متلازمة داون : Down syndrome

في البداية كده .. كلنا بنشوف أطفال أو كبار في أماكن كتير بيكون ليهم شكل معين بيلفت نظرنا زي مثلا

( دقنهم بتكون صغيرة أوي، عيونهم مايله، أنفهم مسطحه ،، اللسان البارز الكبير وفمهم الصغير، وجههم المسطح والعريض، رقبتهم القصيرة، المرونة الكبيره في مفاصلهم، مساحة كبيرة بين صباع رجلهم الكبير والصوابع الثانية)

لما بنقابل الناس دي بنكون عارفين إن يمكن مستوى ذكاؤهم يكون أقل من الطبيعي ..

الناس اللي مش شيك بيقولوا على الناس دي إنهم عندهم بله منغولي 😇 ..

لكن طبعا الناس الشيك الكيوت اللي زينا بيقولوا عليهم إنهم عندهم متلازمة داون 👏😉 ..

طيب في البداية كده تعالوا نعرف مع بعض إيه هي متلازمة داون ؟ 🤔🤔

متلازمة داون دي واحدة من متلازمات التأخر العقلى، واتسمت داون على إسم العالم اللى اكتشفها 🧐...

فى وقت من الاوقات كان بيتقال على الطفل ذو متلازمة داون طفل منغولى والتسمية دى كان سببها صفاتهم الجسمية و الشكلية و ملامحهم اللى بتبقى شبه الملامح الأسيوية شوية♥️ .. واللى هى من بين السلالات البشرية اسمها السلالة المنغولية ..
لكن برده زي ماقولنا إن التسمية دى فى الأوقات الأخيرة مابقتش مقبولة لإن فيها تصنيف و تمييز على أساس الشكل 🥺 .. وده طبعا مش متماشى مع التوجهات الحديثة اللى بترفض كل التسميات العنصرية الغير أخلاقية واللى ممكن تأذى اصحابها أو ماتعبرش عنهم بدقة♥️

طيب إيه أسباب حدوث متلازمة داون عند بعض الأطفال ؟؟ 🤔

المتلازمة دى بتحصل نتيجة خلل كروموسومات ، بمعنى إن الجنين الطبيعى بيكون عنده 46 كروموسوم فى كل خلية ، لكن الطفل اللى بيكون داون خلاياه تحتوى على 47 كروموسوم ..

وبيكون ليه ٣ أنواع .. 1

. التثلث الحادي والعشرين: واللي فيه يتكرر الكروموسوم 21 ثلاث مرات بدلا من مرتين فبيكون عدد الكروموسومات 47 بدل من 46 في كل خليك ، ويعتبر النوع ده هو النسبة الأعلى من مجموع المصابين بالمتلازمة دي حوالي 95% من حالات متلازمة داون 👌.

2. الانتقال الصبغي: وفيه بينفصل الكروموسوم رقم 21 وبيمسك في كروموسوم تاني وعادة ما يكون زي كروموسوم 13، 14، 15، 21، 22 و النوع ده حوالي 4 ٪؜ من حالات متلازمة داون.

3. النوع الفسيفسائي: وفي النوع ده بيكون في نوعين من الخلايا في جسم الطفل المصاب، بعضها بيحتوى على العدد الطبيعي من الكروموسومات 46 والبعض الآخر بيحتوى على العدد الموجود في متلازمة داون أي 47 كروموسوم ، والنوع ده حوالي 1٪؜ فقط من المصابين بمتلازمة داون.

طيب ازاى بنعرف الطفل ذو متلازمة داون ؟ 🤔

التأخر العقلى عموما بيتعرف ب 3 شروط :

طبعا الشيء المؤكد لتشخيص الطفل اللي بيعاني من متلازمة داون هو تحليل الكروموسومات ، بالإضافة لكده بيبقى ضروري الحاجات دي ..

