الحشيش والبانجو

هنتكلم النهاردة عن أشهر مخدر عرفه التاريخ ..

مخدر يعتبر من أكتر المخدرات إنتشاراً في العالم طبقا لمنظمة الصحة العالمية ..ورغم إن كل دولة في العالم بتتعاطى المركب ده بطريقة مختلفة وبيسموه بإسم مختلف .. لكن هيفضل للأسف ده المخدر اللي بيتعاطاه الملايين من البشر في جميع أنحاء العالم وعلى مدار جميع الأزمنة 😱

تقريبا ماحدش فينا مهما كان عايش في مجتمع محافظ مقابلش حد أو ما إتعرفش على حد بيتعاطى النوع ده من المخدرات 💨 ورغم إنتشار المخدر ده بالصورة الكبيرة دي إلا إن للأسف معلوماتنا عنه قليلة جدا ..حتى معلومات الناس اللي بتتعاطاه بصورة مكثفة على مدار سنين .. للأسف لما بتقعد معاهم مابيكونوش عارفين عنه غير معلومات قليلة جدا🤭
في الموضوع ده هنتكلم عن المخدر اللي كلنا سمعنا عنا واللي كلنا عارفينه وهو مخدر الحشيش والبانجو 🚭

✅ طيب مبدئيا كده تعالوا نعرف شوية معلومات تاريخية عن المخدر ده 🤔؟؟

🔳 المخدر ده أول ظهور ليه كان في شمال الهند وكانوا مسمينه شيراز 😅..

🔳وفي القرن 13 منع إبن تيمية العالم الإسلامي إستخدامه لحرمانيته 🚭..

🔳 زمان وقبل مايظهر التبغ كانوا بيأكلوه في سوريا بس 🍫....

🔳 وصل لأوروبا في القرن 18 ..

🔳 في الأول كانوا بيستخدموه كعلاج لاضرابات كتير عضوية ونفسية وعصبية 🚑😂

🔳 بعد فترة قل إستخدامه لعدم الوثوق بفاعليته بالعكس بدأوا يشوفوا إنه مركب خطير و أصبح إستخدامه كعلاج مستحيل بموجب إتفاقية الأمم المتحدة للمخدرات عام 1961م .

طيب إيه أكتر الدول المشهورة بيه 🤔 ؟؟

من أكبر الدول المنتجة للحشيش في العالم من زمان ولحد النهاردة ... ( كشمير .. أفغانستان ( حشيش أفغاني 😂) .. أجزاء من الهند .. اليونان .. سوريا .. تركيا .. وحديثا في المغرب ( حشيش مغربي 🤣)

طيب بيجي منين الحشيش .. وبيتصنع ازاي ؟؟ 👇

بيتصنع الحشيش من نبات اسمه نبات القنب وده اللي فيه المادة الفعالة ( تتراهيدروكانابينول ) THC

والمادة دي هي المسئولة عن تغيير الحالة المزاجية والإدراك بالنسبة للشخص اللي بيتعاطاه 🚬

طب إيه الفرق بين الحشيش والبانجو أو الماريجوانا 🤔؟؟

الحشيش: ده عبارة عن السائل المجفف من المادة الصمغية التي بيتم جمعها من على سيقان نبات القنب .. والمادة الصمغية دي هي اللي فيها أكبر نسبة من مادة
(THC) ..وبتكون المادة دي بنسبة أقل بكثير في باقي أجزاء النبات زي السيقان والأوراق. وبعد تجميع المادة الصمغية دي يتباع الحشيش في صوره تشبه الشيكولاته أو "العجينة"

البانجو: ده ببساطة القمم المزهرة اللي بتتقطف من أعلى شجرة " القنب الهندي" وبيتم تجفيفها في الظل وبعدين تطحن في شكل بودرة غير ناعمة. بيتكون البانجو من الزهر والأوراق الصغيرة والفروع الرقيقة والبذور. وعلشان هو خليط من الأوراق المجففة والمقطعة مع بعض البذور والسوق والأزهار من نبات القنب .. فبيبان عليه إنه خليط من ألوان الأخضر والبني والرمادي.

طب إزاي بيشتغل ويأثر علي المخ وإيه أعراضه ؟؟🤔

أول ما بندخن الحشيش المادة الفعالة الموجوده فيه بتتحد مع المستقبلات العصبية في أماكن معينة في المخ وخصوصا العقد القاعدية والهيبوكامباس والمخيخ وبنسبة أقل في قشرة المخ ..

ولما بيدخن الشخص الحشيش فتأثيره بيظهر مباشرة خلال دقايق وبيوصل للذروة خلال 30 دقيقة ..وبيستمر من ساعتين لأربع ساعات وفي خلالها بيحس المتعاطي بالنشوة والبهجة والاسترخاء والإحساس بالاستمتاع بكل حاجه حواليه .. وبيفضل ساعتها يضحك ويهزر ، هي دي التأثيرات الكويسة واللي بتكون بشكل مؤقت ..
لكن التأثيرات الغير مرغوبة ممكن تفضل لفترات طويلة.. لدرجة إن ساعات بيستمر تأثيرها على الإدراك والقدرات الحركية لمدة تصل إلى 12 ساعة.

