جربت تموت قبل كده ؟!!!
أيوه هنتكلم النهارده عن موضوع اضطراب الهلع بيكون صاحبه بيموت كل يوم ، و كل لحظة و كل دقيقة !!
تعالوا بس في الأول نعرف الشخص ده بيحس بإيه في كل لحظة وكل دقيقة ..
تخيل إنك طالع سلم و فجأه لقيت علي السلم أسد كبيرررررررر من غير قفص هتحس ساعتها بإيه ؟😱😱
هتكون ساعتها هتموووووت من الخوف و القلق .. و هتكون مش قادر تتحمل الإحساس ده ، و هتطلع تجري طبعاً ، بس قبل ما تجري هتحس بخوف شديد أووووي و هتكون ضربات قلبك سريعه جدااااا .. و مش قادر تاخد نفسك .. و إيدك و رجلك هيكونوا بيترعشوا جامد أووووووي ..و كأنك بالظبط بتطلع في الروح ..
ساعتها الفكرة اللي بتسيطر عليك إنك خلاااااااص هتموت ،
ده بالظبط اللي بيكون حاسس بيه صاحبنا ، و ياحرام طوووووول الوقت بيكون عايش بالإحساس الصعب ده😤😤”
الأسد ده موقف طبيعي جدااا إن يحصل فيه كل ده ، بس مشكله صاحبنا إن بيكون مافيش موقف مخيف و لا موقف مقلق .. هو بس بيكون حاسس بالخوف و القلق الفظيع ده ومن غير أي سبب .
اللي بيتعب الشخص ده إحساسه بالقلق و الخوف المستمر و اللي كل شويه بيزيد يوم عن يوم و بيكون مش قادر يسطر عليه ،و الأعراض الجسمية ديه تعباه وبيكون مش قادر يتحملها ،
وطبعا بيكون من المعتاد جدا إن أول ما المريض يجيله الإحساس ده بيجري علي الطوارئ علطول ، و بيروح يكشف عند كتيرررر من الدكاتره و في جميع التخصصات و بيعمل إشاعات و تحاليل كتيرة جدااا ، و في الأخر بتطلع التحاليل و الاشاعات سليمة 100 في 100 بس بيكون مش فاهم ليه بيحصل كده و بيكون مش عارف يعمل ايه ؟؟
طب ايه اسم المشكله اللي بنتكلم عنها ديه؟
الإضطراب اللي هنتكلم عنه هو
!! اسمه اضطراب الهلع Panic disorder
الاضطراب ده موجود بنسبة 2 إلى 5 % من عامة الناس ، وبتكون الستات أكثر عرضة من الرجالة للاصابة بيه
طب يعنى إيه اضطراب الهلع 🤔 ؟؟
ده معناه إن الشخص ده بيجيله الاضطراب في صورة نوبات.. وفي خلال النوبات دي بيعيش الشخص لحظات موت بجد بس مش بيموت ، و بتفوت عليه لحظات أو أيام بسيطة ويرجع يعيشها تانى وتالت وهكذا..
طب يعني إيه نوبة هلع أصلا ؟ 🤔
نوية الهلع Panic Attack : دي عبارة عن اندفاع أو هجمات مفاجئة وغير متوقعة ومتكررة بتسبب الخوف الشديد أوالذعر بحيث يوصل الخوف ده أو الذعر لأقصى درجة ليه في خلال دقايق ، والخوف ده بيكون معاه تغيرات جسدية 😲😲 .
مهم اووى نبقي عارفين حاجتين مهمين عن نوبة الهلع .. يا ترى ايه هما 🤔؟؟
1-نوبة الهلع بتستمر فترة قليلة بتتراوح ما بين 10-20 دقيقة ، ولكن في بعض الحالات الشديدة ممكن تستمر نوبة الهلع مدة ساعة كاملة.