1️⃣إنه يكون اتشخص قبل سن 18 سنة

2️⃣ أدائه منخفض على اختبار للقدرات العقلية

3️⃣ أدائه منخفض للسلوك التكيفى فى مجالين أو أكتر من المجالات دي
( التواصل ، مهارات الحياة اليومية ، التنشئة الاجتماعية ، المهارات الحركية )

طيب بما إننا قولنا إن متلازمة داون سببها خلل كروموسومات .. هل بتأثر بس على القدرات العقلية وأداء الطفل ولا في حاجات تانية ؟ 🤔🤔🤔

أهم حاجة نكون واقعيين و نفهم الطفل ده و مشاكله و قدراته 💪 عشان نقدر نساعده و نوجهه للي يقدر يتفوق فيه 👏👏 ..و عشان كدة مهم نعرف حالتهم الصحية لإن الطفل كل ما كان في حالة مستقرة بدنياً كل ما بقت عملية التأهيل أسهل 👌

طيب إيه هي المشاكل التانية دي اللي ممكن تكون عند الطفل من ذوي متلازمة داون ؟ 🤔

1. نقص مستوى الذكاء سواء بصورة خفيفة أو متوسطة

2. ممكن يكون عندهم نقصان في عدد خلايا الجهاز العصبي في الدماغ 🧠 علشان كده نموهم الحركي بيكون مش زي الطفل العادي فبيتأخر ف المشي و مابيقدرش ينط مثلا لوحده أو يطلع و ينزل السلم بسهولة أو يجري بسرعة 🏃🤸 ..كمان عضلات الإيد بتكون ضعيفة عشان كدة بيحتاج تدريب إنه يقدر يمسك القلم بطريقة صح ✏️و ينظم حركة إيديه قبل ما نحاول نعلمه أي مهارات كتابية 📝

3. بيبقي عنده مشكلة ف التواصل و بيتأخر ف الكلام عشان أعضاء النطق عنده أوقات بيكون فيها مشاكل وخصوصا اللسان 👅

4. أوقات بعض الأطفال منهم كمان بيكون عندهم إضطرابات ف النوم و يتعرضوا لضيق تنفس اثناء نومهم 🫁

5. ساعات بيكون في خلل في نمو الجهاز الهضمي زي مشاكل ف عملية الاخراج مثلا أو إضطرابات في القولون ..

6. كتير منهم مناعتهم بتكون ضعيفة جدا أو بيكون عندهم نقص فيتامينات و خصوصا الكالسيوم اللي بيأثر على قوة عظامهم و نمو الأسنان

7. ساعات بيتولد الطفل ده وهو عنده مشاكل في القلب 🫀( أشهرهم عيب في الحاجز البطيني للقلب )

8. التهاب حاد أو مزمن في الأذن الوسطى

9. من الحاجات اللي ممكن تحصللهم بعد كده هو نوبات الصرع

10. ضعف السمع

11. اضطرابات الغدة الدرقية

12. الزهايمر في سن صغيرة

مهم نعرف إن مش كل المشكلات العضوية دي بتجتمع مع بعض ف نفس الطفل ، و مش بيكون لها نفس التأثير ♥️♥️ .. و طبعا ده بيختلف حسب حالة كل طفل و تحاليله و كشفه الطبي و العلاج المناسب ف الوقت المناسب 👌♥️

و لإن الإكتشاف بدرى بيفرق كتير في الحالات دي .. علشان كده إحنا في مجال الطب النفسي بنعتبر إن أطفال متلازمة داون من الأطفال المحظوظين 🤩 وده لإن صفاتهم الجسمية بتخلينا نعرفهم من أول ما بيتولدوا 😍 ..
لإننا زي ماقولنا إن بيبقى فيه خلل في الكروموسومات علشان كده بشوية إهتمام و متابعة و تحاليل بسيطة الأم تقدر تعرف كمان من وقت الحمل 🤰 إنها هتكون أم لطفل من أطفال متلازمة داون . 🤱

طبعا ده بيخللي رحلة التدخل معاهم بتبدأ من بدرى أوي ، قبل ما القصور يبقى شديد 😟 ..

كمان الأطفال دول بيكونوا محظوظين لإنهم غالبا من حالات التأخر العقلى البسيط وده بيخليهم من الأطفال القابلين للتعلم 👏..فنقدر ببرامج مناسبة نطور مهاراتهم ، و مع شوية اصرار و تشجيع من أسرته و البيئة الموجود فيها💪💪 يقدر يتعلم الحروف الأبجدية و مهارات الهجاء و مهارات ما قبل الكتابة✏️ ، وبعض مفاهيم الحساب البسيطة ..

