الفصام الفصام : schizophrania

بنكون ماشين في الشارع و مره واحده بيصادفنا شاب قاعد بيكلم نفسه بصوت عالي 📢 .. أو قاعد يشتم بصوت عااالي ، وممكن ساعتها نلاقيه لبسه غريب أوووي ومتوسخ ومش بيكون مهتم بمظهره ولا بنظافته الشخصية إطلاقاً ..
ممكن نلاقيه شعره طويل ومنعكش كمان😲 !!

رغم إننا بنشوف شخص زي ده غريب أوي ساعتها وبنفتكره إنه عايش في الشارع طول عمره ..لكن ماتسبعدوش خالص إن ممكن شخص زي ده كان من كذا شهر فات إنسان عادي جدا ..ويمكن كمان كان ناجح ومظهره حلو وعلاقته كويسه جدا مع أسرته وأصدقاءه .. بالإضافة إنه ممكن كان ساعتها شخص مفيد أوي في مجتمعه ولكل اللي حواليه 👏


طيب إيه اللي حصل وخلى شخص زي ده يوصل للمرحلة دي 🤔؟؟

لو رجعنا لتاريخ الشخص ده من كام شهر ممكن نلاقيه مر بأزمة نفسية كبيرة أوي والأزمة دي خلته ينعزل عن الناس ...

بدأ بالتدريج تفكيره يتغير بصورة غريبة جدا .. وبدأ يشك بدون سبب حقيقي إن مثلا مامته كانت هي السبب في الأزمة دي ..

هنلاقيه بدأ يفسر بصورة غير منطقية بعض تصرفاتها العادية خالص وبدأ يفتكر إن التصرفات دي معناها إن مامته عايزه تتخلص منه عن طريق إنها تحطله سم في الاكل..

ممكن كمان يكون بدأ يحس إن جيرانه متفقين معاها إنهم يعملوله سحر وبدأ برده يفسر تصرفات منهم عادية خالص بطريقة غير منطقية خالص ..ومن خلال التفسيرات دي بدأ يتأكد إنهم بيعملوله سحر🧜‍♂️ ...

بدأ يشك وهو ماشي إن في ناس بتراقبه وماشيه وراه وده كان بيضايقه جدا ..

بدأ يحس إن أي اتنين بيتكلموا في الشارع وبيضحكوا فده معناه إنهم بيتكلموا وبيضحكوا عليه ...

بدأ يحس إن حتى شقته متراقبه بكاميرات ..

بدأ كمان يسمع أصوات في ودنه بتأكد ليه الحاجات دي وبتطلب منه يهرب ويتنكر في لبس مبهدل ويعيش في الشارع ...

بدأ يعيش أوي في القصة دي وينسى خالص أي حاجه واقعية في الدنيا ..

و من كتر ماعاش في الخيال ده وانفصل عن الواقع ساب شغله وساب بيته وساب كل حاجه وبقى كمان بيتكلم بطريقة غريبة عشان محدش يفهم كلامه !!


يمكن يكون سيناريو شبيه بالسيناريو ده هو اللي حصل معاه ..ويمكن هو اللي وصل بيه الأمر إنه يبقى ماشي في الشارع وهو فاكر إنه بيتصرف صح ومقتنع بكل حاجه بيعملها وشايف إنه ماعندهوش مشكله أو حاجه مش طبيعية .. لا كمان  بيكون فاكر إن الناس هي اللي عندها مشكلة ومش فاهمين المؤامرة اللي بتتعمل عليه 😱


بكل بساطة التفسير العلمي والحقيقي للإضطراب اللي حصل للشخص ده هو إنه يكون بيعاني من " الفصام" وبدأت تظهر عليه أعراض المرض اللعين ده 😇

 

 

طيب يعني إيه فصام ؟؟!! 🤔

الفصام معناه إن شخص ما حصل تغيير في كيمياء مخه 🤯 وده وصله إنه يبقى عنده مشكله في الوظايف النفسية دي عنده ..