 

 

طيب ازاي أعرف إن اللي قدامي بيتعاطى حشيش🤔 ؟؟

علي المدي القريب الحشيش بيسبب تأثير بصورة واضحة على الحاجات دي .. 👇

1. بيوسع الأوعية الدموية في ملتحمة العين ( هيعمل احمرار العين ) علشان كده بيحطوا قطرات

2. زيادة بسيطة في ضربات القلب

3. زيادة الشهية للأكل لدرجة إنه ممكن ياكل ٥ أرغفه وما يحسش بالشبع

4. جفاف الفم لدرجة إنه بيحس إن ريقه حطب

5..إضطرابات القدرات الإدراكية🎗 .. ( ذكاء - ذاكرة - فهم ) وده شيء منطقي لإن تركيزه بيتأثر .. ورغم كده لكنه بيحس إنه ذكي ونبيه علشان مزاجه بيكون حلو

6. تغيرات في الإدراك الحسي 😔.. ( الألوان - الوقت - وكمان ممكن يحصله اختلال في الآنية )

7. إضطرابات في التوازن الحركي .

علي المدى البعيد بيسبب .. 👇

1- أمراض الجهاز التنفسي 😷.

2- زيادة خطر التعرض لسرطان المرئ والبلعوم🦀 .

3- بعض الإضطرابات النفسية والذهانية 🤪( القلق ونوبات الهلع - الفصام والشك المرضي ) .. وللأسف ده بالذات بيكون أثر جانبي مشهور جدا وساعات كمان بيكون على المدى القريب ..وبسببه بيجيلنا ناس كتير في عياداتنا بيعانوا من الاضطرابات دي وبعد مابنتوقف عن تعاطي الحشيش والاستمرار على بعض الأدوية بيتحسنوا بسهولة جدا 💊

4- مرض عقلي مزمن :في حالة لو كان الشخص عنده إستعداد لمرض عقلي ..ولما يتعاطي الحشيش يظهر عليه الأعراض دي بشكل ملحوظ بسبب تفاعل المادة الفعالة في الحشيش ومخ الإنسان زي ماوضحنا ..وبعدين بيظهر المرض العقلي واللي ممكن مايختفيش حتي بعد ما نبطل تعاطي😊💔

5- إضطرابات القدرة الإنجابية وده لإنه بيقلل هرمون التيستوستيرون وهرمون LH 🧑‍🍼
.6-ضعف العضلات والقدرات الحركية .

طيب هل الحشيش إدمان ولا لا 🤔؟؟

كتير من الناس فاكره إن الحشيش بيخرج من الجسم بسرعة لعدم ظهور أعراض إنسحابه من الجسم لكن الحقيقة إنه من أكتر المخدرات اللي بتفضل في جسم الإنسان وقت طويل .. ويمكن ده اللي بيكون السبب إننا مانحسش بأعراض إنسحاب شديدة زي اللي هنناقشها في الاضطرابات التانية . الأعراض اللي بنحس بيها لما بيخرج من جسمنا✌️

1. الأرق و إضطرابات النوم ويمكن ده بيستمر مع الممتنع فترة طويلة وبيكون محتاج بعض العلاجات اللي تساعده في النوم لإنه كان متعود ينام بيه 😴..

2. سرعة استثارة وغضب شديد لدرجة إنه بيخانق في دبان وشه 😫

3. عدم الاستقرار ومش بيبقى على بعضه

4. نقص الشهية وإضطرابات الجهاز الهضمي 👅

5. اكتئاب وقلق شديد وده بسبب الإدمان النفسي عليه

✅ وعلشان نكون متفقين فمهما كان الإدمان العضوي شديد لكن هيفضل برده الإدمان النفسي والسلوكي هو الأكثر شدة وده مع أي نوع من أنواع المخدرات 💉

وده لإن مدنن المخدرات بيكون عنده إعتمادية نفسية علي المادة المخدرة ..وده اللي بيخللي مدمن الحشيش يفضل يتعاطي الحشيش في كل الحالات فرحان أو زعلان وحتى وهو في حالته العادية ..ومابيقدرش يبطله لفترة طويلة ..
لا وكمان بيلجأ ليه دايما عشان يغير المود بتاعه ومزاجه ..
وبعد فترة بيحس إن تعاطيه حاجة مهمة مايقدرش يستغني عنها ولا يقدر يعيش من غيرها😞😭 هو خلاص إتعود عليه وبقي بيحس إنه بيديه الثقة والأمان والرضا وهي دي (الإعتمادية النفسية) 🤭

✅ مهم أوي إننا نعرف إن ناس كتير بتقدر تستغني أو تبطل تتعاطي الحشيش من غير مساعدة طبية أو نفسية بس قليل أوي اللي بيقدر يستمر علي عدم التعاطي🤚🙂

علشان الناس اللي بتخاف من التحاليل 😂 .. إيه مدة بقاء الحشيش في الجسم🤞؟؟

الحشيش من المواد اللي بتفضل في الجسم أكثر من 10 أيام لو بنتعاطاه على فترات متباعده🤗 .. ولو بنتعاطاه كل يوم بيفضل في الجسم من 30 يوم ل 3 شهور😲 والتحاليل الطبية تقدر تحدد نوع المادة الفعالة في جسمك في الفترة دي😁

إزاي بيتم علاج الإعتماد النفسي علي الحشيش؟🤞

بيعتمد علاج أعراض إنسحاب إدمان الحشيش على نفس المبادئ اللي بتستخدم في علاج أى مواد إدمانية أخرى:

1. التوقف عن تناول الحشيش تماما ومش تدريجيا🚭 .