لكننا برده مهم نكون واقعيين و مانكونش سبب فى إحباطه لما نشرحله مناهج تعليمية مش مناسبه لقدراته 🧑‍🎓... لكن نقدر نعلمه مهارات يدوية أو حرفة و ندربه تدريب مهنى 🧶🎨⚒️🛠️ و كمان كتير منهم يقدر يتفوق فى بعض الألعاب الرياضية 🥇🏆🏅

طيب ليه التدخل النفسى مهم جدا مع أطفال متلازمة داون ؟ 🤗

التدخل النفسى أكيد مش بيتوقف على التشخيص و إجراء الاختبارت المناسبة و تقييم حالة الطفل 📊 ..و تحديد أسلوب التدخل اللى يناسب حالته لأ المتابعة النفسية بتكون مهمة طول الوقت عشان تساعد الطفل يتقبل نفسه ويثق ف قدراته ، ويتعامل مع اللى حواليه بشكل طبيعى 👍
الأخصائى النفسى يقدر يفهم من الطفل وسلوكياته ، المشاعر والإنفعالات اللى ممكن حتى الطفل ميقدرش يعبر عنها بالكلام 🗣️ لأنه فى الغالب مبيكونش لسة عند حصيلة لغوية كفاية ،

وكمان صعب يفهم المفاهيم المجردة و توصيفات المشاعر اللى الكبار بيستوعبوها، لكن الطفل ده بيكون حساس جدا ☺️

كمان الطفل ذو متلامة داون بيكون طفل ودود جدا و لطيف و غالبا سهل يتعامل مع الناس 🥰🫂لكن مش كل الناس بيكون سهل عليها تتعامل معاه أو تبادله نفس الود و اللطافة دول، وعشان كدة لما بيحس إنه مرفوض أو إن حد مش بيتعامل معاه على أساس إنه شخص طبيعي ممكن يتصرف تصرفات عدوانية 😡 لكنه ف الأصل نادرا ما يكون الطفل ده عدوانى ...

كمان أوقات بيظهر عنده مشكلات سلوكية زى العند الزايد مثلا ، وعشان كدة التدخل النفسى كمان بيكون مهم لأسرة الطفل ده علشان يعرفوا إزاى يقدروا يحتووا تصرفاته 🤓 ويعاملوه بشكل مناسب ، ومساعدتهم إنهم يحددوا الأنشطة اللى هتناسب الطفل ده ويتقبلوه ويدعموه 💪

طب التدخل مهم  بس عشان الطفل 🤔؟

لأ، التدخل مهم كمان عشان الأم والأب ما يكونوش حاسين بعبء وضغط ، ولإن تقبل صدمة طفل محتاج مننا مجهود إضافى ومختلف عن الطبيعى الأهالى بيختلفوا فى تقبل ده 👪
وللأسف أوقات بتحصل مشاكل فى بعض الأسر بسبب وجود الطفل ده وتبادل اتهامات بين الأب والأم مين السبب ، ومشاعر الاحساس بالتقصير ،

ده غير طبعا عبء المجتمع اللى حواليهم اللى بيزود عليهم صعوبة المهمة اللى مسئولين عنها👩‍❤️‍👨 فى إن ابنهم يكون أحسن نسخة من نفسه، ميهونش عليهم يشوفوا إبنهم مش زى الأطفال ف سنه ♥️💪

فلو كان فى أسرتك أو أسرة حد من معارفك أو أصدقائك طفل متلازمة داون ، ولسة محتار ومش عارف يتعامل ازاى .. خليك سبب تعرفه أهمية التدخل النفسى ، وفى فروع عيادات بيرسونا هيقدر يلاقى كشاف ينورله الطريق 💡 ويشاركه فريق متخصص فى الهدف اللى بيسعى له وهو أنه إبنه أو بنته من ذوى متلازمة داون يعيش في أحسن وضع ممكن 👌

وفي النهاية لو حابب تعرف أكتر عن الموضوع ده تقدر تتفرج على الفيديو ده .. ولو حد عزيز عليك بيعاني من المشكلة دي أو أي مشكلة نفسية تانية فتقدر تتواصل معانا من خلال صفحتنا وهيرد عليك حد متخصص .. أو تقدر تتواصل على أرقامنا وتزورنا في أحد فروعنا وهتلاقي فريق متخصص تحت أمر حضرتك 😍

إعداد : أستاذة / نورهان محمود

مراجعة : د / حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم : learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T