الفصام هو حالة نفسية معقدة ممكن تصادفها في حياتك اليومية، ممكن تشوف شخص بيتكلم مع نفسه بصوت عالي أو بيصرخ، أو حتى تلاقيه لابس لبس غريب أو مش مهتم بنظافته الشخصية. الشخص دا ممكن يظهر لك كأنه عايش في الشارع بقاله فترة طويلة، لكن الحقيقة إن الشخص دا ممكن كان لسه من كام شهر بس عايش حياة طبيعية تمامًا، وكان ناجح وعنده علاقات اجتماعية كويسة.
طيب إيه اللي ممكن يوصل الشخص دا إنه يكون في الحالة دي🤔؟؟
لو رجعنا لتاريخ الشخص ده من كام شهر ممكن نلاقيه مر بأزمة نفسية كبيرة أوي والأزمة دي خلته ينعزل عن الناس …
بدأ بالتدريج تفكيره يتغير بصورة غريبة جدا .. وبدأ يشك بدون سبب حقيقي إن مثلا مامته كانت هي السبب في الأزمة دي ..
هنلاقيه بدأ يفسر بصورة غير منطقية بعض تصرفاتها العادية خالص وبدأ يفتكر إن التصرفات دي معناها إن مامته عايزه تتخلص منه عن طريق إنها تحطله سم في الاكل..
ممكن كمان يكون بدأ يحس إن جيرانه متفقين معاها إنهم يعملوله سحر وبدأ برده يفسر تصرفات منهم عادية خالص بطريقة غير منطقية خالص ..ومن خلال التفسيرات دي بدأ يتأكد إنهم بيعملوله سحر🧜♂️ …
بدأ يشك وهو ماشي إن في ناس بتراقبه وماشيه وراه وده كان بيضايقه جدا ..
بدأ يحس إن أي اتنين بيتكلموا في الشارع وبيضحكوا فده معناه إنهم بيتكلموا وبيضحكوا عليه، بدأ يحس إن حتى شقته متراقبه بكاميرات، بدأ كمان يسمع أصوات في ودنه بتأكد ليه الحاجات دي وبتطلب منه يهرب ويتنكر في لبس مبهدل ويعيش في الشارع، بدأ يعيش أوي في القصة دي وينسى خالص أي حاجه واقعية في الدنيا .. و من كتر ماعاش في الخيال ده وانفصل عن الواقع ساب شغله وساب بيته وساب كل حاجه وبقى كمان بيتكلم بطريقة غريبة عشان محدش يفهم كلامه !!
يمكن يكون سيناريو شبيه بالسيناريو ده هو اللي حصل معاه ..ويمكن هو اللي وصل بيه الأمر إنه يبقى ماشي في الشارع وهو فاكر إنه بيتصرف صح ومقتنع بكل حاجه بيعملها وشايف إنه ماعندهوش مشكله أو حاجه مش طبيعية .. لا كمان بيكون فاكر إن الناس هي اللي عندها مشكلة ومش فاهمين المؤامرة اللي بتتعمل عليه 😱
بكل بساطة التفسير العلمي والحقيقي للإضطراب اللي حصل للشخص ده هو إنه يكون بيعاني من ” الفصام” وبدأت تظهر عليه أعراض المرض اللعين ده 😇
تعريف الفصام:-
- “الفصام هو اضطراب نفسي بيأثر على وظائف المخ الأساسية، زي التفكير، والعواطف، والإدراك، والإرادة، والسلوك. الفصام بيظهر لما كيمياء المخ تتلخبط، وده بيعمل خلل في الوظائف دي.”
الأعراض الرئيسية:
عشان نقدر نقول إن الشخص عنده فصام، لازم يظهر عليه اتنين أو أكتر من الأعراض دي، ومن ضمنها الهلاوس والضلالات:
1- هلاوس :
طيب يعني ايه هلاوس🤔 ؟
الهلاوس معناها إن الشخص بيحس أو بيسمع حاجات مش موجودة في الحقيقة. أكتر نوع شائع من الهلاوس هو الهلاوس السمعية، يعني الشخص بيسمع أصوات بتتكلم معاه أو بتأمره يعمل حاجة معينة. ممكن كمان يبقى فيه هلاوس بصرية، يشوف حاجات غريبة، أو هلاوس لمسية، يحس إن حد بيلمس جسمه.
2- الضلالات :
الضلالات هي أفكار ثابتة ومش بتتغير، الشخص بيصدقها حتى لو كل الناس حواليه شايفين إنها مش منطقية. مثال على الضلالات دي: ضلالات الاضطهاد، يعني الشخص يفتكر إن في حد بيلاحقه أو عايز يأذيه، أو ضلالات العظمة، يعني الشخص يبقى شايف نفسه مهم جدًا أو عنده قدرات خارقة.
3-اضطراب في التفكير :
الاضطراب ده بيبان في كلام الشخص اللي بيبقى مش منظم ومش مفهوم. ممكن يتكلم بكلمات مش منطقية أو يخترع لغة جديدة محدش فاهمها غيره.
