الاكتئاب : depression

الموضوع اللي هنتناقش فيه في المقال ده يمكن يكون واحد من أصعب الاضطرابات اللي ممكن يعاني منها أي إنسان في حياته ..

بس للأسف يمكن علشان بنستخدم الكلمة دي كتير فبسبب كده ممكن الاضطراب ده يكون فقد أهميته في أذهان ناس كتير 😱!!

بقينا أول مانسمع إن حد يقولنا إنه مكتئب بقينا بنبرمج الموضوع في دماغنا إن ده مجرد يومين هيكون الشخص فيهم حزين ومتضايق عشان حصلت حاجه ضايقته .. لكنه بعد شوية هيفك لوحده 👏

للأسف مش ده الاكتئاب اللي نقصده في الموضوع ده خالص ...لإن ده نوع من الاكتئاب إسمه الاكتئاب التفاعلي وده بيكون مجرد مزاج سيء بيحس بيه الإنسان لمدة كام يوم وبيبقى فعلا خلص الموضوع على كده ..وده بيبقى شيء طبيعي ممكن نمر بيه مرات كتير في حياتنا 😊!!

لكن الموضوع اللي بنتكلم فيه دلوقتي هو الاكتئاب المرضي واللي ممكن يأثر على حياة الانسان بصورة كبيرة لدرجة إنه ممكن يخلي الشخص يتخلص من حياته بسبب الحزن الشديد اللي بيحس بيه زي ما هنذكر دلوقتي 👌

طيب يعني ايه إكتئاب جسيم 🤔؟؟

المرض ده بيكون عبارة عن اضطراب في المزاج واللي بيأثر بالسلب على ٣ حاجات هما (التفكير والإحساس والسلوك😥) وبيصيب مختلف الأعمار وخطورته بتكون في المشاكل الجسدية والنفسية اللي بتحصل لو متعالجش منه الشخص المصاب بيه😱.

 



طيب إيه هيا الأعراض اللي بنشخص بيها  المريض المكئب اللي بيزورنا في العياده 🤔؟؟

عشان نقدر نقول على مريض بيزورنا في العيادة إنه بيعاني من إكتئاب جسيم يبقى لازم تتوفر عنده ٥ أعراض أو أكثر من الأعراض دي وكمان  الأعراض دي لازم تكون مستمرة معاه فوق الأسبوعين:

. ١/ مزاج المريض بيكون منخفض معظم اليوم وتقريبًا كل يوم ، يعني بيكون مالوش نفس يعمل أي حاجة ،وحاسس بحزن وبفراغ وبيأس شديد😭😥.

٢/ الشخص بيفقد اهتمامه واستمتاعه بالحاجات اللي كان بيعملها قبل كده واللي كانت بتديه إحساس بالسعادة والبهجة .. ده كمان بيقل شغف الشخص ناحية الحاجات اللي كان شغوف بيها قبل كده وبيحبها 😳.

٣/ بنلاحظ على مريضنا إنه قل وزنه أو زاد وزنه وده بيرجع للشهية، في ناس بتكتئب فبتقطع الأكل خالص وناس بيبقى إكتئابها غير متطابق فبتاكل بزيادة 🍔🍕

٤/ بنلاحظ على مريضنا إنه بدأ يشتكي من الأرق سواء كان الأرق ده أول الليل أو بيقلق في وسط النوم أو إنه بيصحى بدري قبل ميعاد صحيانه ...وساعات بتبقى الأعراض غير متطابقة وبنلاقي مريضنا بينام كتييير فوق المعتاد.👁🥱

٥/مريض الاكتئاب بيكون بيشتكي من خمول وكسل وفقدان الطاقة والنشاط معظم الوقت لدرجة إنه ممكن يكسل حتى يطلع من أوضته🥱.

٦/بيكون بيشتكي وقت كبير من تعب جسدي وأوجاع في جسمه ومش بيكون ليها أصلا أساس عضوي زي أوجاع أسفل الظهر أو الصداع المتكرر 🙇‍♂️.

٧/ بيعاني معظم الوقت من قلة تركيز ونسيان تفاصيل كتير وحاجات كتير في حياته 🤯.

٨/ للاسف بسبب حالته النفسية السيئة مش بيكون مريضنا قادر ياخد قرارات في حياته وحتى لما بياخد قرارات مش بتكون قرارات منطقية أوي 🤪.

٩/بتشغله أفكار ليها علاقة بالموت كتير لدرجة إنه بيتمنى في كل لحظة إنها تيجي من عند ربنا ويفقد حياته وساعات بتشغله أفكار ليها علاقة بالانتحار وممكن بالفعل يحاول الانتحار أو إيذاء الذات 🔪.