في التفكير🙇‍♂️:  لدرجة إن بقى تفكيره مش موزون

في الوجدان 👨‍❤️‍👨وبقت مشاعره وتعاطفه قليلين مع كل الناس وكل الأشياء اللي حواليه بصورة كبيره

في الإدراك 🙉وده بيخليه يسمع حاجات ويحس بحاجات مش موجوده

في الإرادة 💪:وده بيخليه ماعندوش الدافعية إن يغير أي شيء في حياته أو إنه يبقى عنده حتى الرغبة والإرادة إنه يعيش الحياة بصورة طبيعية !!

في السلوك 🎰 :وده السبب اللي بيخليه يعمل سلوكيات كتير مش منطقية وموزونة أو زي مابنقول عليها تصرفات مختله 😳

بكل بساطة كلمة فصام معناها إن الشخص ده بقى عايش في عالم خاص بيه بعيد جدا عن الواقع وكأنه عايش في جزيرة منعزله عن الناس كلها 😇

 

 

طب عاوزين نفهم أكتر عن طبيعيه الاضطراب ده .. ونحكي لكم ايه الأعراض اللي بتكون ظاهره على المريض ده لما بيزورنا في عياداتنا 🤔؟؟


لو عايزين تعرفوا أكتر يبقى تعالوا نشوف إيه أعراضه طبقا ل Dsm 5 : 🌠 بس أولا علشان نشخص إن الشخص عنده فصام لازم يكون عنده عرضين أو أكتر من دول ويكون منهم الهلاوس والضلالات


1- هلاوس :

طيب يعني ايه هلاوس🤔 ؟؟

ده معناها إن بيكون الشخص ده بيحس بحاجات أو بيسمع حاجات مش موجودة أصلا في الواقع 🤨

أشهر حاجه:

- الهلاوس السمعية بيبدأ يقول لينا

" أنا بسمع أصوات في وداني ،
أنا بسمع إن في حد بيكلمني و بيأمرني وبيقولي أقوم اعمل كذا "😟..
أو " أنا بسمع طول الوقت حد قاعد يتريق علي تصرفاتي و ممكن يوصل بيه إنه يشتمني و بيقولي انت لو معملتش الحاجه ديه هيحصلك حاجات وحشه"😣 ..
أو " طول الوقت بسمع واحده عماله تعاكسني و عاوزه تعمل معايا علاقة جنسية مثلا" 😞..
أو " بسمع حد عمال يقولي نكت و عمال يتريق علي الناس " فتلاقي الشخص قاعد لوحده وفجأه يدخلوا عليه أهله يلاقوه بيضحك أو بيكلم نفسه هو فعلا بيكون سامع أصوات في ودانه زي صوتي وصوتك🔊 !!


- و ممكن تكون هلاوس بصريه🧐 : فلما بنتكلم مع المريض و بنقوله إيه الحاجات اللي بتشوفها فيقولنا

" أنا طول الوقت بشوف صور و أشياء غريبه بتكون قدام عيني👀👁


- وممكن تكون بردوا هلاوس لمسية: فيقولنا المريض

" أنا طول الوقت بحس إن في حد بيلمسني و بيحط إيده علي جسمي وكتير بيكون  في مناطق جنسية " 😤


- هلاوس شمية :

" أنا طول الوقت عمال أشم في روائح غريبة " في حين مش بيكون في روائح أصلا في المكان و مفيش حد بيكون شامم حاجه و بيكون في الغالب الشخص ده شامم روائح كريهة🤥

وده كله بيكون بسبب اضطراب في الإدراك لإن المريض ده بيدرك حاجات ليس لها أساس في الواقع والحياة.😇!!

ملحوظة : ناخد بالنا لما يكون في وجود هلاوس بصرية أو شميه و غياب الهلاوس السمعيه ده يخلينا نفكر إنه ممكن يكون اضطراب عضوي

2- الضلالات :

ببكون الشخص معتقد فكره و متأكد منها 100%👌 و بتكون مترسخه عنده و غير قابله للشك و غير قابله للمناقشه و متأكد مليون في الميه إن فكرته صح جدااا حتى لو كل الدنيا حاولت تقنعه بالعكس والفكرة دي غير مقبولة وغير عقلانية في المجتمع بتاعه خالص  !!