الأعراض السلبية :
الأعراض دي بتشمل قلة الاهتمام بالنظافة الشخصية، الانعزال عن الناس، وفقدان القدرة على الاستمتاع بالحياة.
سلوكيات الغريبة والتخشب الكتاتوني :
الشخص المصاب بيعمل تصرفات غريبة، زي إنه يرمي حاجات من الشرفة، أو يجمع حاجات من القمامة. وفي بعض الأوقات، ممكن يصاب بتخشب كتاتوني، يعني يبقى مش قادر يتحرك أو يستجيب.
الأسباب:
للأسف لحد الان مافيش سبب واضح وحقيقي للفصام رغم إن في مئات النظريات اللي حاولت تحدد أسباب ليه 🤔!! –
بسبب وراثي :🔳
طبعا الجينات بيبقى ليها دور كبير وكل مازادت القرابة بيزيد إحتمالية حدوثه ..لكن طبعا ده ما يأكدش أو ينفي أي حاجه لإن الدراسات دي برده بتأكد إن العامل النفسي والاجتماعي ليها دور
– بسبب زيادة نشاط هرمون الدوبامين في منطقة Mesolimbic ..
فهرمون الدوبامين بيكون المتهم الأساسي كناقل عصبي في احتمالية حدوث الفصام ويمكن اللي بيأكد ده هو إن كتير من الأدوية
اللي بتقلل الهرمون ده بتعالج أعراض الفصام وكمان المواد المخدرة إللي بتزود نسبة الهرمون ده بتعمل أعراض مشابهة للفصام
كمان في بعض النواقل العصبيه التانيه اللي بتكون متهمة زي السيروتونين والجلوتاميت والجابا والنورأدرينالين والفينيل ايثيلامين
- بعض الانزيمات ليها دور : زي الانزيم المؤكسد للأمينات الأحادية والدوبامين بيتا هيدروكسيلاز والميثيل ترانسفيراز والكرياتين فوسفوكيناز
- بعض المواد التانيه زي الاندروفين والبروستجلاندين والجلوتين
- بعض الأبحاث بتقول إن المناعة ليها دور والبعض الأخر بتتكلم إن في فيروس غير مكتشف وهو المسئول عن الأعراض دي
- بسبب المخدرات زي الحشيش و خصوصاً لو الشخص عنده استعداد جيني للاصابه للفصام.
أسباب نفسية :
ممكن موت شخص عزيز ، أو تغيرات في ظروف الحياة زي الانتقال من بلد لبلد تانيه
- طببعية الشخصية اللي مش بتعرف تعبر عن مشاعرها و بتكون انطوائية و مش بتتفاعل مع المجتمع اللي حواليها
- الشخصيات المهيئة للفصام زي الشخصية الشبة فصامية و البارانويدية
- اضطراب العلاقة بالناس اللي حواليهم من بداية مرحلة الطفولة
- ضعف الأنا بتاعت الشخص بصورة كبيرة
- الأوامر المتناقضة عند الطفل في تربيته زي إننا نطلب الحاجات من الطفل ونقصد عكسها
- سيطرة أحد الوالدين وانعزال التاني وضعفه
- التفكير بصورة غير منطقية في الأسرة
معلومات إحصائية عن الفصام :
بيصيب الفصام حوالي 1% من مجموع العالم وبينتشر بين الرجاله و الستات بنسبة واحده لكن بيظهر عند الرجال في سن مبكر من سن 16 لحد سن 25 20%
– 15% من الحالات بتظهر الأعراض فيها بعد سن 40، أو متأخر جدا بعد عمر 60
إعتقادات خاطئة:
- – للأسف ناس كتير فاكره إن الفصام معناها انفصام في الشخصيه بمعني إن الشخص بيكون بشخصيتين ، طبعا ده مش صح ده اضطراب تاني اسمه تعدد الشخصيات نقدر نقراه في نافذة تانيه في الموقع ، أما الفصام فده معناه زي ما قولنا إن شخص منفصل تماما عن الواقع و مش عارف يفرق أو يميز بين الواقع و بين الخيال
- – أو ناس بتقول عليه مجنون في حين مافيش حاجه اسمها مجنون في قاموس الطب النفسي
- – الاهل بيكونوا معتقدين إن حد عمله سحر أو ملبوس و يروحوا عند كتير من المعالجين الروحانيين وفي الاخر بيبقى مافيش أي تغير لحالته
مسار و مآل المرض :
- الضلالات اللي بعض مرضى الفصام بيصدقوها بتكون قوية لدرجة إنهم مقتنعين بيها مليون في المية، وده ممكن يخليهم يعملوا حاجات خطيرة. يعني لو المريض مقتنع إن زمايله في الشغل عايزين يقتلوه، ممكن يتصرف بناءً على اعتقاده ده، ويجيب سكينة ويهاجمهم أو يتخانق معاهم، أو حتى يتصرف بعنف تجاههم.
