هنتكلم في الموضوع ده عن إضطراب نفسي مشهور جدا .. وتقريبا كتير مننا عانى منه في وقت من الاوقات وهو اضطراب الرهاب المحدد أو الفوبيا !!
اضطراب النهارده بيظهر أكتر عند الستات …
طيب يعني إيه كلمة رهاب محدد أو فوبيا من وجهة نظر علم النفس ؟؟
الرهاب ده عبارة عن إحساس بالخوف الشديد والغير مبرر من حاجات أو مواقف مش منطقي خالص نخاف منها .
الإحساس ده بيخلينا نتجنب أي موقف بيخوفنا ، و الحاجه اللي بنخاف منها دي لما نتعرض ليها غصب عننا بنحس بالخوف الشديد جدا وممكن كمان يجيلنا بسببها نوبات من الهلع الشديدة أو يغمى علينا أو نجري ونهرب بسرعة.
الرهاب المحدد
طيب إيه أعراض الاضطراب ده ؟؟
1. هلع وده معناه خوف كبير أوي من شيء معظم اللي حوالينا مش بيخاف منه زي اللي بتخاف مثلا من الحشرات !!👺☠️
2. أعراض جسدية عند المواجهة : زي الدوخة والرعشة وضربات القلب السريعة والإحساس إن الواحد بيتخنق ومش قادر ياخد نفسه 😇
3. الفكرة القهرية : بمعنى إن الشخص مش بيقدر يتجاهل الأمر وبيفكر في أي حاجه غير الهروب من الموقف ده 😱
4. الرغبة في الفرار : وده معناه إن الشخص مش بيقدر يواجه الشيء اللي بيخوفه ده وقت طويل وبيكون عايز يجري ويهرب من الموقف 🏃♂️🏃♂️
5. القلق المسبق : بمعنى إنه بيكون قلقان من قبل مايتعرض للموقف اللي بيخاف منه ده وطول الوقت مترقب ازاي يتفاداه
. علشان كده .. لو حد بيحس بالحاجات دي ومش قادر يسيطر عليها ده معناه إن عنده فوبيا.
الرهاب الإجتماعي
طب ايه أنواع الفوبيا دي ؟ 🤔
تعالو نعرف…
مصادر الخوف بتختلف من شخص للتاني لكنهم في الأدلة التشخيصية في الطب النفسي بينحصر في الانواع دي ..
1- فوبيا الحيوانات zoophobia زي اللي بيخاف من العناكب أو الكلاب أو القطط أو الفئران أو البنات اللي بتخاف من الحشرات وبتصوت ويغمى عليها أول ماتشوفها
2- فوبيا الطبيعة أو الظواهر الطبيعية. ودي بنشوفها عند ناس كتير بتخاف من المرتفعات أو من البرق أو الرعد أو السما لما تضلم وحاجات من هذا القبيل .
3- فوبيا الأماكن. زي اللي بيخاف من الاماكن المتسعة أو المنغلقة أو من البحر أو الطرق السريعة وده ممكن يخلي بعض الناس ماتسافرش تماما بسبب مخاوفها
4- فوبيا الدم والجروح.وده للاسف بيوصل ببعض الناس إنها ممكن تفقد الوعي لمجرد رؤية الدم وده طبعا ممكن يأثر على حياة الشخص بصورة كبيرة خصوصا
لو شغال في مجال طبي 😢 !!
5- فوبيا غير محدده زي اللي بيخاف من الاصوات العالية أو اللي بيخاف من مرض معين …
طب لو عايز تتأكد عندك فوبيا ولا لأ.. تعمل ايه 🤔 _
لازم تسأل نفسك هل الخوف اللي بحسه ناحية أي شئ منطقي ومبرر ولا لأ… هل فعلا الحاجة دي تستاهل إنك تخاف منها بالصورة دي ولا أنت مكبر الموضوع حبتين… _
طب ليه أصلا بيحصلنا كده.. إيه هيا أسباب الفوبيا..
1- ليها عوامل وراثية.
2- المواقف اللي بنتعرض لها خلال فترة الطفولة.واللي بتتخزن في اللاوعي بتاع الإنسان …
جه وقت نصيحتي لأي حد بيعاني من الفوبيا…
1- أكسب مخاوفك.
2- لازم تكون صريح مع نفسك و تواجهها بخوفك أوعى تهرب منه أو تتجنبه.
3- مافيش أحلي من إنك تتغلب علي خوفك
. 4- إتأكد إنك يوم ماهتسيطر علي خوفك هتحس بالقوة والثقه بالنفس
. 5- خليك واثق إن عمر اللي بتخاف منه ماهيموتك.😊
العلاج من الرهاب المحدد:
رغم إن يمكن الفوبيا من أشهر الاضطرابات النفسية إلا إن نسبة زيارات مرضى الفوبيا بالعيادات قليلة جدا !!
وده لإن للأسف معظم الناس بتلجأ إنها تتعايش مع مخاوفها عن طريق تجنب مصدر الخوف ..
ومش بيلجأ للعيادة إلا الأشخاص اللي أثرت الفوبيا على حياتهم بصورة كبيرة أو بدأت تظهر عليهم اضطرابات نفسية أخرى مصاحبة زي اضطراب الهلع
بيكون العلاج في الأساس ..
1) بعض العلاجات السلوكية: زي سحب الحساسية التدريجي من خلال فنيات التعرض ومنع الإستجابة
2) في بعض الأحيان القليلة ممكن نلجأ للعلاج الدوائي
وفي النهاية ..لو عايز تعرف تفاصيل أكتر عن الإضطراب ده تقدر تشوف الفيديو ده في الأخر .. ولو بتعاني من المشكلة دي أو حد عزيز عليك بيعاني منها تقدر تستفسر من خلال صفحتنا ..وتقدر كمان تتواصل معانا من خلال أرقامنا ..أو تزورنا في أقرب فرع ليك من فروع عياداتنا
`مراجعة : د/ حاتم صبري