طب زي إيه !؟🧐

ممكن الشخص يكون عنده ضلالات الإضطهاد : بمعني إنه يكون معتقد إن في حد مضطهده 🤯، أو في حد عاوز يأذيه و يخلص منه ، ممكن يكون الحد ده شخص قريب منه زي مامته مثلا 😱، فتجيله فكره إن مامته عاوزه تأذيه ،

ليه !؟

"أصل لما كنت بتكلم معاها في موضوع البنت اللي حابب أرتبط بيها قالتلي بعدين خلاص هانت ، اصبر شويه و كل حاجه هتخلص وبعد كده قامت عملتلي كوبايه شاي " هو حلل مع نفسه لما مامته قالتله خلاص هتخلص أو هانت إنها كده مامته هتأذيه و هتحطله في كوبايه الشاي سم وتقتله عشان هي عاوزه تخلص منه 😠.

هو للأسف بيكون مقتتع مليون في الميه بالضلالات ديه و مهما الأهل اتكلموا معاه هو مش مقتنع و لا هيقتنع ، وده بيخليه يقرر مايأكلش و لا يشرب أي حاجه من إيد مامته 🙊

كمان ممكن يجيله ضلالات الاضطهاد إن حد عمله عمل أو سحر فتلاقي الشخص بيقول " عمتي لما جات البيت كانت بتبصلي بصات غريبه ، أنا شوفتها و هي بترمي ورقه كانت ماسكها" أو " لما قالتلي هات الحاجه ديه و أنا قولتلها لا فهي عملتلي عمل و سحر عشان مسمعتش كلامها " 😾.   بيقعد يحلل حاجات ملهاش علاقه ببعض و بيبدأ يقتنع بيها💀!!


كمان ممكن يجيله ضلالات العظمة 👨‍🦱: بيكون مؤمن بإنه شخص مهم جدا في المجتمع و بيتواصل مع الرئيس مثلا💂‍♀️.. أو مع أي شخصيه مهمه في المجتمع. و يقعد يكتب ليهم جوابات.
بيكون مؤمن إنه أذكى أو أقوى البشر أو إنه عنده قوة خارقة👨‍🦱

أو بيكون مؤمن إنه مثلا المهدي المنتظر ، أو هو نبي، أو إنه كاتب أو عالم كبير أووي و ليه مجلدات و نشرها .👨‍💼


ممكن يجيله ضلالات الاشاره والمراقبة ⚡☀️: يفتكر إن في حد بيراقبه و ماشي وراه في الشارع ، و ممكن لو شاف مجموعه قاعده مع بعض و بيتكلموا و بيضحكوا بيفسر إنهم بيتكلموا عليه و بيتريقوا عليه ..أو ممكن يكون الشخص متأكد إن في حد بيراقبه و حاطط كاميرات في البيت لدرجه إنه بيكون خايف يغير لبسه أو إن مثلا المخابرات بتتجسس عليه لدرجه إنه طول الوقت قافل الموبايل و الواتس اب و الانستجرام و الفيس بوك🤳

ممكن يجيله ضلالات الخيانة 🤰: فبيكون الشخص مؤمن إن مراته بتخونه عاطفيا أو جنسيا 😟لمجرد إنها بس سلمت علي ابن خالها مثلا.. وده ممكن يوصل الشخص إنه لما ينزل من البيت إنه يسجل لمراته تسجيل صوتي وحتى لو كان التسجيل ده فاضي بس هو بيكون مؤمن إن في أصوات في التسجيل بتأكد إن مراته بتخونه مع شخص غيره 😳😳


ضلالات جسدية: زي مثلا إن في جزء من جسمه ناقص

(زي إنه يعتقد إن قلبه مش موجود أو مش شغال، أو إن جيرانه المجرمين سرقوا الأمعاء والمعدة والكبد والطحال وإنهم مش موجودين عنده دلوقتي ، أو يحس إن زوره مسدود، أو مخه مش موجود، أو وظائف التنفس والإخراج متوقفة).