2. الدعم النفسي للمريض بعد التوقف لضمان الاستمرارية👨‍⚕️.

في بعض الأوقات بنساعد المريض في التوقف عن التعاطي عن طريق :

1. المتابعة الدقيقة للمتعالج خارج المستشفى (المنزل) عن طريق تحليل المواد المخدرة بالبول و اللي بيرصد وجود الحشيش بالبول لمدة تصل إلى 4 أسابيع بعد التعاطي. ويعتمد دعم المتعالج على استخدام وسائل العلاج النفسي المختلفة زي: العلاج النفسي الفردي و العلاج النفسي الجماعي
2. نحجز المتعالج في مستشفى وخصوصا لو جربنا العلاج في العيادة كذا مرة ومالتزمش بالبروتوكول العلاجي

العلاج الدوائي 💊: بنستخدم أحيانًا مضادات الاكتئاب وخصوصا لو كان من المحتمل إن يكون السبب الحقيقي لإدمان الحشيش هو الاكتئاب أو الرهاب الاجتماعي ..
وكمان ممكن نستخدمها لفترات قصيرة في بداية العلاج علشان نقلل من أعراض القلق المصاحبة لأعراض الإنسحاب.

عيادات بيرسونا للطب النفسي بتقدم برامج متخصصة لعلاج إدمان الحشيش😍 وبنركز فيها علي التخلص التام من الإعتمادية النفسية علي تعاطي الحشيش😊
والطبيب بيبدأ يعرف المضاعفات والأعراض النفسية والجسدية اللي بتحس بيها لما بتتوقف عن تعاطي الحشيش🤔 .
وبعد كده بتيجي مرحلة سحب السموم من الجسم واللي لازم تتم تحت إشراف طبي🤗 .
وبعديها مرحلة إعادة التأهيل النفسي في الجلسات النفسية لمنع الإنتكاسة☺️😎

وفي النهاية لو عايز تعرف أكتر عن الموضوع ده تقدر تتفرج على الفيديو .. ولو حضرتك أو حد عزيز عليك بيعاني من المشكلة دي أو أي مشكلة نفسية تانية فتقدر تتواصل معانا من خلال صفحتنا وهيرد عليك حد متخصص .. أو تقدر تتواصل على أرقامنا وتزورنا في أحد فروعنا وهتلاقي فريق متخصص تحت أمر حضرتك 😍

إعداد : أستاذ / باهر رضا

مراجعة : د / حاتم صبري

موسوعة الطب النفسي

الفصام
الفصام : schizophrania
الاكتئاب : depression
ثنائي القطب : Bipolar
القلق العام : (GAD) GENERALIZED ANXIETY
اضطراب الهلع : panic disorder
الرهاب المحدد : specific phobia
الرهاب الإجتماعي: social phobia
الوسواس القهرى : O.C.D
إضطراب الجسد المُشوَّه : Body Dysmorphic Disorder
اضطراب الاختزان : Hoarding Disorder
هوس نتف الشعر Trichotillomania
الضغط العصبي الحاد : Acute stress disorder
فقدان الذاكرة النفسي أو النسيان الإنشقاقي Dissociative Amnesia
كرب مابعد الصدمة : P.T.S.D
النوم واضطراباته : sleep disorder
تعدد الشخصيات : Dissociative Identity
الأمراض الجسديه لأسباب نفسيه
قلق المرض : illness anxiety disorder
إضطراب التحول Conversion Disorders
فقدان الشهية العصابي : Anorexia nervosa
الإضطرابات الجنسية : sexual disorders
إضطراب الهوية الجنسية : gender identity disorder
الانحرافات الجنسيـــــــــــــــة: paraphilias (sexual deviations)
اضطرابات الشخصية :PERSONALITY DISORDERS
الشخصية الحدية : borderline personality
الإنتحار : suicide
إيذاء الذات :self harm
الزهايمر : Alzheimer
الإدمان : addiction
التوحد : autism
(اختبار الذكاء I Q)
ADHD: نقص الإنتباه وفرط الحركة
صعوبات التعلم : learning disabilities
التبول الليلي
القلق عند الأطفال
سلوكيات أطفالنا السيئة
إضطرابات نفسية أخرى عند الأطفال
اضطراب السلوك عند المراهقين : Conduct disorder
العلاج المعرفي السلوكي : C B T