١٠/للأسف الأعراض دي كلها طبعا بتعمل إنخفاض في أداء الشخص الاجتماعي ، وده بيخليه مش عايز يندمج في مواقف إجتماعية كتير .. هو بيكون كل اللي عايز يعمله إنه يقعد في أوضة ضلمة لوحده ومايكلمش أي حد وكمان طبعا بيقل أدائه المهني أو الدراسي بصورة ملحوظة ..وطبعا إنتاجيته في الشغل بتكون محدودة لانه أصلا بيكون مش عايز ولا قادر حتى يشتغل بسبب شعوره بالخمول وبسبب عدم رغبته في أي حاجه في الحياه 💸 .

١١/كمان من أسوأ الاعراض اللي بيعاني منها مريض الاكتئاب هو إنه بيكون حاسس طول الوقت إنه مالوش قيمة في الحياة لدرجة إنه مايستحقهاش وإنه مش فارق مع حد ..
وطبعا للاسف كمان بيكون عند مريض الاكتئاب إحساس كبير بالذنب وتأنيب الضمير ناحية أشياء بيعملها وعملها ماتستحقش خالص إنه يحس بذنب ناحيتها أو ماتستحقش كل التضخيم ده 😎😎!!.

 



 

طيب إيه أسباب إضطراب الاكتئاب الجسيم 🤔 ؟؟

أسباب الاكتئاب ساعات بتبقى عضوية بحته بسبب تغير في كيمياء المخ وساعات بتبقى نفسية في الأساس 😊

الأسباب العضوية :

١)بتكون بسبب خلل في توازن الهرمونات بالمخ وخصوصا نقص هرمون السيروتونين.

٢) الاكتئاب من الأمراض اللي بيبقى ليها دور وراثي 👨‍👩‍👧‍👧

الأسباب النفسية : هتتلخص في تعرضك لصدمة نفسية شديدة أدت لظهور الأعراض الاكتئابية دي عليك زي ..

١) وفاة شخص عزيز عليك 😭

٢) أزمة اقتصادية كبيرة بتمر بيها💸

٣)حادث مؤلم مريت بيه 🚗

٤)فراق حبيب 💔

٥) أي حاجه بتأثر على مشاعر الشخص بصورة كبيرة

حبة معلومات إحصائية عن الاكتئاب 🤔؟؟

عدد المصابين بالاكتئاب الحاد بيعدي ال ١٢١ مليون مصاب في العالم 😱
عدد النساء المصابه بالاكتئاب الحاد ضعف عدد الرجال 😱
الاكتئاب الحاد بيصيب الأشخاص في مختلف الأعمار، مالوش عمر محدد😱.

طيب إيه مسار ومآل اضطراب الاكتئاب الجسيم 🤔؟؟

الاكتئاب الجسيم لو ماتعالجش وماتلحقش هيدفع بالمصاب بيه لمشاكل تانية أكبر ...

١)الإدمان : 💉🚬اللي هيلجأله مريض الاكتئاب عشان ينسى شويه الحالة النفسية اللي هو فيها ..وكمان علشان ينسى المشاكل اللي هيتحط فيها بسبب الاكتئاب (مشاكل في شغله أو مع أسرته)

٢)المكتئب لو ماتعالجش برضه ممكن يصاب باضطراب القلق🤦

٣)وأخيرًا ممكن جدًا الموضوع يوصل لأفكار وسلوكيات انتحارية ناقشناها بالتفصيل في نافذة الانتحار🔪.

طيب إيه هي الإعتقادات الخاطئة عن الاكتئاب 🤔؟؟

طبعًا الاكتئاب من أكتر الأمراض النفسية اللي اتعرضت للإشاعات واللي ناس كتير بتصدقها ، والإشاعات دي إما بتخلي الشخص يتجنب العلاج أو مايعترفش بالمرض أصلا...

طيب تعالوا نشوف زي ايه 🤔؟؟؟

١/الاكتئاب والحزن متشابهان ❌
أينعم الحزن من أعراض الاكتئاب لكن الحزن في حد ذاته بيكون شعور مؤقت بسبب حدث معين أو نتيجة لاسترجاع ذكريات مؤلمة .. لكن الاكتئاب مختلف لإنه بيكون حالة مزاجية مزمنة ليها أسباب عضوية ونفسية.


٢/أدوية الاكتئاب بتكون إدمان ❌
وده غلط جدا لأنك تقدر توقف الأدوية طبيعي جدا وقت ما حالتك تتحسن وتستقر ، أينعم في بعض الحالات بيكون الدواء مستمر لكن ده لو الأعراض مستمره وهو عنده إكتئاب مزمن لكن في الاكتئاب الحاد الأدوية بنوقفها بصورة طبيعية .


