب المعالج وإستخدام جرعة وقائيه باستمرار علشان نحافظ على استقرار حالته وعدم حدوث انتكاسه

 

طب إيه هي نسبة انتشار الاضطراب ده ؟ ❗

١) بتتساوى نسبة الإصابة بالاضطراب ده بين الرجاله والستات وبتكون حوالي 1%.

٢) عادة بتبدأ الإصابة في سن مبكر بين الـ 15 والـ 20 سنه

٣)قليل أوي أما بتحصل الإصابة في سن متأخرة بعد الخمسين

 

طب ازاي بنعالج اضطراب ثنائي القطب في عياداتنا ؟؟ 👀👀

١) أول حاجة ناخد بالنا منها إن لو المريض في حاله حادة من الهوس أو الاكتئاب ومش عارفين نسيطر عليه ومش هيتقبل ياخد العلاج في البيت هيكون ضروري يدخل مستشفي علشان نحميه من إندفاعيته وعصبيته الشديدة اللي ممكن تخليه يدخل في مشاكل قانونية كبيرة ..وكمان علشان نحميه من علاقات خطيرة ممكن يخش فيها .. أو إنه يبدد ثروته 

٢) ممكن إنه يتم علاجه عن طريق العيادة لو كانت الأعراض مش حادة أوي أو كان متعاون في إلتزامه بالتعليمات العلاجية ومتابعته على الدوا والعلاج بصورة منتظمة 👏

بيكون العلاج عن طريق قسمين :

١- العلاج الدوائي💊 :

و ده بيكون عن طريق  مثبطات للمزاج زي الليثيوم والفالبورات والكاربامازيبين ..
أومضادات للذهان زي الأولانزيبين والكيوتيابين ..واللي بتكون بجرعات معينه حسب حالة المريض وجنسه وسنه و وزنه وهل في أمراض مصاحبه ولا لا !

٢- العلاج المعرفي🧠 السلوكي👣 :

واللي من خلالها بنغير معتقدات الشخص وأفكاره وبيتم تعديل الأفكار دي سواء عن نفسه أو المحيطين بيه أو عن مستقبله ..

كمان بنفرض قيود علي المريض إنه يفضل مقيم في المنزل لفترة ،وبنمنعه من إتخاذ أي قرارات في الفترة الحالية ،

كمان بنغير سلوكه للسلوك الإيجابي💪🏻 زي إننا بنحسن مواعيد نومه ، بنخليه يعرف يعمل توازن لحياته ، يتجنب أي ضغوط تماماً ممكن تؤدي لترسيب النوبة،

كمان بنوصي دايما إنه يكون في دعم وتشجيع من الأسرة ،

لو كان بيتعاطي أي مخدرات بنبعده عنها تماماً
..

٣) بنصلح جوانب حياة الشخص ده لإن أثناء النوبة بتكون حاجات كتير في حياته حصل فيها مشاكل!!

٤- العلاج الاستبصاري : وده من أهم الحاجات الي بنعملها في الجلسات النفسية وهي استبصار المريض بحالته وإنه يراقب مزاجه دايما ولما يحس بأي خطر يجي العيادة علي طول أو يتصل علينا ..

والحمد لله المرضي في عيادتنا عادة بيظهر عليهم التحسن بعد أسبوع من بروتوكول علاجاتنا .. و النوبة بتختفي تماماً في خلال ٣ لـ ٦ اسبايع🤝🏻♥️

وفي النهاية .. لو حابب تعرف أكتر عن الاضطراب ده وتفاصيل علاجه تقدر تشوف الفيديوهات اللي في أخر الموضوع ..
ولو بتعاني من المشكلة دي أو أي مشكلة نفسية تانيه تقدر تستفسر عنها من خلال صفحتنا أوتتواصل معانا من خلال أرقامنا وتقدر كمان تزورنا في أقرب فرع ليك من فروع عيادتنا 👏

 

إعداد : أستاذة / إيمان محمد

مراجعة : د/ حاتم صبري

 

 

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T