وساعات بيبقى في أنواع ضلالات تانيه زي مثلا ضلالات العدمية وهو إنه بيعتقد إن مفيش كون أو بيعتقد إنه ميت و عايش في حلم 😇

كمان من الحاجات اللي كتير من عيانين الفصام بيشتكوا منها هي إنهم بيكون عندهم اضطراب في تحكمهم في التفكير بتاعهم :
و ده بيكون في شكل :

- سحب الأفكار🙄 : بيقعد يشتكي الشخص إن حد بيسحب أفكاره من دماغه من خلال أجهزة الكترونيه خاصة بتتحكم في مخه

- إدخال الأفكار : بيعاني من إن في أفكار بتدخل دماغه من قوى خارجيه

- إذاعة وقراءة الأفكار : بيقعد يشتكي الشخص إن في حد بيسرق أفكاره و يذيعها علي التليفزيون أو ينشرها في الجرائد 😾


3 - كلام غير منتظم : وده بسبب برده إن تفكيره بيكون متأثر بصورة كبيرة زي ماحضراتكم عرفتوا فبيبقي صعب عليه إنه يعبر عن أفكاره :

- طريقه كلامه بتكون غريبة شويه فتلاقيه و هو بيتكلم معاك ممكن يجيب كلمه من الشرق على كلمه من الغرب و انت مش فاهم منه و لا كلمة و لا فاهم عاوز يقول إيه🤠 ، كلام بيكون ملهوش معني ، بنسميها سلطه في الكلام ..أو ممكن يخترع لغة و بيكون هو الوحيد اللي فاهمها و الناس اللي حواليه بيكون مش فاهمين اللغة بتاعته

- لما نقوله مثل شعبي بيكون مش فاهمه ، يعني لما تقول مثال زي: علي قد لحافك مد رجليك ، بيكون مش فاهم إنك تعيش علي قد حالتك الماديه ، هو بيكون مش فاهم ولا مستوعب كده خالص

- ساعات بيبقى كمان عنده اضطراب في مجري التفكير بتاعه : بمعني إنه يكون بيتكلم في موضوع معاك و فجأه يسكت و يتكلم في موضوع تاني ملهوش علاقه خاااالص بالموضوع الأول 🥴

4 - الأعراض السالبة : من ضمن الأعراض بردوا اللي بتظهر عليه هي الأعراض السالبه زي مثلا : -

عدم الاهتمام بنظافته الشخصيه ..فتلاقيه ممكن يقعد بالشهر مش بيستحمي أو حتي مش بيسرح شعره أو لو راجل ممكن يقعد بالشهور مايحلقش شعره أو ذقنه ☹️ ...وبعد ماكان بيحب يلبس شيك و يحط برفان دلوقتي ممكن ينزل بالبيجامه الشارع🙁

- بيحب يقعد لوحده و ينعزل عن كل الناس وبيحب يندمج مع أفكاره و الأصوات اللي بيسمعها ومش عاوز حد يشغله أو يشتت أفكاره ديه 🤯

5- سلوكيات غير منتظمة والتخشب الكتاتوني :

بنلاقيه بيعمل سلوكات غريبه أوووووووي زي مثلا إنه يمسك الشامبو و يدخل البلكونه و يقعد يدلق الشامبو في الشارع و على الناس 😲 و ممكن يلم حاجات غريبه من الزباله و يحتفظ بيها 😲.. و ممكن يكسر حاجه في البيت لمجرد إنه يتعصب بصورة بسيطة 😳،
من الأخر سلوكيات شاذه و غير منطقيه اطلاقاً

وساعات الموضوع ممكن يوصل لسلوك تخشب كتاتوني وده بيخلي العيان أعراضه بتتراوح بين إنه مايتحركش وما يستجيبش ولا يتفاعل خالص أو يكون عنده تهيج شديد غير قابل للسيطرة .. ولإن ده موضوع كبير وله أسباب تانية فهنتكلم عنه في موضوع تاني بالتفصيل 👌

للأسف كل الأعراض دي أكيد طبعا بتأثر بالسلب علي حياة المريض سواء حياته الاجتماعيه، أو الدراسية ، أو في الشغل😭... والغريب إن كل ده بيحصل من غير حتى المريض ياخد باله إن عنده حتى مشكله أو بيعاني 😱😇

 

 

الأسباب:

للأسف لحد دلوقتي مافيش سبب واضح وحقيقي للفصام رغم إن في مئات النظريات اللي حاولت تحدد أسباب ليه 🤔!! -

بسبب وراثي :🔳

طبعا الجينات بيبقى ليها دور كبير وكل مازادت القرابة بيزيد إحتمالية حدوثه ..لكن طبعا ده ما يأكدش أو ينفي أي حاجه لإن الدراسات دي برده بتأكد إن العامل النفسي والاجتماعي ليها دور