٣/الاكتئاب بيكون بسبب صدمة نفسية فقط ❌
وده غلط طبعا لإن في دور عضوي مهم في إحداث الاكتئاب وكذلك علاجه.


٤/ مضادات الاكتئاب تكفي للعلاج ❌
مضادات الاكتئاب بتعالج فقط السبب العضوي اللي هو خلل الهرمونات، لكن ضروري معاها متابعه مع معالج أو طبيب نفسي عشان أقدر أصلح أسباب الاكتئاب النفسية.


٥/الاكتئاب بيصيب الضعيف أو الشخص البعيد عن ربنا ❌
والإشاعة دي بالذات بتخلي ناس كتير تنكر مرضها وترفض تعترف بيه وتكتمه جواها ، مش عايزة تشوف نفسها ضعيفة أو يتقال أن إيمانها بربنا ضعيف! وده طبعا ملوش أي أساس من الصحة الاكتئاب بيصيب القريب من ربنا زي البعيد وبيصيب أصحاب الشخصية القيادية الأقوياء عادي جدًا .

 

طيب إزاي نقي نفسنا من الاكتئاب 🤔؟؟

عشان أقدر أقي نفسي من الوقوع في الاكتئاب لازم أبقى ماشي على اللي هنقوله ده دايمًا ونخليه أسلوب حياة.

١/ممارسة الرياضة بشكل يومي لمدة نص ساعة على الأقل وده عشان أفرغ الطاقة السلبية اللي عندي أول بأول🤸‍♀️🏊‍♀️.

٢/ لو حصل أي مشكلة أو أزمة مترددش أبدا في طلب الدعم من القريبين مني، ألجأ لحد بيسمعني وبيفهمني وبيحتويني ولو الشخص ده مش موجود في حياتي فهلجأ لمعالج نفسي قبل تفاقم الوضع ووصوله للاكتئاب👏.

٣/التعبير عن المشاعر بصورة منتظمة .. أكتب أو أتكلم أو أرسم لكن متكتمش جواك 👏.

٤/تغيير الروتين اليومي بممارسة أي هواية جديدة أو تعلم حاجة جديدة .. خروج ومقابلة ناس وعمل أصدقاء 🏄‍♂️👬وهكذا .

٥/ وجود هدف في حياتك تسعى ليه عشان يخلق معنى ليها ومعنى لوجودك تفتكره وقت اليأس والإحباط💪💪.

٦/المواظبة على الأكل الصحي والفاكهة والخضار🍎🧄🥒🥬🍇.

٧/الاهتمام بالنوم وأنام عدد ساعات نوم كافي🥱 .

 

طيب إزاي بنعالج مرضى الاكتئاب اللي بيزورونا في عياداتنا 🤔؟؟

زي ما عرفنا إن في أسباب عضوية ونفسية للاكتئاب فدورنا هو معالجة السببين دول .. 

العلاج الدوائي :💊

زي الأدوية المضادة للاكتئاب وبعض العقاقير الأخرى بالجرعات المناسبة للحالة وده اللي بيحدده الطبيب المتخصص وعادة الأعراض دي بتبدأ تتحسن في خلال أسبوع وبتبدأ تنتهي تماما في خلال من أسبوعين ل ٦ أسابيع 👨‍⚕️

العلاج النفسي:👨‍⚕️

بيقوم الأخصائي النفسي بتطبيق برنامج علاجي محدد للاضطراب ده واللي بيهدف إنه ..

١) يعالج السلوكيات السلبية الناتجة عن الاكتئاب وإستبدالها بسلوكيات جديدة إيجابية ..

٢)بيعالج الأفكار السلبية عن نفسنا وعن المجتمع واللي بتسبب لينا مشاعر الحزن واليأس والإحباط ..

٣) بيكتشف معاه أفكاره السلبية وبيبدلها بأفكار إيجابية وكمان بيصحح أخطاء التفكير اللي هي من الأسباب الرئيسية للاكتئاب

وفي النهاية .. لو حابب تعرف تفاصيل أكتر عن الاضطراب ده وعلاجه تقدر تشوف الفيديوهات اللي في أخر الموضوع ..
ولو بنعاني من المشكلة دي .. أو أي مشكلة نفسية أخرى تقدر تتواصل معانا من خلال صفحة العيادات أو تقدر تتصل بينا من خلال تليفوناتنا أو تزورنا في أقرب فرع من فروع عيادتنا 😊

إعداد : أستاذة / نورهان جمال

مراجعة : د/ حاتم صبري





 

 

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم: learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T