2-نوبة الهلع ممكن تيجي بصورة متكررة وبتبقي عند الشخص كاضطراب لوحده ، أو إنها تيجي مع اضطرابات تانية زى اضطرابات القلق وخاصة الفوبيا.
بقى هو حبة الخوف أو القلق اللى بيحصل في الفترة الصغيرة دى مشكلة 😏؟!!
ما كلنا بنخاف وبنقلق 😵!!
طبعا الموضوع مش بالسهولة دي ، الناس اللى بيجيلهم النوبة دي بيبقي عنده إحساس إنه بيموت وروحه بتطلع 😲😲 ، هو في إحساس في الدنيا أصعب من كده 😢😓؟؟؟!!
يعنى أى حد بيجيله خوف شديد فجأة ده معناه إنه بيعاني من اضطراب الهلع 🤔؟؟
لا طبعا لازم يكون الخوف ده معاه أعراض تانية جسدية ،
اضطراب الهلع على الأقل أربع أعراض من الاعراض ديه.. : –
1-إن الشخص بيحس بضربات قلبه أو نبضه يبقى سريع أوالنبضة تبقى قوية ومسمعة في صدره.
2- بيعرق جامد اوووي .
3- رعشة في أطرافه أو جسمه.
4-نفسه قصير أو مش قادر ياخد نفسه.
5-بيتخنق وبتكون حاجة واقفة في زوره أو ضاغطة على صدره لدرجه إنه مش قادر يتنفس .
6-ممكن يبقى في وجع في صدره أو يحس بنغزة.
7-غممان نفسه وبطنه مقلوبة.
8-مدروخ دماغه تقيلة وحاسس إنه هيغمى عليه.
9-ممكن يحس بسقعة او سخونية.
10-تنميل أو شكشكة في جسمه.
11-بيعاني من اختلال الآنية فبيحس كأنه عايش في حلم أو عايش في عالم غير العالم اللي هو فيه
12-بيحس إنه فاقد السيطرة تماما على نفسه وعلى عقله وكأن عقله هيشت منه وهيتجنن.
13-حاسس بإنه هيموت دلوقتي
طب الناس اللى بتيجلها النوبة دى إيه اللى بيخوفها وبيخليها تحس بالتغيرات الجسدية للدرجة دي 🤔 ؟؟
بصراحه مش بيكون في خطر حقيقي أو سبب واضح للخوف ، بس الشخص بيعتقد إنه هيفقد السيطرة على نفسه وعلى تصرفاته لدرجة هتوصله للجنون أو إنه هيصاب بنوبة قلبية أو إنه هيموت 😲😥،
الأصعب من كل ده إن الشخص ده بعد ما تجيله النوبة مش بيرتاح ، لا بيفضل خايف وقلقان من إن النوبة تجيله مرة تانية 😣😥 ، للدرجة اللي بتخليه ممكن يرفض إنه يمارس أي نشاط أو إنه يخرج من البيت خوفاً من إن النوبة تجيله وما يتلحقش أو يفقد السيطرة من شدة خوفه ويبقى منظره محرج جداا قدام الناس 😧😪
مهم إننا نبقي عارفين إن الاضطراب ده لو مش اتعالجنا منه ممكن يحصلنا مشاكل 😮
زى مثلا :
1- الشخص بيكون خايف يخرج من بيته عشان لو خرج من البيت و لو جاتله نوبة الهلع بيكون خايف مين هيساعده؟!
أو إن مفيش حد هيلحقه !! و هيكون لوحده ؟
و إنه هيموت بره البيت و حياته هتتنهي علي كده !!
وكمان ممكن نلاقي بعض الاشخاص اللي بيعانوا من نوبة الهلع ممكن توصل بيهم إنهم بيكون عندهم رهاب من الأماكن الواسعة أو الأماكن المغلقة لدرجه إنهم بيتجنبوا الأماكن ديه …
زي الأسواق المفتوحه أو المولات عشان مش هيلحق يهرب من المكان وإن مافيش حد هيساعده لما تجيله وقت نوبة الهلع .