- بسبب زيادة نشاط هرمون الدوبامين في منطقة Mesolimbic ..
فهرمون الدوبامين بيكون المتهم الأساسي كناقل عصبي في احتمالية حدوث الفصام ويمكن اللي بيأكد ده هو إن كتير من الأدوية اللي بتقلل الهرمون ده بتعالج أعراض الفصام وكمان المواد المخدرة إللي بتزود نسبة الهرمون ده بتعمل أعراض مشابهة للفصام كمان في بعض النواقل العصبيه التانيه اللي بتكون متهمة زي السيروتونين والجلوتاميت والجابا والنورأدرينالين والفينيل ايثيلامين

-بعض الانزيمات ليها دور : زي الانزيم المؤكسد للأمينات الأحادية والدوبامين بيتا هيدروكسيلاز والميثيل ترانسفيراز والكرياتين فوسفوكيناز

-بعض المواد التانيه زي الاندروفين والبروستجلاندين والجلوتين

-بعض الأبحاث بتقول إن المناعة ليها دور والبعض الأخر بتتكلم إن في فيروس غير مكتشف وهو المسئول عن الأعراض دي

- بسبب المخدرات زي الحشيش و خصوصاً لو الشخص عنده استعداد جيني للاصابه للفصام.

أسباب نفسية :🔳

ممكن موت شخص عزيز ، أو تغيرات في ظروف الحياة زي الانتقال من بلد لبلد تانيه

- طببعية الشخصية اللي مش بتعرف تعبر عن مشاعرها و بتكون انطوائية و مش بتتفاعل مع المجتمع اللي حواليها

- الشخصيات المهيئة للفصام زي الشخصية الشبة فصامية و البارانويدية

- اضطراب العلاقة بالناس اللي حواليهم من بداية مرحلة الطفولة

- ضعف الأنا بتاعت الشخص بصورة كبيرة

- الأوامر المتناقضة عند الطفل في تربيته زي إننا نطلب الحاجات من الطفل ونقصد عكسها

- سيطرة أحد الوالدين وانعزال التاني وضعفه

- التفكير بصورة غير منطقية في الأسرة

✅معلومات إحصائية عن الفصام :

بيصيب الفصام حوالي 1% من مجموع العالم وبينتشر بين الرجاله و الستات بنسبة واحده لكن بيظهر عند الرجال في سن مبكر من سن 16 لحد سن 25 20%

- 15% من الحالات بتظهر الأعراض فيها بعد  سن 40، أو متأخر جدا بعد عمر 60

إعتقادات خاطئة:

- للأسف ناس كتير فاكره إن الفصام معناها انفصام في الشخصيه بمعني إن الشخص بيكون بشخصيتين ، طبعا ده مش صح ده اضطراب تاني اسمه تعدد الشخصيات نقدر نقراه في نافذة تانيه في الموقع ، أما الفصام فده معناه زي ما قولنا إن شخص منفصل تماما عن الواقع و مش عارف يفرق أو يميز بين الواقع و بين الخيال

- أو ناس بتقول عليه مجنون في حين مافيش حاجه اسمها مجنون في قاموس الطب النفسي

- الاهل بيكونوا معتقدين إن حد عمله سحر أو ملبوس و يروحوا عند كتير من المعالجين الروحانيين وفي الاخر بيبقى مافيش أي تغير لحالته

مسار و مآل المرض :

الضلالات اللي بيكون الشخص مصدقها مليون في الميه ممكن تخليه يعمل مصيبة ، ماهو لما يكون مقتنع إن زمايله في الشغل عاوزين يقتلوه فهيتصرف بناءاً عن ضلالاته فممكن في مره يجيب سكينه و يضربهم بيها و يقتلهم أو ممكن يتخانق معاهم ، أو يتعصب عليهم أو يأذيهم بأي شكل ممكن

ممكن كمان مريض الفصام يوصل للانتحار وده بيكون بسبب الأعراض الشديده أوووي عليه واللي مش بيقدر يستحملها .