في حالات تانية، ممكن مريض الفصام يوصل لمرحلة إنه يفكر في الانتحار بسبب الأعراض الشديدة اللي بيعيشها، اللي ساعات بتكون فوق طاقته. لو المريض ماخدش العلاج المناسب، وخصوصًا في بعض أنواع الفصام، ممكن الحالة تتدهور لدرجة إنه يسيب شغله أو دراسته، وممكن كمان يخسر جوازه. للأسف، ده كله بيأثر على مستوى المريض المادي والاجتماعي بشكل كبير.
الوقايه:💪
الكلام ده مهم جدًا للأهل:
- – خلوا ولادكم يتفاعلوا مع المجتمع ويشتركوا في أنشطة اجتماعية، ده بيساعدهم يبنوا شخصيتهم ويكبروا بطريقة سليمة.
- – علموهم يعبروا عن مشاعرهم بشكل صحيح ومفتوح، علشان يعرفوا يتعاملوا مع مشاعرهم بدل ما يكبتوها جواهم.
- – حاولوا تبعدوا تمامًا عن النقد أو تفضيل حد على حد في المعاملة، لأن ده بيخلق جو سلبي وبيأثر على علاقة الأخوات ببعض.
- – وده مهم جدًا، إنكم تكونوا متفقين في كلامكم ومعاملتكم مع ولادكم. يعني لو بابا قال حاجة، ماما متقولش حاجة عكسها تمامًا. الطفل بيكون محتار ومش عارف يعمل إيه. لازم الكلمة تكون واحدة، زي ما بيقولوا: “المركب اللي ليها ريسين بتغرق”.
علاج الفصام في عيادتنا
علاج الفصام في عياداتنا بيتم كالتالي:
✅ أحيانًا بيكون لازم نحجز المريض في المستشفى لعدة أسابيع، وده خصوصًا لو كان المريض بيعاني من تهيج شديد أو كان فيه خطر على نفسه أو على الآخرين.
✅ المتابعة المستمرة للمريض وهو بياخد علاجه ضرورية جدًا، لأن المريض غالبًا بيكون غير مدرك لحالته وبيعتقد إنه ماعندوش مشكلة، وده بيخليه مش منتظم على العلاج.
✅ في حالة عدم الانتظام على العلاج أو رفض المريض يروح للطبيب، بننصح الأهل إنهم يلجأوا لأقرب مستشفى نفسي علشان يحموا حياته وحياة اللي حواليه.
✅ التحسن عادة بيبدأ يظهر بعد أسبوعين من بدء بروتوكول العلاج المناسب بشرط الانتظام على الأدوية.
العلاج الدوائي: 💊
من حظنا الحلو إننا عايشين في زمن فيه تطور كبير، وتم اكتشاف عشرات الأدوية اللي بتعالج الفصام (مضادات الذهان) واللي بتساعد في السيطرة على الأعراض بشكل كامل وبدون آثار جانبية كبيرة. فيه نوعين من مضادات الذهان: النوع التقليدي زي الهالوبريدول، والنوع غير التقليدي زي الأولانزبين، الرسبريدون، والأريبيبرازول.
بالنسبة للعلاج بالصدمات الكهربائية، بنلجأ له عشان نحسن الحالة، وخصوصًا لو الأعراض كانت شديدة جدًا، أو لو في أعراض سلبية قوية أو أعراض تخشب (كتاتونية). ورغم الإشاعات السيئة عن العلاج ده، إلا إنه آمن ومفيش منه مشاكل كبيرة، وهنتكلم عنه بالتفصيل أكتر قدام.
العلاج النفسي:
1- بيكون من خلال جلسات نفسية هدفها إننا ندعم ونشجع المريض على إنه يتعامل مع الحياة بشكل أفضل، ونعلمه سلوكيات تساعده في حياته اليومية، وكمان بنشتغل على تصحيح أفكاره الغلط والمشوهة.
2- العلاج الاستبصاري: في المرحلة دي بنستخدم برامج علاجية هدفها إن المريض يفهم مشكلته أكتر ويستوعب معاناته بشكل أعمق.
3- الإرشاد الأسري: بنشرح لأهل المريض طبيعة مشكلته ونساعدهم في تقبلها، وكمان بنوجههم يعملوا بعض التغييرات في سلوكياتهم، زي تقليل العداء والانتقاد، لأن كل ما الحاجات دي زادت بتبقى سبب في انتكاس المريض.
4- العلاج المهني: بنساعد المريض إنه يفضل مستمر في شغله أو نلاقي له شغل يناسب حالته.
وفي النهاية… لو حد قريب منك بيعاني من المشكلة دي أو عنده أي مشكلة نفسية تانية، تقدر تتواصل معانا من خلال صفحتنا أو أرقامنا، أو تزورنا في أقرب فرع لينا. ولو عايز تعرف أكتر عن المرض وأنواع العلاج أو تلاقي إجابات لأسئلتك، تقدر تشوف فيديوهاتنا دي.
أقرأ أيضا:
مراجعة : د / حاتم صبري
أسئلة طرحها الآخرون
ما اعراض مرض الفصام؟
كيف يتصرف مريض الفصام؟
هل يدرك مريض الفصام انه مريض؟
ما الفرق بين الفصام و الانفصام؟