فبيوصل بيه إنه طول الوقت قاعد في البيت والحالة دي ممكن توصل لأسابيع حابس نفسه في البيت عشان خايف من ظهور النوبة تاني..
و لو احتاج حاجه بيعتمد علي الناس اللي حواليه إنهم يجبولوا احتياجاته ، لكن بيكون مستحيل ينزل لوحده ولازم يكون معاه شخص
2- في بعض الأوقات بيحس الشخص بتعب و زهق بسسب النوبه ديه و بيفضل طول الوقت قاعد في البيت لحد ما بيوصل لاكتئاب و ممكن يوصل إن الشخص ينتحر
3-كل ده طبعاً بيأثر علي باقي حياته بالسلب زي مثلا مش قادر يروح الشغل أو مش قادر ينزل الجامعه و مش قادر يذاكر أو سيدة مش قادرة تعمل الأكل و ترتب البيت .
4- بيكون الشخص عاوز يخلص من النوبه و من قلقه و توتره فممكن يلجأ لشرب المواد المخدرة
طب ايه الاسباب اللي بتوصل لاضطراب الهلع ؟؟
1-سبب عضوي زي زيادة نشاط الغدة الدرقية ودي من الأسباب اللي بتوصل لإضطراب الهلع.
2-التاريخ العائلي والاستعداد الجيني والوراثي للإصابة بالاضطراب ده .
3-ضغوطات الحياة الكبيرة زي وفاة شخص محبوب أو إصابة شخص عزيز عليه بمرض خطير.
4- تعرض الشخص لصدمة نفسية كبيرة أوووي زي مثلا التحرش أو فقد الشغل أو الطلاق
5-تعاطي الحشيش برده ممكن يعرض الشخص إنه يحصله اضطراب الهلع.
6-طبيعية شخصية الفرد ، فالشخصية القلوقة والشخصية الحساسة هما من أكثر الشخصيات اللي بيكونوا معرضين للإصابة باضطراب الهلع.
7- الصراع الداخلي جوه الشخص أو الاحساس بالذنب ناحية أشياء كتيره سيئة عملها في حياته .
حد هيسألني طب ايه الحل 🤔 ؟؟
الحل بسيط …
وهو اننا نطلب المساعدة ونروح لدكتور نفسي فاهم ويقدر يشخص حالتك كويس ويعرف ازاى يساعدك.
طيب ايه هو علاج اضطراب الهلع 🤔؟؟
العلاج الدوائي : زي بعض الأدوية المضادة للقلق والاكتئاب واللي بتحسن الأعراض في فترة قليله جدا
1-العلاج النفسي :
زي العلاج السلوكي المعرفي واللي يساعد على فهم نوبات الهلع وكيفية التعامل معها، وفهم المواقف والأفكار والمشاعر التي بتسبب النوبة وبالتالي هتكون أقل حدة في إنها تسبب مشكلة ،
كمان بيساعدنا إننا تتعلم من خلال خبرتنا الخاصة إن أعراض الهلع مش خطيرة ،
بالاضافة إلى إننا بنتعلم بعض التمارين اللى بتساعدنا على التأمل و الاسترخاء والتهدئة والشعور بالراحة.
3-الأنشطة البدنية زي ممارسة الرياضة، لأنها بتساعد على تخفيف القلق والتحكم في نوبات الهلع بصورة كبيرة .
وفي النهاية .. لو عايز تعرف أكتر عن الاضطراب وعن علاجه فتقدر تشوف الفيديوهات دي… ولو بتعاني من المشكلة دي أو أي مشكلة نفسية تانية تقدرتستفسرمن خلال صفحتنا أوتتواصل معانا من خلال أرقامنا أو تزورنا في أقرب فرع ليك من فروع عياداتنا