في بعض الأحيان وخصوصا مع بعض أنواع الفصام ومع عدم تلقي العلاج بصورة مناسبة بيوصل الأمر بالمريض إنه يترك عمله أو دراسته أو إنه يفقد زواجه وللاسف ده ممكن يأدي بالمريض إن مستواه المادي والاجتماعي يتأثر بصورة ملحوظة

الوقايه:💪

كلامي هيكون للأهل :

- اخلي ولادي يتفاعلوا مع المجتمع و يشتركوا في أنشطه إجتماعيه

 - واعلمهم يعبروا عن مشاعرهم بشكل سليم   

- البعد تماما عن النقد و التفضيل في المعامله الوالدية

- و مهم ميكنش في المعامله الوالديه تذبذب في المعامله بمعني بابا ميقولش كلمه و ماما تقول كلمه تانيه غير بابا خاالص و الطفل بيكون مش عارف ينفذ انهي كلمه .مهم يكون في كلمه واحده بس تتقال ( المركب اللي بريسين بتغرق )

 

طيب ازاي بنعالج الاضطراب ده في عياداتنا ؟؟

✅  في بعض الأحيان بيكون المريض بحاجة للحجز بالمستشفى لعدة أسابيع خصوصا إذا كان المريض بيعاني من تهيج شديد أو كان خطر على نفسه أو الآخرين

✅ضروري جدا متابعة المريض وهو بيتناول علاجه وده لان المريض بيكون غير مستبصر بحالته وبيكون شايف إنه ماعندوش مشكلة وبالتالي بيكون غير منتظم على العلاج

✅  في حالة عدم الانتظام على العلاج أو عدم قبول المريض للذهاب للطبيب ننصح الأهل إنهم يلجأوا لأقرب مستشفى علاج نفسي حفاظا على حياته وحياة الاخرين

✅ عادة بيبدأ التحسن في خلال أسبوعين من بروتوكول العلاج المناسب مع الانتظام على الأدوية 

العلاج الدوائي:💊

من حسن حظنا إننا الحمد لله بنعيش عصر رائع تم اكتشاف فيه  عشرات مضادات الذهان (مضادات الفصام) واللي بتساعد في القضاء الكامل على الأعراض وبدون أثار جانبية كبيرة سواء كانت :مضادات الذهان التقليدية زي: الهالوبريدول و مضادات الذهان غير التقليدية زي: الأولانزبين, الرسبريدون و الأريبيبرازول.

العلاج بالصدمات الكهربائية عشان نوصل لتحسن كبير وخصوصا لو كانت الأعراض شديدة .. أو لو كان في أعراض سالبة شديدة أو في أعراض تخشب كتاتوني ... ورغم إن في إشاعات سيئة جدا عن الطريقة دي لكنها طريقة آمنة ومافيش منها مشاكل كبيرة ويمكن احنا هنتكلم عنها قدام بالتفصيل أكتر

العلاج النفسي:

1- و بيكون من خلال الجلسات النفسية واللي بيكون هدفها تدعيم و تشجيع المريض علي التعامل مع الحياة بالاضافة إننا بنعلمه سلوكيات تساعده في التعامل مع الحياة و بنصحح أفكاره المشوهه والغلط

2- العلاج الاستبصاري : في المرحلة دي بنقوم باستخدام بعض البرامج العلاجية واللي بيكون هدفها زيادة استبصار المريض بمشكلته ومعاناته

3- إرشاد أسري: بنشرح للأسره طبيعيه مشكله المريض و بنساعدهم علي تقبل مشاكله وإجراء بعض التغير في سلوكيات الأسره زي ( العداء و الانتقاد ) لان طبعا كلما ازدادت السلوكيات دي بتكون سبب لإنتكاس المريض

4- العلاج المهني: بنخلي المريض يستمر في عمله أو إيجاد عمل مناسب له

وفي النهاية ... لو حد عزيز علينا بيعاني من المشكلة دي أو بتعاني من أي مشكلة نفسية تانية تقدر تتواصل معانا من خلال صفحتنا و أرقامنا أو تزورنا في أقرب فرع من فروعنا ... ولو عايز تعرف أكتر عن المرض وأنواع العلاج وتلاقي إجابات عن كل تساؤلاتك فتقدر تشوف فيديوهاتنا دي



إعداد : أستاذة / بسنت مجدي

مراجعة : د / حاتم صبري

 




 

 

 

 

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم : learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T